ජනාධිපතිවරයා සහ අගමැතිවරයා අතර විවිධ ගැටුම් තිබෙන බවට සඳහන් කරමින් නැති දේවල් මවාපෑමට ඇතැම් මාධය මඟින් උත්සාහ ගත්තද ඔවුන් දෙදෙනා අතර එවැනි කිසිදු ගැටුමක් නැතැයි විදේශ කටයුතු අමාත්‍ය මංගල සමරවීර මහතා පැවසීය.

රට හමුවේ පවතින අභියෝගයන්ට මුහුණ දෙන්නට එම නායකයින් දෙදෙනා ශක්තිමත් මිත්‍රත්වයකින් අත්වැල් බැඳගෙන කටයුතු කරන බවද, එනිසා අද පවතින තත්ත්වයෙන් ප්‍රයෝජන ලබා ගත යුතු බවද විදේශ අමාත්‍යවරයා කීවේය.

ඉතිහාසයේ දෙපැත්තක සිටි ප්‍රධාන දේශපාලන පක්ෂ දෙක අද වන විට එක්ව කටයුතු කරන බවත්, විශේෂයෙන් ශ්‍රී ලංකා නිදහස් පක්ෂය ජනාධිපති මෛත්‍රීපාල සිරිසේන මහතාගේ මූලිකත්වයෙන් හා එක්සත් ජාතික පක්ෂය අගමැති රනිල් වික්‍රමසිංහ මහතාගේ මූලිකත්වයෙන් කටයුතු කිරීම සුවිශේෂි වන බවත් හෙතෙම පැවසීය.

යළිත් වරක් රටේ  ඒකාධිපති පවුල්වාදයක් ඇති නොවන පරිදි ප්‍රජාතන්ත්‍රවාදය තහවුරු කළයුතු අතරම අනෙක් පැත්තෙන් රටේ සංහිඳියාව ඇති කළ යුතු බව ද සමරවීර මහතා සඳහන් කළේය.