පැනමා රාජ‍්‍යයේ මොසැක් ෆොන්සේකා සමාගමේ ආධාරයෙන් බදු ගෙවීම් පැහැරීම කළු සල්ලි සුදු කිරීම ඇතුළු නීති විරෝධී මූලය කටයුතුවල නිරත වූ ලෝක නායකයන්, ප්‍රකට පුද්ගලයන් , ව්‍යාපාරිකයන් සහ සමාගම්වල විස්තර ප්‍රසිද්ධියට පත්කිරීමට  ගවේශනාත්මක මාධ්‍යවේදීන්ගේ අන්තර්ජාතික සන්සදය නව වැනිදා රාත්‍රී (ලංකා වේලාවෙන්) පියවර ගත්තේය.

ඒ අනුව ලාංකිකයන් 21 දෙනකුගේ නම් එහි පැහැදිලිව ඇත. එහෙත් ශ්‍රී ලංකාව ලිපිනය වශයෙන් දුන් සෑහෙන පිරිසක් ද එහි සිටින බව කියති.

එම පිරිස අතර පසුගිය වකවානුවේ වැඩි කතාබහට ලක්වූ කිහිප දෙනකුගේ නම් ද සඳහන්වී තිබේ. ප්‍රසිද්ධ ආරක්ෂක සමාගමකට සම්බන්ධ බව කියන හතර දෙනකුගේ නම් එහි දක්වා තිබේ.

සමාගම් තුනක ද, අතරමැදියන් බව කියන හත් දෙනකුගේ හා ලිපින 53ක තොරතුරුද එහි ඇතුළත්වේ.

ඉන්දියාවේ පුද්ගලයන් 1046 දෙනකුගේ ද, ලිපින 828ක ද විස්තර එම ලැයිස්තුවේ සඳහන්ය.

ශ්‍රී ලංකාවේ නීතියට පටහැනි පැනමාවේ කෝටි ගණන් මුදල් තැන්පත් කළැයි කියන ශ්‍රී ලාංකික ගිණුම් හිමියන් 60 දෙනකුගේ තොරතුරු හෙළිවී ඇති හෙයින් වහාම පරීක්ෂණ අරඹන්නැයි දූෂණ විරෝධී පෙරමුණේ කීර්ති තෙන්නකෝන් කියයි. ශ්‍රී ලංකාවේ ආරක්ෂක සමාගමක්, හෝටල රන් අබරණ ඇඟළුම් හා බුකී කර්මාන්ත වලට සම්බන්ධ ශ්‍රී ලාංකිකයන් 65 දෙනකුගේ ගිණුම් හා ලිපින 51 ක් එහි ඇතැයි ඔහු කියයි. හිටපු සංස්ථා සභාපතිවරයකුගේ නමක්ද එහි ඇත.

රට සල්ලි පිළිබඳ ශ්‍රී ලංකා නීතියෙන් රිංගා ශ්‍රී ලංකාවේ මහත්වූ ධනස්කන්ධයක් හොරෙන් පැනමාවට යැවූ පුද්ගලයන් සොයා බලන අතර එම ධනස්කන්ධය රටට ලබාගැනීමට ක්‍රියා කළ යුතු බවත් ඔහු කියයි. 

(අයිසීඅයිජේ වෙබ් අඩවිය ඇසුරෙනි)

https://offshoreleaks.icij.org/search?c=LKA&cat=1&e=&j=&q=&utf8