අජන්ත පිය සෙනෙහසට මැදිව...

තමාටම අනන්‍ය වූ පන්ද යැවීමේ අපූරු ඉරියව්ව නිසාම එක් නිමේෂයකදී මුළු! මහත් ක‍්‍රිකට් ලෝකයේම අවධානය දිනා ගැනීමට ඔහුට හැකිවිය. අජන්ත මෙන්ඩිස් නමැති ඔහුගේ ඒ පන්දු යැවීම විටෙක හාස්කමක් මෙන් විය. බොහෝ විචාරකයින් ඔහුගේ පන්දු යැවීම හැඳින්වූවේ මැජික් එකක් හැටියටය. ඇඟිලි දෙකක් පමණක් උපයෝගි කරගෙන යවන පන්දුව කැරම් බෝල් යනුවෙන් නම් කිරීමද සිදුවිය. එලෙසින් ක‍්‍රිකට් ලෝකයට අවතීර්ණ වූ අජන්ත මෙන්ඩිස් හෙවත් අජා නැත්නම් මෙන්ඩා මේ දිනවල ක‍්‍රිකට් පිටියේ දක්නට නැත. පිට කොන්දේ ඇති වූ ආබාධයක් නිසා ප‍්‍රතිකාර ගනිමින් සිටීම ඊට හේතුවය. ටික දිනකට හෝ පිටියෙන් ඈත්ව සිටීම ක‍්‍රීඩකයකුට කනගාටුවට කරුණක් විය හැකිය. නමුත් මේ සියල්ල අතරේ අජන්ත මෙන්ඩිස් නම් සිටින්නේ පුදුමාකාර සතුටකිනි. තමා පියෙකු වීම ඊට හේතුවයි. මේ සතුට දරාගෙන සුන්දර නිවෙසක වෙසෙන ඔහුගේ කැදැල්ලේ හැඩ රුව බලන්නට පසුගිය දිනෙක අපි ගියෙමු. අජන්තගේ බිරිඳ යෝෂිණී සහ පුංචි පුතු මේ දිනවල වෙසෙන්නේ රාජගිරියේ ඇති සුපිරි නිවාස සංකීර්ණයක ඇති නිවෙසකය. මෙය අහස් වියන මත තැනූ පුංචි මාළිගයක් ලෙස නම් කළාට වරදක් නැත. මහල් විසි ගණනකින් සමන්විත මේ අපූරු නිවාස සංකීර්ණයේ මුදුන් මහළක ඇති අජන්තගේ නිවෙසට ගිය පසු එහි ආලින්දයට දර්ශනය වන දසුන සැබැවින්ම අප විමතියට පත්කරවන තරම්ය. ”මෙතැනට උදේට ශ්‍රීපාද කන්ද පෙනෙනවා.’’ අජන්ත ඈතට අත දිගු කරමින් අපට පෙන්වීය. අප ආලින්දයට යාබද සඳළුතලයට ගොස් අවට සිරි නැරඹීමු. මේ කොළඹද? කියා සිතා ගත නොහැකි තරමටම සුන්දර දසුන් එහි සිට දැකගත හැකිය. එක් භූමි ප‍්‍රදේශයක් දර්ශනය වන්නේ මහා වනාන්තරයක ස්වරූපයෙනි. රාජගිරිය සිට පැතිරීගිය මේ භූමි ප‍්‍රදේශය අසලින් පුංචි ගංගාවක් ගලා යයි. ඒ දියවන්නාවේ කොටසක් බව අජන්ත අපට කීවේය. ‘‘තවත් ලස්සන දර්ශන පෙන්වන්නම් අපි තේ බීල ඉමුකො’’ යැයි ඔහු ආරාධනා කළේය. තේ පැන් සංග‍්‍රහය අතරවාරයේ මේ පුංචි නිවෙසේ හැඩරුව අපි නැරඹීමු. කාමර