(මනෝප්‍රිය ගුණසේකර)

 
බස්නාහිර පළාත් ආණ්ඩුකාරවරයා ඇතුළු 06 දෙනෙකුට ලබන ඔක්තෝම්බර් 06 වැනිදා අධිකරණයේ පෙනී සිටින ලෙස නියම කරමින්  කොළඹ මහාධිකරණ විනිසුරු ප්‍රදීප් හෙට්ටිආරච්චි මහතා අද (21)  නොතිසි නිකුත් කළේය.
 
අඩු ආදායම්ලාභීන් අතර බේදා දීම සඳහා සෙවිලි තහඩු මිලදී ගැනීමේදී මුල්‍ය අක්‍රමිකතාවයක් කළ බවට හෝමාගම ප්‍රාදේශීය සභාවේ සභාපතිවරයාට එරෙහිව හෝමාගම බදු ගෙවන්නන්ගේ සංගමය විසින් පවරා ඇති පෙත්සමක් විභාග කිරීමට තීරණය කළ  විනිසුරුවරයා මොවුන්ට නොතිසී නිකුත් කළේය.
 
බස්නාහිර පළාත් ආණ්ඩුකාර හිටපු ගුවන් හමුදාපති මාර්ෂල් ඔෆ් ද එයාර් ෆොස් රොෂාන් ගුණතිලක මහතාට අමතරව මෙලෙස නොතිසි නිකුත් කරන ලද්දේ හෝමාගම ප්‍රාදේශීය සභාව, හෝමාගම ප්‍රාදේශීය සභාවේ සභාපති සම්පත් චමින්ද ජයසිංහ, එහි ලේකම්වරයා, බස්නාහිර පළාත් පාලන කොමසාරිස් සහ එහි සහකාර කොමසාරිස්වරයාටය.

හෝමාගම බදු ගෙවන්නන්ගේ සංගමයේ සභාපති ගමගේ විජේරත්න මහතා විසින් ගොනු කර ලද පෙත්සමක් සලකා බැලූ අවස්ථාවේදී ඉදිරිපත් වු කරුණු සැළකිල්ලට ගනිමින් විනිසුරුවරයා එලෙස නොතිසි නිකුත් කළේය.
 
හෝමාගම ප්‍රාදේශීය සභා බලප්‍රදේශයේ පදිංචි අඩු ආදායම්ලාභීන් අතර සෙවිලි තහඩු බේදාදීමට 2019 වසරේදී හෝමාගම ප්‍රාදේශීය සභාව ගත් තීරණයකට අනුව වගඋත්තරකාර එම ප්‍රාදේශීය සභාවේ සභාපති සම්පත් චමින්ද ජයසිංහ විසින් සෙවිළි තහඩු 1040 මිලදී ගෙන ඇතැයි සඳහන් කරන පෙත්සම්කාර හෝමාගම බදු ගෙවන්නන්ගේ සංගමයේ සභාපති ගමගේ විජේරත්න මහතා එලෙස සෙවිලි තහඩු මිලදී ගැනීමේදී වගඋත්තරකරු විසින් එක් සෙවිලි තහඩුවකින් රුපියල් 380/-ක මුදලක් වංචා කොට ඇතැයිද සඳහන් කොට ඇත.
 
මෙම සෙවිලි තහඩු මිලදී ගැනීමේ ක්‍රියාවලිය සම්බන්ධයෙන් බස්නාහිර පළාත් පාලන සහකාර කොමසාරිස්වරයා විසින් කරන ලද පරීක්‍ෂණයකදී අදාළ සෙවිලි තහඩු මිලදී ගැනීම ක්‍රියාවලිය තුළ අවිධිමත්භාවයක් පෙන්නුම් කරන බව අනාවරණය වී ඇතැයි සඳහන් කරන පෙත්සම්කරු මෙම තත්ත්වය බස්නාහිර පළාත් සභාවේ 1991 අංක 4 දරන පළාත් පාලන ආයතනවල පරිපාලනය අධීක්ෂණය කිරීමේ බලය පිළිබඳ ප්‍රඥප්තියේ 2.1 වගන්තිය යටතේ වරදක් වන බවද සඳහන් කොට ඇත.
 
එවැනි වරදක් කරන පළාත් පාලන ආයතන ප්‍රධානියෙකුට එරෙහිව පරීක්ෂණයක් පවත්වා ඔහු ධුරයෙන් ඉවත් කිරීමට හෝ අදාළ පළාත් පාලන ආයතන විසුරුවා හැරීමට අදාළ පළාත් සභාවේ පළාත් පාලන විෂයභාර අමාත්යවරයාට බලය පැවරෙන බවද සඳහන් කරන පෙත්සම්කරු ඒ අනුව හෝමාගම ප්රාදේශීය සභාවේ සභාපතිවරයාගේ මෙම අකාර්යක්ෂම හා අයථා පාලනය පිළිබඳව විශ්‍රාමික අධිකරණ නිලධාරීයෙකු පත්කර විමර්ශනයක් පවත්වන ලෙස පළාත් ආණ්ඩුකාර වරයාට නියෝගයක් නිකුත් කරනනැයි ඉල්ලීමක්ද කොට ඇත.
 
එම විමර්ශනයේ වාර්තා පදනම් කරගෙන වගඋත්තරකාර සභාපතිවරයා එම තනතුරෙන් ඉවත් කිරීමේ නියෝගයක් නිකුත් කරන්නැයි පෙත්සම්කාර හෝමාගම බදු ගෙවන්නන්ගේ සංගමයේ සභාපති ගමගේ විජේරත්න මහතා අධිකරණයෙන් ඉල්ලීමක්ද කොට ඇත.
 
 ඉදිරිපත් වු කරුණු සළකිල්ලට ගනිමින් මෙම පෙත්සම ලබන ඔක්තෝම්බර් 06 වැනිදා කැඳවීමට නියම කළ විනිසුරුවරයා එදින අධිකරණයේ පෙනී සිටින ලෙස නියම කරමින් මෙහි වගඋත්තරකරුවන්ට නොතිසි නිකුත් කළේය.