ජනිත් වික‍්‍රමගේ වගේම එයාගෙ මල්ලි සංකේත් වික‍්‍රමගේත් එයාලගෙ අම්මා ප‍්‍රවීණ රංගන ශිල්පිනී මානෙල් වානගුරුත් පසුගිය වසරේදී බොහෝම දුකින් කාලය ගතකළ බව කියන්න පුළුවනි. හැබැයි ඔන්න 2017 වසරේදී නම් අලූත් හුස්මක් අරගෙන සැනසිල්ලේ ජීවිතයට මුහුණ දීමේ අවකාශය උදාවෙලා. සුබ අලූත් අවුරුද්දක් වේවා කියන අරුත හොඳින්ම දැනෙන මොහොතක පසුගිය කාලයේ මුහුණ දුන් සිදුවීම් ගැන වගේම මේ වසරේ සැලසුම් කරලා තියෙන වැඩ කටයුතු ගැන සහ තවත් විස්තර කතා කරන්න ජනිත් සඳැල්ලට ආ විදියයි මේ.

ජනිත් මේ දිනවල කියන කරන වැඩ ගැන මුලින්ම සඳහනක් කළොත්?

කැලූම් පාලිත මහීරත්නගේ ”දේවිය සුගලා” නාට්‍යයේ රඟපානවා. ඊට අමතරව සුදත්ත තිලකසිරිගෙ ”මගේ කවිය” සහ ”මායාවී” නාට්‍ය ද්විත්වයෙහි රූගත කිරීම්වලට දායක වෙනවා. ඊට අමතරව හිරු ටිවී ”දාන්න පහක්” වැඩ සටහන මෙහෙයවනවා.

පසුගිය කාලයේදී බොහෝම දුකෙන් නේද හිටියේ?

ඇත්තෙන්ම ඔව්. අපේ තාත්තාගේ අසනීප තත්ත්වය නිසා අපි බොහෝම දුකෙන් හිටියේ. දෙයියන්ගේ පිහිටෙන් දැන් තාත්තාගෙ සෞඛ්‍ය තත්ත්වය ගොඩාක් හොඳයි. ගිය අවුරුද්ද ඉවර වෙන්න කියා තිබියදී චිත‍්‍රපටියක ආරාධිත අංගනයකටත් එක්වුණා. ඉතින් ඒක ඇත්තටම අපට හරි සතුටක්. ගිය අවුරුද්දෙ අපේ අම්මා, මම සහ මල්ලී බොහෝම කැපවුණේ තාත්තාව සනීප කර ගන්නයි. ඉතින් දැන් තාත්තාගේ සනීපවීම නිසා අපට ලොකු සතුටක් දැනෙනවා.

තාත්තා මොනවද කියන්නේ?

තාත්තාට බොහෝම සතුටුයි. පසුගිය කාලයේදී අසනීප තත්ත්වය නිසා තාත්තා සෑහෙන්න දුක් වින්දා. කොහොම වුණත් මේ ස්වභාවය යටතේ අපට මිනිස්සු ගැනත් ඉතා හොඳින් අවබෝධ කරගන්න පුළුවන් වුණා. අපි කිසි විටෙකත් නොහිතපු මිනිස්සු තමයි අපට උදව් කළේ. සුජීව නමැති තරුණයා ගැන විශේෂයෙන් සඳහන් කරන්න ඕනෑ. වකුගඩුවක් පරිත්‍යාග කළේ ඒ තරුණයායි. මේ සියලූ දේ අවසන අපේ පවුලේ බැඳීමත් පෙරටත් වඩා තව තවත් ශක්තිමත් වුණා.

ඒ වෙලාවේ ක්ෂේත‍්‍රයෙන් ලැබුණු සහයෝගය මොන වගේ ද?

හිටපු ජනාධිපතිතුමා පවා අපට උදව් කළා. ඒ වගේම ජයන්ත ධර්මදාස මහතාගේ නාමයත් විශේෂයෙන් මතක්කරන්න ඕනෑ. ඒ වගේ තවත් බොහෝ උදව් කළ අය හිටියා. නමුත් තාත්තාගේ අසනීප තත්ත්වය අපි මාධ්‍යයට ප‍්‍රචාරය කරන්න ගියේ නැහැ. ප‍්‍රදර්ශන, සංදර්ශන කරලා සල්ලි හොයමු කියන යෝජනා පවා ආවා. නමුත් අනවශ්‍ය විදියට අපට ඒ කිසි දෙයක් කරන්න අවශ්‍ය වුණේ නැහැ. කලාකරුවා හිඟන්නා කියන මතය විටෙක සමාජයේ පවතින දෙයක්. ඒ ත්තත්වයට වැටෙන්න අපි කැමැති නැහැ. අපි කොහොමහරි වැඬේ ගොඩදාගත්තා.

අම්මා මොනවද මේ දිනවල කරන්නේ?

අපේ පවුලේ වැඬේදි තාත්තාව ගොඩදාගන්න මායි, මල්ලියි දිවා රාත‍්‍රී නොබලා මහන්සි වෙලා වැඩ කළා. ඊට නොදෙවෙනිව අපේ අම්මා කැපවෙලා වැඩ කළා. පුදුම ධෛර්වන්ත කාන්තාවක්.

අලූත් වසරේ අලූත් බලාපොරොත්තු මොනවා ද?

වේදිකා නාට්‍යයක මුලින්ම රඟපෑවේ මගේම නාට්‍යයක් වූ ”මිනිස්ටාර්” නාට්‍යයේ. ඉන්පසුව වේදිකාවේ තවත් දායක වෙන්න නොසිතුවත් සුදත්ත තිලකසිරිගෙ අමුතු වැඩකට දායක වෙන්න ලැබුණා. ඒක බොහෝම ආසාවෙන් බාර ගත්තා. ඒ නාට්‍ය මාර්තුවලදී වේදිකාවට ඒවි. ඒ වගේම මම පස්වැනි වතාවටත් සංවිධානය කරන ලේ දන්දීමේ පිංකම මේ වසරේදීත් සංවිධානය වෙනවා. ඊට දායක වෙලා ලේ දන් දී මහා පුන්‍යකර්මයකට එක්වන්න කියා මගේ ආදරණීය රසික රසිකාවියන්ට ආරාධනා කරනවා.

දැන් නම් ගෙදරට ලේලියක් ඕනෑමයි කියා අම්මා කියන්නේ නැද්ද?

පසුගිය වසරේ තිබුණු තත්ත්වය එක්ක ඒ කිසි දෙයක් ගැන හිතුවෙ නැහැ. හරි වෙලාවට හරි කාලය ආවාම සියල්ල සිදුවේවි.

ඇයි ඔබ සහ මල්ලි එකට රඟ නොපාන්නේ?

දෙන්නාම කාර්යබහුලයි. අපි දෙන්නා එකට ඉඳල ෆොටෝ සූට් එකකට පෙනී සිටියෙත් බොහෝම අමාරුවෙන් දිනයක් දාගෙන. මම අම්මා, තාත්තා එක්ක රඟපාලා තියෙනවා. මල්ලි එක්කත් රඟපාන්න ඕනෑ. සමහරවිට මේ අවුරුද්දේ ඒ අවස්ථාවත් ලැබේවි.

සටහන සහ ඡායාරූප - සඳුන් ගමගේ