පාර්ලිමේන්තුවේ දී අඟහරුවාදා සිදුවූ ගුටිකෙළිය  සම්බන්ධයෙන් මන්ත්‍රීන් දෙදෙනකුට එරෙහිව පාර්ලිමේන්තු වරප්‍රසාද කමිටුවට වාර්තා කිරීමට ඉඩ කඩ ඇතැයි පාර්ලිමේන්තු ආරංචි කියයි.

වරප්‍රසාද කමිටුවට පැණවිය හැකි උපරිම දඬුවම විය හැක්කේ පාර්ලිමේන්තු සැසිවාර හතකට හෝ මාසයකට නොවැඩි කාලයක් සඳහා මන්ත්‍රීට තහනමක් පැණවීමයි.

මන්ත්‍රීන් පාර්ලිමේන්තු භූමියේ දී කරන ක්‍රියාවක් සම්බන්ධයෙන් මන්ත්‍රීන්ගෙන් සමන්විත පාර්ලිමේන්තු වරප්‍රසාද කමිටුවට හැර නීතිය ක්‍රියාත්මක කරන පොලිසියට හෝ කිසිම අධිකරණයකට බලයක් නැති බව නීති විශාරදයෝ කියති.

මේ සම්බන්ධයෙන් කතානායක කරු ජයසූරියමහතාගේ නියමයෙන් නියෝජ්‍ය කතානායක තිලංග සුමතිපාල හා නියෝජ්‍ය කාරක සභාපති සෙල්වම් අඩෙයිකලනාදන් මහත්වරු වාර්තාවක් සකසා කතානායකට බාර දුන්හ. එම වාර්තාව කතානායකවරයා විසින් වරප්‍රසාද කමිටුවට ඉදිරිපත් කිරීමට නියමිතය.

ඉන් පසු වරප්‍රසාද කමිටුව යෝජනාවක් සම්මත කර ගත යුතු අතර කතානායකවරයාට ඒ යෝජනාව අනූව පමණක් ක්‍රියා කළ හැකි බව ද පාර්ලිමේන්තු අණ පනත් වල සඳහන් වේ.