මහනුවර පල්ලෙකැළේ ක‍්‍රීඩාංගණයේ පැවැත්වෙන ශ්‍රී ලංකා ක‍්‍රිකට් සභාපති කුසලාන දේශිය තුන්කොන් ක‍්‍රිකට් තරගාවලියේ අද (17) පැවැති තරගයේදී (දිවා/රාත‍්‍රි) ඇන්ජලෝ පෙරේරාගේ නායකත්වයෙන් යුත් ශ්‍රී ලංකා ‘ඒ’ පිල ලකුණු 139 කින් දිනේෂ් චන්දිමාල් මෙහෙයවන ශ්‍රී ලංකා (සෙසු) පිල පරාජය කිරීමට සමත් විය.

ශ්‍රී ලංකා ‘ඒ’ පිල ලකුණු 79 කට කඩුලූ 4 ක් බිඳ වැටී තිබියදී අෂාන් ප‍්‍රියංජන් (නොදැවී 136) සහ ඇන්ජලෝ පෙරේරා (112) පස්වැනි කඩුල්ල වෙනුවෙන් 224 ක සම්බන්ධතාවක් පැවැත්වීමට සමත් වූහ.

අෂාන් ප‍්‍රියංජන් වේගවත් ඉනිමක් ක‍්‍රීඩා කරමින් පන්දු 99 කදී හතරේ පහර 15 ක් සහ හයේ පහර 5 ක් සමගින් නොදැවී ලකුණු 136 ක් රැස් කිරීමට සමත් විය. ඇන්ජලෝ පෙරේරා පන්දු 97 කදී හතරේ පහර 8 ක් සහ හයේ පහර 3 ක් සමගින් ලකුණු 112 ක් රැස් කළේය.

ශ්‍රී ලංකා ‘ඒ’ පිල  ඕවර 50 යේදී කඩුලූ 5 ට 325 (නිරෝෂන් දික්වැල්ල 30, ඇන්ජලෝ පෙරේරා 112, අෂාන් ප‍්‍රියංජන් නොදැවී 136, ශාමින්ද එරංග 50/2)

ශ්‍රී ලංකා (සෙසු) පිල  ඕවර 40.5 කදී සියලූ දෙනා දැවී 186 (කුසල් මෙන්ඩිස් 33, ළහිරු තිරිමාන්න 42, ඩිල්රුවන් පෙරේරා 27, මිලින්ද සිරිවර්ධන 35, ශාමින්ද එරංග නොදැවී 20, සුරංග ලක්මාල් 43/2, රමිත රඹුක්වැල්ල 43/3, උදාර ජයසුන්දර 17/2)