අග‍්‍රාමාත්‍යවරයාගේ ඉල්ලීම පරිදි සිංගරාසා නඩු තීන්දුව අවලංගු නිරීමට කථානායකවරයා පියවර ගැනීම වළකාලන අතුරු නියෝගයක් නිකුත් කරන ලෙසද ,කථානායකවරයාට ශ්‍රේෂ්ඨාධිකරණ තීන්දු අවලංගු කිරීමට බලයක් නොමැති බව ප‍්‍රකාශ කරන ලෙසද ඉල්ලා නීතීඥවරයෙකු ශ්‍රේෂ්ඨාධිකරණය හමුවේ පෙත්සමක් ගොනු කර ඇත.

නීතීඥ නාගානන්ද කොඩිතුවක්කු මහතා විසින් ගොනු කර ඇති මෙම පෙත්සමෙහි වගඋත්තරකරුවන් ලෙස නීතිපති ,අගමැති ,කථානායකවරයා නම් කරනු ලැබ සිටිති.

ගොනු කර ඇති පෙත්සමේ මෙසේද සඳහන් වේ

පසුගිය ජූලි 07 වැනි දින අග‍්‍රාමාත්‍යවරයා විසින් පාර්ලිමේන්තුවේ පැවති විවාදයකදී ශ්‍රේෂ්ඨාධිකරණය මඟින් ප‍්‍රකාශිත සිංගරාසා නැමැති නඩු තීන්දුව අවලංගු කරන ලෙස කථානයකවරයාගෙන් ඉල්ලීමක් කර තිබේ.

මෙම නඩු තීන්දුව මඟින් විදේශ අධිකරණයන්හි හෝ ආයතන වල නියෝග ක‍්‍රියාත්මක කිරීමට ශ්‍රී ලංකා අධිකරණය බැඳී නොමැති බව ප‍්‍රකාශ කර ඇත.

අග‍්‍රාමාත්‍යවරයාගේ මෙම ප‍්‍රකාශයෙන් ආණ්ඩුක‍්‍රම ව්‍යවස්ථාවේ 3 වැනි වගන්තියෙන් ප‍්‍රකාශිත ජනතාවගේ සෙවරීභාවය සෘජුවම උල්ලංඝනය වේ.

ඊට අමතරව ආණ්ඩුක‍්‍රම ව්‍යවස්ථාවේ 14 (1) (ඉ) වගන්තියෙන් සහතික මූලික අයිතිවාසිකමද උල්ලංඝනය වීම සිදුවේ.

එබැවින් මෙම පෙත්සම විභාගයට ගැනීමට අවසර ලබා දෙන ලෙසද මෙම පෙත්සම විභාගයට ගෙන අවසන්වන තුරු මේ සම්බන්ධව කිසිදු පියවරක් ගැනීම වළකාලමින් කථානායකවරයාට එරෙහිව අතුරු නියෝගයක් නිකුත් කරන ලෙසද පෙත්සම්කරු ඉල්ලා සිටී.තමන්ගේත් ,ජනතාවගේත් මූලික අයිතිවාසිකම් කඩවී ඇති බව ප‍්‍රකාශ කරන ලෙසද ,කථානායකවරයාට ශ්‍රේෂ්ඨාධිකරණ නඩු තීන්දුවක් අවලංගු කිරීමට බලයක් නොමැති බව ප‍්‍රකාශ කරන ලෙසද පෙත්සම්කරු සිය පෙත්සමින් ඉල්ලා ඇත.

සිංහරාසා පූජකවරයා කොටි හිතවාදියකු බව නඩුවේදී කියැවිණි.