නිරූපණය ක්ෂේත්‍රයට නවකයෙකු වූවත් මේ වනවිට ඇය ලංකාවට කීර්ති නාමයක් රැගෙන විත් අවසානය. 2016 මිසිස් යුනිවර්ස් තරගයෙන් කිරුළ පැළදූ ඇය රෝෂි ප්‍රනාන්දු වෙයි. නැවතත් ඇය ශ්‍රී ලංකාව වෙත කිරුළක් ගෙන ඒමට උත්සහ දරණ අතර, ඒ පිළිබඳව කතා බහ කිරීමට "අද" සමග එකතු වූ මොහොතකි මේ.

ඔබ ගැන හැඳින්වීමක් කළොත්?

මගේ නම රෝෂි ප්‍රනාන්දු. මගේ පදිංචිය මොරටුව. වගේ වයස අවුරුදු 25යි.

ඔබ ක්ෂේත්‍රයට මුලින්ම යොමුවෙන්නේ?

මම මුලින්ම ක්ෂේත්‍රයට එන්නේ මිසිස් යුනිවර්ස් තරගයෙන් එහිදී මට ප්‍රථම ස්ථානය දිනා ගන්න අවස්ථාව ලැබුණා. එයින් තමයි මම ක්ෂේත්‍රයට මුලින්ම පිවිසුනේ.

ඒ සඳහා දායකවෙන්න ඔබට අවස්ථාව ලැබුනේ කොහොමද?

මම ඒ වෙද්දී නවසීලන්තයේ හිටියේ. මම දැක්කා අන්තර්ජාලයේ දැන්වීම් දාලා තියෙනවා. ඊට පස්සේ තමයි මම ඒකට අයදුම්පත් යොමුකළේ. ඉන් පස්සේ තමයි මාව මේ සඳහා තෝරාගනු ලැබුවේ.

මීට අමතරව ඔබ දායක වුන වැඩකටයුතු?

ඔව්, මම දැනට %චැනල් සී^ නිවේදිකාවක් ලෙස කටයුතු කරනවා. දැනට ටෙලිනාට්‍ය හා චිත්‍රපට සඳහා ආරාධනා ලැබිලා තියෙනවා. ඒ සඳහා ලබන අවුරුද්දේ දායක වීමට බලාපොරොත්තුවෙන් ඉන්නවා.

නිවේදිකාවක් ලෙස ඔබ ලබන අත්දැකීම?

මම දැනට කටයුතු කරන්නේ %චැනල් සී^ එකත් එක්ක. මුලින්ම මගේ ස්ක්‍රීන් ටෙස්ට් එකක් තිබ්බා. ඉන් පසුව මම වැඩසටහන් දෙකක් විතර කළා. මගේ ඉදිරිපත්කිරීම හොඳයි කියලා කිව්වා. ඒ නිසා මට නිවේදිනය පිළිබඳවත් කැමැත්තක් ඇති වුණා.

ඔබ නිවේදනය පිළිබඳ හැදෑරීමක් කරලා තියෙනවාද?

මම පාසලේදී නිවේදන කටයුතු කරලා තියෙනවා. විවිධ උත්සවවල නිවේදන කටයුතු කරලා තියෙනවා. මම ඊට අමතරව විවිධ වැඩසටහන් කළමනාකරණ කටයුතු කරනවා. ඒ නිසා නිවේදනය හා කැමරාවට මුහුණදීම මට අලුත් අත්දැකීමක් වුනේ නැහැ. නිවේදනය පිළිබඳව තවත් ඉගෙන ඉදිරියට යන්න තමයි මගේ අදහස.

ඔබගේ වෘත්තීය?

මම කලින් කළේ සංචාරක ක්ෂේත්‍ර‘යේ රැකියාවක්. ඊට අමතරව මම කේක් ආකෘති නිර්මාණ ශිල්පිණියක්. දැනට නිරූපණය හා නිවේදන කටයුතුවල තමයි දැනට යොමුවෙලා ඉන්නේ. නිවේදන කටයුතුවලින් ඉදිරියට යන්න ගොඩක් කැමතියි.

ඔබට වෙළෙඳ දැන්වීම්වලට දායක වෙන්න අවස්ථාවක් ලැබුණද?

ඔව්. කොමර්ෂල් බැංකුවේ වෙළෙඳ දැන්වීමක් සඳහා දායක වුනා. එය බොහෝ දුරට නව වසරේදී ප්‍රචාරය වෙයි. ඊට අමතරව මම "ෆැෂන් බග්" ආයතනයේ නිරූපිකාව ලෙස කටයුතු කරනවා.

ඔබ කිව්වා චිත්‍රපට හා ටෙලිනාට්‍ය සඳහා ආරාධනා ලැබිලා තියෙනවා කියලා, ඔබ රඟපෑමට යොමුවෙන්න හිතුවේ ඇයි?

මම කවදාවත් හිතුවේ නැහැ රංගනයට යොමුවෙන්න අවස්ථාව ලැබෙයි කියලා. නමුත් ආරාධනා ලැබුන නිසා ඉදිරිපත් වෙලා බලනවා. ඒ ක්ෂේත්‍රය හොඳයි කියලා හිතුනොත් ඒ පැත්තෙනුත් ඉදිරියට යන්න සහ මගේ රංගන හැකියාවනුත් දැකගන්න පුළුවන් වේවි.

ඉදිරි බලාපොරොත්තු මොනවාද?

පෙබරවාරි මාසේ ඇමරිකාවේදී "මිස් ඉන්ටර්නැෂනල්" පැජන්ට් එක් තිබෙනවා. මම එහි ශ්‍රී ලංකාව නියෝජනය කරමින් සහභාගීවෙනවා. දැනට මම ඒ සඳහා සූදානම් වෙමින් ඉන්නේ. ඒ නිසා මේ දිනවල එහි කටයුතුත්ත එක්ක ටිකක් දුරට කාර්යය බහුල වෙලා ඉන්නේ

මතක් කළ යුතු පිරිසක් ඉන්නවාද?

මගේ පවුලේ අය මතක් කරන්න ඕන. විශේෂයෙන්ම මගේ "Husband" ගෙන් ලොකු උදව්වක් ලැබෙනවා. "චැනල් සී" එක මතක් කරන්න ඕනෙ. ඒ ගොල්ලන් අලුත් අයට ගොඩක් අතහිත දෙනවා. ඒ නිසා තමයි මට නිවේදනට යොමුවෙන්න අවස්ථාව ලැබුනෙ. ඒ වගේම මේ තරම් දුර එන්න මට අතහිත දුන්නු හැමෝටම ස්තූති වන්ත වෙනවා.

ඩිලාන් ක්‍රිෂාන්ත / ඡායාරූප - චාමර ලක්රුවන් රණසිංහ