ජාඇළ, දඬුගම ප්‍රදේශයේ ස්ථාන දෙකක  නීතිවිරෝධී ලෙස මහා පරිමාණ  අයුරින් සිදු කැරුණු ඉඩම් ගොඩකිරීම් දෙකක් මෛත්‍රීපාල සිරිසේන ජනපතිගේ උපදෙස් පරිදි වහාම නවතා දැමීමට මධ්‍යම පරිසර අධිකාරිය පියවර ගෙන ඇතැයි ජනපති ලේකම් කාර්යාලයය කියයි.

ප්‍රදේශවාසීන් කළ පැමිණිල්ලක් අනුව වහාම එහි ගොස් විමර්ශන අරඹන ලෙස ජනපති උපදෙස් දී තිබේ.

ඒ අනුව මධ්‍යම පරිසර අධිකාරියේ නිලධාරින් සහ ඉඩම් ගොඩකිරීමේ හා සංවර්ධනය කිරීමේ සංස්ථාවේ නිලධාරීන්  ජාඇල පොලිසිය සමඟ අද (4) එම ස්ථාන වෙත ගොස් විමර්ශන ආරම්භ කළ බවත්, ජනපතිගේ උපදෙස් පරිදි එම අනවසර ඉඩම් ගොඩකිරීම් වහාම නවතා දැමීමට පියවර ගත් බවත් ජනපති ලේකම් කාර්යාලය පවසයි.

මුතුරාජවෙළ කඩොලාන පාරිසරික පද්ධතියට හානි පමුණුවමින් විශාල භූමි භාගයක සිදු කර ඇතැයි කියන මෙම අනවසර පහත් බිම් ගොඩකිරීම් සිදුකළ පුද්ගලයන්ට එරෙහිව නඩු දැමීමට නියමිත බව ද එම කාර්යාලය සඳහන් කරයි.