තවත් පූජනීය චරිතයකට ජීවය දෙමින් පූජා යළිත් අප අතරට එන්නේ මැයි 5 වැනි සිකුරාදා සිට තිරගතවන මහාචාර්ය සුනිල් ආරියරත්නයන්ගේ "පත්තිනි" සිනමා නිර්මාණය හරහාය. සීතල නුවරඑළියේදී අපි පූජා සෙනෙහෙබර කතාබහකට සම්බන්ධ කර ගත්තේ ඒ පිළිබඳව ඇගේ අදහස් අසා දැනගැනීමටය.

පූජාට "පත්තිනි" වෙන්න ලැබුණු හැටි මතකද?

ඔව්, ඒ වනවිට මම සුනිල් සර්ගේ "කුස පබා* චිත්‍රපටයේ වැඩ කරමින් හිටියෙ. ඒ කාලෙම මාත් එක්ක වැඩ කළ ජැක්සන් අයියා දස්කොන් කරන බවත් කීවා. එහි ඇති ඉන්දියානු පසුබිම නිසා මට එහි ප්‍රධාන චරිතයක් කරන්න ආරාධනා කළා. ඒත් "පත්තිනි" පිළිබඳව තිබුණු ඉන්දියානු නෑකම මම දැනගෙන හිටියෙ නැහැ. අපි දැනගෙන හිටියේ "කන්නගී*ගේ කතාව විතරයි. කන්නගීගේ පිළිරැව චෙන්නායිවල ප්‍රකට දේශපාලන නායකයින්ගේ පිළිරූ ආශ්‍රීතව තිබෙනවා අපි දැකලා තියෙනවා. ඇයට ඒ රටේ හිමිවෙන්නෙ පූජනීය ස්ථානයක්. ඒත් කන්නගී "පත්තිනි" ලෙස ලංකාවෙ දේවත්වයෙන් සළකන බව මම දැනගත්තෙ පස්සෙ.

ඒ බව දැනගත්තම ඔබ ඒ චරිතය කරන්න කැමති වුණාද?

නැහැ... බොරු නම් අහලා බලන්න මම සුනිල් සර්ට කිව්වා සිංහල සිනමාවට අලුත් මුහුණක් අවශ්‍ය මේ වගේ කාලෙක ඇයි නවක නිළියක් මේකට නොගන්නෙ කියලා. ඔහු ඒ අදහස ප්‍රතික්ෂේප කළාම මම ඔහුට තවත් විකල්ප යෝජනා කළා. ඒත් ඒ කිසිම දේකට ඔහු කැමති වුණේ නැහැ. අවසානෙදි මට ඒ චරිතය කරන්න වුණා.

ඒ චරිතයේ ඔබ දකින සුවිශේෂිතා මොනවද?

ජීවිතයේ සියලුම අභියෝගයන්ට ධෛර්යයෙන් හා දැඩි විශ්වාසයෙන් මුහුණ දෙමින් ඇය ප්‍රකට කළ ශක්තිය හා ප්‍රබලතාවය තමයි ඇය තුළ දුටු ප්‍රධානම ගුණාංගය. සියලුම බාධක හමුවේ ඇය සිය සැමියා සමඟ ආදරෙන් බැඳී සිටියදී, ඔහු ඇය දේවේශසහගත ලෙස අත්හැර දැමීම, ඇයගේ සියලුම වස්තූන් සොරකම් කිරීම, වෙනත් ගැහැනියක හා ඇසුරකට පැටලී ඒ තුළින් දරුවකුට පියකුවීම මේ සියලුම දේවල් හමුවේ ඇය නොසැලී සිටීම පමණක් නොව අවසානයේදී ඔහු යළිත් ඇය වෙත එද්දී ඔහු නැවතත් භාර ගැනීමට තරම් ඇය තුළ තිබුණු ඒ දයාවේ හා කරැණාවේ මහිමය, කාන්තාවක් ලෙස මම අගේ කරනවා.

මේ කතාව ඔබ දැන සිටි "කන්නගී" කතාවට සමානද?

සුනිල් සර් මේ කතාව ඉතාම ආකර්ෂණීය ලෙස ලියා තිබෙනවා. චරිත ඉතාම ලස්සට ගොඩනඟා තිබෙනවා. ඇත්තටම අපි දැන සිටි කන්නගීගේ කතාවෙන් ඔබ්බට ගොස් මනිමේඛලාගේ හා මාධවීගේ භූමිකාවන්වල සහයෝගයත් සමඟ ඔහු මේ කතාවට අලුත් අරුතක් ලබාදී තිබෙනවා.

"පත්තිනි" නැතහොත් "කන්නගී" චරිතය තුළින් අපේ කාන්තාවන්ට උකහා ගත හැකි ගුණාංග තිබෙනවාද?

