ජ්‍යෙෂ්ඨ මාධ්‍යවේදියකු, ලේඛකයකු කවියකු සහ ගත් කතුවරයකුද වූ වදාකඩ නවරත්න මහතා ඊයේ (8) අභාවප්‍රාප්ත විය.

මියයන විට 73 වැනි වියෙහි පසුවූ ඒ මහතා දූදරුවන් පස් දෙනකුගේ පියෙකි.

වදාකඩ නවරත්න මහතා දිනකර, සත්දින, මැදපෙරදිග සහ ලංකාදීප යන පුවත්පත්වල මාධ්‍යවේදියකු ලෙස කටයුතු කළ අතර ‘සත්දින’ පුවත්පතේ ප්‍රධාන කර්තෘවරයා ලෙස ද කලක් සේවය කළේය.
වවුල්කැලේ තීන්දුව, වැල්ලේ ලේ මල්, භීෂණයේ දිනපොත, වමේ වේදිකාවේ ​වෙඩි උණ්ඩය සහ තෙවන නැගිටීම යන නවකතා පාඨකයන්ට තිළිණ කළ වදාකඩ නවරත්න මහතා ‘සඳ’ නමැති කවි පත්‍රයේ කර්තෘවරයා ලෙසද කටයුතු කළේය.

ජනමාධ්‍යවේදියකු ලෙස කැපවීමෙන් කටයුතු කළ ඒ මහතා කලාභූෂණ සම්මානය ඇතුළු සම්මාන කිහිපයකින් පිදුම් ලැබීය.

එක්සත් ජාතීන්ගේ සහජීවන කවි සංවිධානයේ සභාපතිවරයා ලෙස හා තම්මැන්නා කවි සංවිධානයේ අනුශාසකවරයා ලෙස ද හෙතෙම කටයුතු කළේය

දේහය මීරිගම විජයරජදහනේ 156 දරන නිවසේ තැන්පත්කර ඇති අතර අවසන් කටයුතු පසුව දැනුම් දෙනු ඇත.

(***)