හොලිවුඩයට නවතම සිනමාපටයක් ලෙස එක් වන "Sully" සිනමාපටය හෙට (09දා) සිට තිරගත වීම ආරම්භ වීමට නියමිතය. ඇමරිකානු චරිතකතාමය වෘතාන්ත සිනමාපටයක් වන මෙම සිනමා නිර්මාණය "ක්ලින්ට් ඊස්ට්වුඩ්" ගේ අධ්‍යක්ෂණයෙන් සහ සම නිෂ්පාදනයෙන් නිර්මාණය වූවකි. 1549 දරණ යූ.එස් එයාවේස් ගුවන් යානය සහ එහි ගුවන් නියමුවකු වන "චෙස්ලි සුලෙන්බර්ගර්" වටා ගෙතුනු මෙම සිනමා පටයේ තිර රචනය "ටොඩ් කොමානිකී" විසින් රචනා කරන ලද්දකි.

මෙහි ප්‍රධාන චරිතය වන සුලෙන්බර්ගර්ගේ චරිතයට සුප්‍රකට නළු "ටොම් හෑන්ක්ස්" පණ පොවන අතර සෙසු චරිතවලින් ආරොන් එකාර්ට්, ලෝරා ලයිනි, ඇනා ගුන්, ඕටම් රීසර්, හෝලට් මැක් කැලනි, ජැමී ෂෙරිඩෑන් සහ ජෙරී ෆෙරාරා දායක වෙයි. 43 වැනි වාර්ෂික "ටෙලුරයිඩ්" සිනමා උලෙළේදී සැප්තැම්බර් 02 දින පැවැති මංගල දර්ශනයෙන් අනතුරුව හෙට (09දා) සිට ඇමෙරිකාවේ සිනමාහල්වලදී තිරගත වීමට නියමිත මෙම සිනමාපටයේ බෙදාහැරීමේ කටයුතු වොනර් බ්‍රදර්ස් සිනමා සමාගම සිදුකරයි. මිනිත්තු 96 ක පමණ කාල පරාසයක් ඔස්සේ දිවෙන මෙම සිනමාපටය ඉංග්‍රීසි බසින් නිර්මාණය වී ඇති අතර මේ සඳහා ඇ.ඩො මිලියන 60කට ආසන්න මුදලක් වැය කර තිබේ.

අනුෂි දන්තනාරායන