තුනකින් පමණ සමන්විත මෙහි ගෙබිමට අතුරා ඇත්තේ ලීයෙන් නිමවන ලද රටාය. සාලය, මුළුතැන් ගෙන සහ නිවෙසේ සේවය කරන අය සඳහා ඉඩකඩක්ද වෙන්ව තිබේ. නිවෙසකට එහා ගිය සුපිරි හෝටලයක ඇති රිද්මයට සමානව ගෘහ භාණ්ඩ සහ අනෙක් සියල්ල තබා ඇත. මේ නිවෙස ගත්තෙ යෝෂිණි මවක් වීමේ අපේක්ෂාවෙන් සිටියදීයි. පුංචි පුතා ලැබුනාට පස්සෙ අපට වඩා නිදහසේ අලූත් තැනක ඉන්න  ඕනෑ වුණා. මෙය මහා ලොකු මන්දිරයක් නෙවෙයි. අපේ පුංචි පවුලට දැනට මෙය සෑහෙනවා. මෙම සුපිරි නිවාස සංකීර්ණයෙන් නිවෙසක් ගැනීම ගැන අජනත්ත අපට කීවේ එ ලෙසිනි. මේ අතරවාරයේ යෝෂිණි පුංචි අමුත්තා රැගෙන ආවාය. අජන්ත පුතු දෝතට ගෙන සෙනෙහස බෙදා ගනිමින් සිටී. ‘අජා’ පුදුම සතුටකින් සිටින්නේ. එයාට මුළු ලෝකෙම ලැබුනා වගේ. අපේ පවුලේ පළවෙනි අත්දැකීම තමයි මේ. අජාගෙ පවුලේ හැමෝමත් මේ අත්දැකීම නිසා පුදුමාකාර සතුටකින් සිටින්නේ’’ යෝෂිණී අපට කීවාය. මේ අතරේ අජන්ත තමාට ජීවිතය දැනෙන හැටි කීවේය.   ‘‘ජීවිතේ හරිම සුන්දරයි. ලොකු සතුටක් දැනෙනනවා. ඒ වගේම වගකීම් ගැනත් සිහිවෙනවා. වෙනදාට වඩා මට වැඩ කොටසක් කරන්න තියෙනවා කියලා හිතෙනවා. ආයෙත් ක‍්‍රිකට් පුහුණුවීම් පටන් අරගෙන තියෙන්නෙ. කොන්දේ ආබාධයට ප‍්‍රතිකාර ගනිමින් හිටිය නිසා පසුගිය මාස තුනක කාලයක් ක‍්‍රීඩා කළේ නැහැ. ප‍්‍රතිකාර සඳහා ඔස්ටේ‍්‍රලියාවටත් ගියා. දැන් සූදානම් වන්නේ ශ්‍රී ලංකා ප‍්‍රිමියර් ලීග් විස්සයි විස්ස තරග මාලාව සඳහායි. නැගෙනහිර කණ්ඩායම සඳහා මා ඇතුළත්. ඉන්පස්සෙ ලෝක කුසලාන විස්සයි විස්ස තරගාවලියටත් ක‍්‍රීඩා කිරීම තමයි අපේක්ෂාව’’ අජන්ත අද දවසේ ඔහුගේ කටයුතු සහ අපේක්ෂාවන් ගැන ප‍්‍රකාශ කළේ එලෙසිනි. එළැඹෙන විස්සයි විස්ස ලෝක කුසලානය ශ්‍රී ලංකාව ජයග‍්‍රහණය කැරවීම සඳහා උපරිමයෙන් කැපවීම් ඔහුගේ ප‍්‍රධාන අරමුණයි. මේ සියල්ල අතරේ ඉතා යහපත් පවුල් ජීවිතයක් ගත කිරීම තමාගේ අභිප‍්‍රාය බව ඔහු කීවේය.   අද මේ සුන්දර ජීවිතය ගෙවන විට අතීතයේ ගෙවූ ජීවිතය දැනෙන්නේ කොහොමද? අපි අජන්තගෙන් විමසීමු.   ‘‘ඇත්තටම ගොඩක් සතුටුයි. එදා සිටියා වගේ නොවෙයි. ජනප‍්‍රියත්වය ඇතුළු සෑම දෙයක්ම වගේ ලැබිලා. පසුගිය කාලය දිහා බලන විට අද සතුටු නැහැ කිව්වොත් එය බොරුවක් සතුටු විය හැකි දේ බොහෝමයි. ලෝකයේ ප‍්‍රකට ක‍්‍රීඩකයින් සමග ක‍්‍රීඩා කරන්න ලැබුණා. ඒ වගේම අපේ රටේ වීරයින් වූ මුරලිදරන්, වාස්, සනත්, සංගක්කාර, මහේල වැනි සුපිරි ක‍්‍රීඩකයින් එක්කත් ක‍්‍රීඩා කරන්න ලැබුණා. මේක හරියට සිහිනයක් වගෙයි. හැබැයි මේ සියල්ල මට නිකම්ම ලැබුනු දෙයක් නෙවෙයි.  විශාල කැපකිරීමක ප‍්‍රතිඵලය වගේම දෙවියන්වහන්සේගේ කැමැත්ත නිසා ලැබුණු දේවල්. මේ සියල්ල වෙනුවෙන් මගේ පවුලේ අය වගේම යෝෂිණිගේ පවුලේ අයගෙනුත් ලැබෙන්නෙ ලොකු සහයෝගයක්. මගේ බිරිඳ යෝෂිණී ගැන මට හරි ආඩම්බරයි. එයා මගේ ළඟින්ම සිටිමින් සියලූ දේ ගැන කතා කරමින් සියල්ලට සහයෝගය ලබා දෙනවා.’’   අජන්ත සීරුවට එලෙස කියාගෙන යද්දී, අපි යෝෂිණී දෙස බැලූවෙමු. ඇය ‘අජා’ දෙස බලා සිටින්නේ දැඩි සෙනෙහස පෙරදැරිවය.   ‘‘මෙයාට මොනම වෙලාවකදීවත් කේන්ති යන්නේ නැහැ. හරිම නිවිච්ච චරිතයක්. දෙවියන්වහන්සේගේ කැමැත්තට එයා මට ලැබුණු ගුණවත් මිනිසෙක්. පුංචි පුතා ලැබෙන්නට පෙර මාව සතුටින් තියන්න එයා කළ හැකි හැමදේම කළා. මේ නිවෙස පවා ගත්තේ පවුලක් ලෙස අපට අලූත් තැනක නිදහසේ, නිස්කලංකව ජීවත් වෙන්න  ඕනෑ නිසයි. විවාහ වෙලා අවුරුද්දයි මාස හයයි. මේ කාලෙයෙදී පුංචි පුතා එක්වීම වචනයෙන් කියන්න බැරි තරමේ සතුටක්. දැන් ජීවිතේ සම්පූර්ණයි කියලා හිතෙන්නෙ. පුතා උපන්නෙ පෝය දවසෙදීයි.   සඳ එළිය මෙන් සෞම්‍යවූ තරු එළිය ගෙනා ඒ පුංචි සුරතලා සමග ගෙවන ඒ සුන්දර මොහොත තවත් ඔවුන්ගෙන් උදුරා ගැනීම සුදුසු නැත. ඒ සෙනෙහස විඳගන්නට ඉඩ දී අපි මේ නිහතමානී ක‍්‍රිකට් තරුව වෙසෙන මේ සුපිරි නිවාස සංකීර්ණයේ මුදුනින් සමුගෙන ගියෙමු.
සටහන/ඡායාරූප - සඳුන් ගමගේ
අජා මට හරිම ආදරෙයි මෙතැනට ශ්‍රීපාද කන්ඳ පෙනෙනවා.. මේ තරම් සතුටක් මට කවදාවත් දැනිලා නෑ... (සෙනෙහසක අරුත) හැන්දෑවට මෙතැන හරිම ලස්සනයි