පසුගියදා රුසියාවේ මොස්කව් නුවරදී පැවැති ලෝක රූ රැජින 2013 තරගාවලියේදී ජයග‍්‍රහණයේ කිරුල පැළඳියේ වෙනිසියුලාවේ මරියා ගැබ්රියෙලා අයිස්ලර්ය. මොස්කව් හි ක්‍රෝකස් ශාලාවේ පැවති මෙම 2013 ලෝක රූ රැජින කිරුල දිනූ මේ සුරූපිනිය කවුද? බොහෝ දෙනා අද ඇය ගැන කතාවන්නේ වෙනිසියුලාවේ තැනැත්තියක ලෙස  වුවද, එතැනින් එහාට ගිය පවුල් පසුබිමක් ඇය සතුය.

අති ශුද්ධ සුරූපී තැනැත්තියක ලෙස අද බොහෝ දෙනාගේ ආකර්ශණයට නතු වූ  2013 ලෝක රූ රැජින ගැන කියවෙන විස්තරයකි මේ.

රටවල් 85 ක පමණ සුරූපිනියන් අතරින් ලෝක රූ රැුජින වූ ඇයගේ සම්පූර්ණ නම වන්නේ මරියා ගැබ්රිඑලා ඩි ජේසන් අයිලර්ය. වෙනිසියුලාවේ බොහෝ දෙනා අතර, මොරාල්ස් නමින්ද ඇය ප‍්‍රකටය. 1988 අපේ‍්‍රල් 21 වැනිදා ඇය උපන්නේ වැලෙන්සියාවේ කැරාබොබෝවලදීය. ඉගෙනීම සඳහා ඇයට මරානෝ වලට යාමට සිදුවිණි. මරියා ගැබ්රිඑලා තම උසස් අධ්‍යාපනය හමාර කළේ කළමනාකරණය හා අලෙවිකරණ උපාධිය ලබමිනි. ඉන්පසුව විලාසිතා නිරූපන ක්‍ෂේත‍්‍රයට පැමිණීමට පෙර ඇයට රැකියාවක් කිරීමට අවශ්‍ය විය. ඒ තම ස්වෝත්සාහයෙන් නැගී සිටීම වෙනුවෙනි. තම පරපුරේ පිය පාර්ශ්වය පැවැත එන්නේ ස්විට්සර්ලන්තයෙනි. ඇයගේ පියා ජුආන් අයිස්ලර් ලෙන්ග්මන් ස්විස්ටර්ලන්තයේ ලූසානයේ ආගමන පාලක වරයාගේ පුතාය. එනිසා අවැසි නම් ඇයට වඩාත් සුව පහසු ජීවන රටාවක් වෙනුවෙන් එහි යාමට අවකාශ තිිබිණි.

එහෙත් මේ සියලූ දේ කිරීමට පෙර උපාධියට සරිලන රැකියාවක් ලැබෙන තෙක් ඇය පුද්ගලික ආයතනයක රැකියාවකට ගියාය. එහිදී ඇයගේ රාජකාරිය වූයේ තෑගි පාර්සල් කිරීමය. මේ තෑගි ගන්නේ කුමකටද? එයින් බලාපොරොත්තු වන්නේ කුමක්ද? ඇය ත්‍යාග ඔතා දුන්නේ ග‍්‍රාහකයාගේ එම අදහස් වලට අනුවය.
මේ නිරහංකාර සුරූපිනිය විලාසිතා ලෝකයට පිවිසියේ  තම මවගේ අඩිපාරේ යමිනි. එනම් මව නිරූපිකාවක  වූවාය.

ජාත්‍යන්තර නිරූපණ ක්‍ෂේත‍්‍රයේ උපදේශකයකු ලෙස ප‍්‍රකට කි‍්‍රිස්ටෝපර් ඇරෙන්ඩන් යටතේ තමා බොහෝ දේ උගත් බව ඇය ගෞරවයෙන් සිහිපත් කරන්නීය. උපාධිය ලබා සිටි මරියා ගැබ්රිඑලා වෙනිවිෂන් ටීවී නාලිකාවේ රැකියාවක නිරත වූවාය. නිරූපණ ක්‍ෂේත‍්‍රයට පැමිණීමත් සමඟ වැඩි කල් නොගොස් ජාත්‍යන්තර වශයෙන් නමක් දිනා ගැනීමට අයට හැකි විය.