අනිවාර්යයෙන්ම. දේවත්වයෙන් සැළකෙන කොටස්වලින් බාහිරව බැලුවත්, ඇය කාන්තාවන්ට දැඩි ආදර්ශයක් වී තිබෙනවා. විශේෂයෙන් අපේ රට තුළ වගේම ආසියානු රටවල්වල පවුල් සංස්ථා තුළ අපි ප්‍රධාන වශයෙන් දකින්නෙ කාන්තාවන්ගේ තිබෙන ඉවසීමේ ගුණය වගේම තමන් ගැන නොසිතා අනුන් ගැන සිතන ගුණාංගය. ඇය හරියට පවුලක් එක පුරුකක් ලෙස යාකර තබන මැලියමක් වගේ. ඒත් අපේ කාන්තාවෝ තමන්ගේ වටිනාකම් තේරුම් ගෙන වැඩ කරනවා අඩුයි. ඔවුන්ගේ ප්‍රමුඛතා ලැයිස්තුවේ ඇයට හිමිවෙන්නෙ අවසාන ස්ථානය. ඒත් අපි අපේ වටිනාකම් හඳුනාගෙන, අපේ ශක්තිය, අපේ බලය ගැන විශ්වාසයක් තබාගෙන අපි ගැන අවධානය යොමු කළ යුතුයි. තමන් තමන්ට ආදරේ නොකර කොහොමද තම ස්වාමියාට හෝ දරුවන්ට ආදරේ කරන්නෙ. ඒ සඳහා ඇය හොඳ ශරීර සෞඛ්‍යයෙන් යුක්ත වෙන්න ඕනෙ.

ඔබේ ජීවිතයටත් මේ තුළින් ඔබ යමක් උකහා ගත්තාද?

ඔව්... මම ඒ පිළිබඳව දෙවියන් වහන්සේට අනේක වාරයක් ස්තූතිවන්ත වෙනවා. හෙට දිනයේ මවක්, මිත්තනියක් ලෙස කටයුතු කිරීමේදී පවුල් සංස්ථාව තුළ අපි හැසිරිය යුතු ආකාරය ගැන පාඩම් ගොඩක් මම මේ තුළින් ඉගෙන ගත්තා.

අවසානයේදී "කන්නගී"ගේ ශාපය නිසා නගරයක්ම ගිනිබත් වෙනවා?

මම ආශිර්වාද ගැන විශ්වාස කළාට ශාප කිරීම් ගැන පෞද්ගලිකව විශ්වාස කරන්නෙ නැහැ. තමන්ගෙ හිතට එකඟව හොඳින් ජීවත් වෙන කෙනෙක් නම් ඒ ශාප කිරීම් ඔබ අසලටවත් එන්නෙ නැහැ. ඒවා ඇතැම් විට ආශිර්වාද බවට පත්වෙනවා.

ඔබ "පත්තිනි" චිත්‍රපටය මීට කලින් නරඹා තිබෙනවාද?

නැහැ මම තාම චිත්‍රපටය බලලා නැහැ. ඒත් එය ලස්සන එකක් බවට නම් දැඩි විශ්වාසයක් තිබෙනවා. එහි නිර්මාණවේදී සුනිල් සර්ගේ ප්‍රතිභාව නිසා. සුනිල් සර්, ජැක්සන් අයියා, සෝමේ අයියා (සෝමරත්න දිසානායක) කියන්නෙ මේ ක්ෂේත්‍රයේ මට හමුවුණු මහා ප්‍රතිභාවන්තයෝ. ඕනෑම ප්‍රශ්නයක් ඇහුවත් ඒවාට ක්ෂණිකව නිසි පිළිතුරු දෙන්න තරම් දැනුමෙන් ඉතාම පොහොසත් චරිත. &පත්තිනි* චිත්‍රපටයට දායක වෙන්න ලැබීම මම විශාල භාග්‍යයක් කොට සලකනවා.

ඔබ මෙහි රඟපාන්නෙ "කෝවලන්" චරිතයට පණ පොවන උද්දික ප්‍රේමරත්න සමඟ?

ඔව්... උද්දික විශිෂ්ට නළුවෙක්. දර්ශන තලයේදී මගේ චරිතයට අදාළ දෙබස් උච්චාරණය වගේම අවශ්‍ය සියුම් අංගචලනයන් වගේ දේවල් ගැනත් කියා දුන්නෙ. ඔහුත් කණ්ඩායම් හැඟීමෙන් වැඩ කරන දක්ෂ රංගන ශිල්පියෙක්.

නාන් කඩවුල්, විඩියුම් මුන් වැනි චිත්‍රපටවලට ඉන්දියාවේ හා විදෙස් රටවලින් ඔබට හොඳම නිළියට හිමි සම්මාන ලැබී තිබෙනවා. ලංකාවෙ සම්මානයක් නොලැබීම ගැන දුකක් නැද්ද?

කිසිම දුකක් නැහැ. මොකද මම වැඩ කරන්නෙ සම්මාන ලබා ගන්න නෙවෙයි. මම ඒ තරගයේ කොහෙත්ම නැහැ. මට කිසිම කෙනෙක් එක්ක තරග කරන්න අවශ්‍ය නැහැ. මගේ තරගය තියෙන්නෙ මාත් එක්ක. ඒ හොඳ මනුෂ්යෙක් ලෙස ජීවත් වීමේ අභියෝගය ජය ගන්න. මම කැමති හැමෝම එක්ක සහයෝගයෙන් වැඩ කරන්න. කෙනෙක් මම ළඟට ඇවිත් &පූජා ඔයා හරි හොඳ කෙනෙක්, හොඳ මනුෂ්යයෙක්* කියලා කිව්වොත් ඒ තමයි මම ලබන ඉහළම සම්මානය. ඒවා මුදලට හෝ බලයට ගන්න බැහැ.

ඔබට ඉන්දියාවෙන් ලැබෙන ඇරයුම් කොහොමද?

ගොඩක් ඇරයුම් ලැබුණත් මා උපන් මේ රටට මම ගොඩක් ආදරෙයි. මම ලංකාවට හිත දීලා ඉවරයි. මේ වගේ ලස්සන මිනිස්සු ඉන්න සුන්දර රටක් මේ ලෝකෙම නැතුව ඇති.

රමේෂ් උවයිස් සේයාරෑ | සන්දේශ් බණ්ඩාර