අහස උසට යන ඉඩම් මිල, අපේ රටේ බොහෝදෙනාට ප‍්‍රශ්නයක් වී ඇතත්, සමහර බලවතුන්ට කෝටි සිය ගණන්වල ඉඩම් ගනුදෙනු ඉතා සාමාන්‍ය බව දේවල් බව හෙළිදරව් වෙමින් ඇත. ජනතාවගේ ඇස්වලට වසන් වී, ඉතා මෑතකදීත් රුපියල් කෝටි 230ක සුපිරි ඉඩම් ගනුදෙනුවක් කොළඹදී සිදුවී ඇති බව වෙත වාර්තාවේ.

බම්බලපිටිය නගරය මැද, විශාල ඉඩමක් පසුගියදා රු.2,300,000,000/-කට මිලදීගත්තේ කවුද? මෙහි අබිරහස් අන්දමින් ළහිළහියේ ඉදිකරන්නේ කුමක්ද? මෙවැනි මහාපරිමාණ ගනුදෙනු සිදුවීම සාධාරණදැයි ශ‍්‍රී ජයවර්ධනපුර කෝට්ටේ ප‍්‍රදේශයේ සුවිසල් නිවසකදී, ප‍්‍රබලයන් පිරිසක් මෑතකදී රහසේ කතාබහ කළ බවද වෙත වාර්තාවේ.

බම්බලපිටිය දුම්රියපොළ පාරේ, යුනිටි ප්ලාසා පිටුපස - මැජෙස්ටික් සිටි ඉදිරිපිට ඇති මේ දැවැන්ත ඉඩම ඇත්තේ පොලිස් ස්ථානයටත් අතේදුරෙනි. දිවා රෑ දෙකේම බොහෝ යන්ත‍්‍රසූත‍්‍ර හා බරවාහන ක‍්‍රියාත්මක වෙමින් එහි දැවැන්ත ඉදිකිරීමක් කළත්, මේ කිසිවක් මහජනතාවට දැකගත නොහැකි බවත් වාර්තාවේ. මෙම ස්ථානයට කිසිම මාධ්‍ය ආයතනයකට හෝ පුද්ගලයෙකුට ඇතුලූවීමට නොහැකිවන සේ, පැය විසි හතර පුරා ඉහළපෙළේ ආරක්ෂා සේවාවක් යොදවා ඇත.

මේ ගැන මුලසිටම විමසිල්ලෙන් සිටින ත‍්‍රීරෝද රථ රියදුරෙකු ප‍්‍රකාශ කළේ, එක්තරා පුද්ගලයෙකු වීදුරු කඵ පැහැගැන්වූ අතිසුපිරි වාහනයකින් නිතර නිතර එන බවත්, ඔහු කඵ කන්නාඩි පැළඳසිටින බවත් ය. ඔහු විදේශිකයෙකු වියහැකි බවත් ත‍්‍රීරෝද රථ රියදුරා සැක පළකළේය. කෙසේවෙතත් මෙම ඉදිකිරීමට ‘ජපන් පෙනුම’ ඇති පුද්ගලයන්ද සම්බන්ධ බව හෙළිදරව් වී ඇත (ඔවුන් චීන ජාතිකයන් නොවන බව තහවුරු කරගෙන ඇත).

මෙය ‘ශ‍්‍රී ලංකාවේ උසම ඉදිකිරීම බවත්, ලෝකයේ ඉහළම තාක්ෂණික හා ‘තරු හතේ’ සුඛෝපභෝගී පහසුකම් සහිතව ඉදිකරන බවත් පමණක්‘, නම සඳහන් කිරීමට අකමැති වූ ශ‍්‍රී ලාංකික බරයන්ත‍්‍ර කි‍්‍රියාකරවන්නෙකු අප සමග හෙළිකර තිබිණ. එ් බව තහවුරු කරන තව බොහෝ කරුණු හෙළිදරව් කරගනිමින් සිටී (ළගදීම මෙම තොරතුරු සාක්ෂි සමග හෙළිකිරීමට අපි සූදානම්).

අනාවරණය කරගෙන ඇති අන්දමට, මෙම ගොඩනැගිල්ලේ ‘රූෆ්-ටොප්’ හෙලිකොප්ටර් අංගනයක්ද ඉදිකිරීමට පිඹුරුපත් සකසමින් සිටී. එතරම් රහසිගතව - ජනතාවට නොපෙනී ‘යන්න-එන්න’ සැරසෙන බලවතුන් කවුද? මෙවැනි ඉහළම තාක්ෂණික හා ‘තරු හතේ’ සුඛෝපභෝගී ගොඩනැගිල්ලක් අපේ රටට අවශ්‍යද? කොළඹ සමාජයේ ඉහළම ධනවතුන්ට හා බලවතුන්ට පමණක් විවෘත මෙවැනි ස්ථාන ඉදිකිරීමට ඉඩදීම, ශ‍්‍රී ලංකාව වැනි රටකට සුදුසුද?

මේ අභිරහස් ඉදිකිරීම ගැන අපි අවදියෙන් සිටින බව මතක් කරමු.