ඇයගේ ඊළඟ පිම්ම වූයේ වෙනිිසියුලාවේ රූ රැුජින තරග සඳහා ඉදිරිපත් වීමය. ඒ අනුව, 2012 වෙනිසියුලාවේ රූ රැජින කිරුළ හිමිවුණේ  ඇයටය. එම කිරුළ  සමඟ එරටේ පැවැත්වූ රූ රැජින තරග ත‍්‍රිත්වයකම කිරුළ දරන්නීය. 2013, ලෝක රූ රැජින තරගාවලියේ අවසාන වටයේදී  ඇය හට ලැබුණු ප‍්‍රශ්නයකට ඇය පිළිතුරු දුන්නේ මෙලෙසිනි.

කුමක්ද ඔබට තිබුණු ලොකුම බිය? එය අභිබවා යන්න ඔබට තිබූ දැක්ම මොනවගේද?
‘‘බිය කියන්නේ අසුබවාදී දෙයන් නොවෙයි. එය අභිබවා යාමට නම් අපට ආත්ම ශක්තියක් තිබෙන්න  ඕනෑ. එවිට  ඕනෑම අභියෝගයකට මුහුණ දිය හැකියි.
එලෙසින් පිළිතුරු දුන් ගැබ්රිඑලා නරඹන්නන්ගේ සිත් ඇදගත්තේ සුන්දර වදන් නිසාම නොවේ. මෙම ලෝක රූ රැජින තරගාවලියේදී ඇය ඇඳි විලාසිතා වලට නරඹන්නෝ වශීවූහ. ඇයගේ ටිවි ටයිනි බිකිනි නැටුමට බොහෝ දෙනා වසඟ වූහ. දිගු ගවුම් විලාසිතා මෙන්ම රිදී පැහැයෙන් නිම වූ ගවුම (අවසන් මොහොතේ ඇඳි) කාගෙත් සිත් ගත් විලාසිතා  විය. උස අඩි 5 යි අඟල් 10 ක් වන මේ සුරූපිනිය වසර හයක් ඇතුළතදී පිට - පිටම වෙනිසියුලාවෙන් බිහිවූ තෙවැනි ලෝක රැජින වන්නීය. ලෝක රූ රැජින තරග ඉතිහාසයේදී (වසර 13 ක් පුරා මේ දක්වා පැවැත්වූ)  වෙනිසියුලාවෙන් ලෝකයට සුරූපී ඇය සමග සත්දෙනෙකු දායද වී ඇත.

වෙනිසියුලාවේ නිරූපිකාවක මෙන්ම ස්විට්සර්ලන්තයේ නිරූපිකාවක ලෙසද කටයුතු කරමින් සිටි මේ සුන්දර කිරිල්ලියට ලෝකය වටේ යාමට අවකාශය ලැබී තිබේ. විලාසිතා ලෝකයේ බොහෝ දෙනා ඇයට ‘‘මෝලි’’ කියාද හඳුන්වති. මෙම සුරූපී මෝලි වඩාත්ම ගරුකරන චරිතය වන්නේ තම මවය.

‘‘සෑම ගමනාන්තයකදීම හමුවීමක් ඇත’’ යන්න ඇයගේ මව ඇයට සිහිපත් කළ දේ ඇය නිතර විශ්වාස කළාය.

සුරූපී මරියා ගැබ්රිඑලාට වෙනිසියුලාවේ මෙන්ම ස්විට්සර්ලන්තයේද පුරවැසිභාවය ඇත. මේ නිසාම සමහරු ඇයට කියන්නේ බාගයක් වෙනිසියුලාවේ - තවත් බාගයක් ස්විට්සර්ලන්තයේ යනුවෙනි.  ඒ අනුව මේ සුරූපිනියගේ මේ ලෝක කිරුළ අයත් වන්නේ, වෙනිසියුලාවට පමණක්ම නොවන වග සඳහන් කළ හැකිය.

                         (අන්තර්ජාලය ඇසුරින් ) - සංකල්ප