වැඩසටහන් ඉදිරිපත් කරන්නියක් ලෙස නිතර දකින ජාතික රූපවාහිනි නාළිකාවේ තේජානි විජේසිංහ මේ දිනවල බොහෝ දෙනෙකු අතරේ ජනප්‍රිය වී ඇත්තේ හඬකැවීම් ශිල්පිනියක ලෙසයි. ජනප්‍රිය විදෙස් ටෙලිනාට්‍යය කිහිපයකම ප්‍රධාන චරිත කිහිපයක් සඳහා සිය හඬ එක්කොට ඇති තේජානි හඬකැවීම් ශිල්පිනියක ලෙස වර්තමානය වනවිට දැඩි ලෙස කාර්යබහුලව සිටියි. ඒ පිළිබඳව 'සාරවිට'ට තේජානි පැවසුවේ මෙවැන්නකි.

"මේ දිනවල වැඩසටහන් ඉදිරිපත් කරන්නියකට වඩා මම හඬකැවීම් ශිල්පිනියක විදිහට තරමක් කාර්යබහුල වෙලා තියෙනවා. මොකද, මේ දිනවල හිරු නාළිකාවේ දිග හැරෙන 'ෆ්ලෑෂ්' කතාමාලාවේ 'ඩොක්ටර් කේට්ලියන්' විදිහටත්, එම නාළිකාවේම විකාශය වන 'ආදරේයි මං ආදරේයි' ඉන්දීය ටෙලිනාට්‍යයේ එන 'පිංකි' කියන චරිතයට මා හඬකවනවා. මේ චරිත දෙකම මේ නාට්‍යයවල ප්‍රධාන චරිතවලින් එකක් නිසා බොහෝ දෙනෙකුගේ මතකයේ තියෙනවා. පසුගිය කාලෙ නම් ප්‍රේක්ෂකයන් අතර ගොඩක් ජනප්‍රිය වුණ ටෙලිනාට්‍යය කිහිපයකටම මම හඬකැවීමෙන් දායක වුණා. ඒ චරිත ගැන මතක් කරනවා නම් දෙරණ නාළිකාවේ විකාශය වුණ 'boys over flowers' හි 'ගාවුල්' ලෙසත් 'The Heirs' හි 'ලී බෝ නා' ලෙසත් මම හඬකැවීම්වලට දායක වුණා. මේ දිනවල පොඩිත්තන් අතර ජනප්‍රිය 'සුටිං මාටිං', 'රොබයියා', 'බෙන් ටෙන්' වගේම '321 පෙන්ගුයින්' කියන කාටුන් වැඩසටහන් සඳහාත් මම දායක වුණා. ඉදිරියට තවත් මා දායක වුණ විදේශීය ටෙලිනාට්‍යය කිහිපයක්ම විකාශය වෙන්න තියෙන නිසා මේ දවස්වල ඒ දෙබස් කැවීම් කටයුතුවල නිරත වෙමින් සිටිනවා. ඊට අමතරව හැමදාම උදෑසන 6.00 ජාතික රූපවාහිනියේ විකාශය වන පුවත්පත් තොරතුරු පිළිබඳව කෙරෙන වැඩසටහනටත් දායක වෙනවා."