ලෝකය වටේ සංචාරය කරන අතරවාරයේදී ජපානයේ සංචාරයේ නිරත වෙමින් සිටියදී "හොන්ඩා" කම්පැනියටත් ගොඩවැදුණොත් හොඳයි කියලා හිතුණා. හොන්ඩා කම්පැනියෙ පරිපාලන කටයුතු සිදුකෙරෙන මෙන්ම ප්‍රදර්ශනාගාරයත් පිහිටා තිබෙන්නේ තෝකියෝ නුවර මිනාමි අඕයාමා මිනාතෝකු (2-1-1 Minami Aoyama Minato ku - Tokyo) ස්ථානයේයි. මෙතෙක් හොන්ඩා මෝටර් කම්පැනිය වෙතින් නිර්මාණය වූ අනර්ඝ නිර්මාණ මෙන්ම, අලුතින්ම නිර්මාණය වී වෙළෙඳ පොළට හඳුන්වා දෙන නිර්මාණ මෙම හොන්ඩා කම්පැනිය සතු ගොඩනැගිල්ලේ පහත මාලයේ ප්‍රදර්ශනය කෙරෙනවා. මා මේ විස්තර කිරීමට සූදානම් වන්නේ හොන්ඩා මෝටර් රථ ගැන නම් නොවේ. ඒ ගැන පසුවට කතා කිරීමට ඉඩ තබා ඔබ වෙත විස්තර කිරීමට සූදානම් වන්නේ හොන්ඩා සමාගම බිහිකළ රොබෝවරයා ගැන විස්තරයක් පැවසීමටයි. තවත් විදියකට කිව්වොත් කතා කරන රොබෝ සඳහා වූ විස්තරයක්.

කවුද මේ කතා කරන රොබෝ?

මෙයාගේ නම "අසිමෝ"ය (Asimo). 1986 දී පමණ මේ ඇවිදින රොබෝ නිර්මාණය කිරීමට හොන්ඩා සමාගම සමත් වූ අතර, වත්මනෙහි අසිමෝ යනු මානවයාගේ ක්‍රියාකාරීත්වයට වඩාත් සමීපව හැසිරවිය හැකි රොබෝ යන්ත්‍රයක්.

නටන්න, ගයන්න ඒ වගේම තවත් බොහෝ දේ ගැන කතා කරන්න මේ අසිමෝ රොබෝ සමත්ය. ජනයා ගැවසෙන තැන්වලට, වෙළෙඳ සංකීර්ණ වෙත, ඒ වගේම තවත් ඕනෑම පරිසරයකදී මේ අසිමෝ ක්‍රියාත්මක කරවිය හැකිය. දුම්රිය ස්ථාන, කෞතුකාගාරවලට එහෙම ගියාම ජනතාව බය වන අවස්ථාද නැතුව නොවෙයි. තරප්පු නැග යාමට වගේම වෙනත් උස් ස්ථාන කරාද මේ රොබෝ මිනිසාට යාමේ හැකියාව තිබෙනවා. චලනය වන වස්තූන් හඳුනාගෙන ඊට ප්‍රතිචාර දැක්වීම සහ අංග චලනයෙන් එය ප්‍රකාශ කිරීමට මේ අසිමෝට පුළුවන්.

රොබෝ යැයි කී විගසින්, මනසට මැවෙන්නේ යකඩ සහ ලෝහවලින් සමන්විතව නිර්මාණය වූ යන්ත්‍රයක් වුවද මේ රොබෝ නම් යකඩ හෝ ලෝහවලින් තනා නැතැයි නොසිතෙන තරමට වඩාත් සුමට සහ මෘදු බවක් පෙන්නුම් කරනවා.

ජපානයෙන් ලොවට බිහිකළ මේ රොබෝ ලොව මිල අධිකම රොබෝ ලෙසත්, වඩාත් දියුණු ලෙස නිර්මාණය කළ රොබෝ ලෙසත් හැඳින්වෙනවා. මීට ටික කලකට පෙරදී මෙයාගේ මිල ලෙස සඳහන් වූයේ ඇමෙරිකානු ඩොලර් 250,000 ක මිලක්.

හොන්ඩා මෝටර් රථ සමාගමේ ප්‍රධාන ශාඛා කාර්යාලය සහිත ගොඩනැගිල්ල පිහිටි තෝකියෝවේ මිනාටෝ කු මිනාමි අඕයාටාහි වෙත ගියොත් මේ අපූරු අසිමෝ රොබෝගේ හැඩ වැඩ සියල්ල දැකගැනීමට පුළුවන්. අසිමෝ රොබෝගේ හැඩවැඩ ගැන ප්‍රකාශවන සංදර්ශන කිහිපයක්ද මෙහිදී පැවැත්වෙනවා.

ස්තූතිය - සංචාරක අනුග්‍රහය දැන්වූ Nicey Travels (රාජගිරිය) ආයතනයට

සටහන හා ඡායාරූප - සඳුන් ගමගේ