සුපර් ස්ටාර් ගායන තරු පරපුරේ මුල්ම ගායකයෙකු ලෙස මංජුල පුෂ්පකුමාර හැඳින්විය හැකිය. කලක් තිස්සේ තමන් පැමිණි මඟ සහ සංගීත කටයුතු සමග කතාබහකට ඔහු "අද" හා සම්බන්ධ විය.

මේ දවස්ටිකේ කාර්යබහුලයි නේද?

මේ දවස් ගොඩක්ම කාර්යබහුල වෙලා ඉන්නෙ සංගීත ප්‍රසංග නිසයි. ඊට අමරතව මම සංගීත කණ්ඩායමක් ආරම්භ කළා. ඉතිං එහි වැඩ කටයුතු කරගෙන යනවා.

සංගීත කණ්ඩායම පිළිබඳව කතාකළොත්?

සංගීත කණ්ඩායම ගැන කතා කරනවා නම් ඒක කලින් තිබ්බේ "ආයුබෝවන් ශ්‍රී ලංකා" කියලා. කලින් හිටියේ වෙන නායකයෙක්. දැන් ඒක "ආයුබෝවන් ශ්‍රී" වෙලා මගේ නමින් කරගෙන යනවා. එයට හොඳ ප්‍රතිචාර හිමිවෙමින් පවතිනවා. මොකද වෘත්තීයමය වශයෙන් සංගීත කණ්ඩායම් සාමාජිකයන් කිහිපදෙනෙක් තමයි ඉන්නේ. අද කාලෙ ගොඩක් සංගීත කණ්ඩායම් බිහිවෙන්නේ සංගීතය ඉගෙනගත්තෙ නැති අයත් එක්කනේ.

ඒකපුද්ගල ගීතවලින් ඈත් වෙලාද ඉන්නේ?

නැහැ. මම වැඩේ අත්හැරලා නහැ. කොහොමත් අත්හරින්නෙත් නැහැ. මම එළිදැක්වූ "තෙරුවන් සරණයි" කියන ගීතය ගොඩක් ජනප්‍රිය වුණා. ඒකෙ වචන ටිකත් එක්ක මිනිසුන් අතරට ගිය ගීතයක් කියලා ගොඩක් අය කියනවා. ඊටපස්සෙ තමයි"තනි වෙලා මා" කියන ගීතය කළේ. "තනි වෙලා මා" කියන ගීය ගැන විශේෂයෙන් කියන්න ඕනේ. ලංකාවේ බොහෝ දෙනා ආදරය කරන ජනප්‍රිය ගුවන් විදුලි නිවේදකයෙකුගේ ජීවිත කථාවක් ඇසුරෙන් නිර්මාණය කරන ලද වීඩියෝවක්. ඒ කෙනාගේ නම නම් කියන්නේ අමාරුයි. ඊට අමතරව මේ අවුරුද්දේ තව ගීත කිහිපයක් එන්න තියෙනවා.

රියලිටි තරු බිහිවෙනවා, නැතිවෙනවා. මේ පිළිබඳව රියලිටි තරුවක් ලෙස ඔබගේ අදහස කුමක්ද?

මට නම් කිසිදු ගැටලුවක් නැහැ. මම දැනට ඇවිල්ලා අවුරුදු එකොළහක් වෙනවා. තාම හොඳට මාව පිළිගන්නවා. ඇත්තටම කිව්වොත් දැන් රියලිටි කියන දේ මිනිසුන්ට එපා වෙලා තියෙන්නේ. මම තරුවක් වුණේ ලංකාවේ මුල්ම රියලිටි වැඩසටහන වුණු "සිරස සුපර් ස්ටාර්" එකෙන්. ඒ තුළින් අපට ජනප්‍රියත්වයක් ලැබුණා. අපේ දොළොස් දෙනාටම ක්ෂේත්‍රය තුළ කැපී පෙනෙන්න බැරි වුණත් කිහිප දෙනෙක් මේ ක්ෂේත්‍රයේ කැපී පෙනෙන තරු වී හමාරයි. දැන් මේ කියන රියලිටි තරගවලින් ඉදිරියට එන කාටවත් ස්ථාවරයක් ගොඩනගාගන්න අමාරුයි. රියලිටි උණුසුමත් එක්ක ආවාට ඒ උණුසුම නැතිව ගියාම ඒ අයව හොයාගන්නත් නැහැ.

රියලිටි තරගවලින් දිගින් දිගටම තරු බිහිකරන එකද මෙවැනි දෙයක් සඳහා හේතුවක් වෙන්නේ?

අපි මෙහෙම හිතමුකෝ. මමත් රියලිටි තරගවල මුල්ම එකෙන් එන්නේ නැතිව 10 වෙනි එක වගේ එකකින් ආවොත් මටත් වෙන්නේ ඒ ටිකම තමයි. මොකද අපි බිහිවුණු පළමු වැනි වැඩසටහන මිනිසුන්ට ගොඩක් හිතට දැනුණු දෙයක් වුණා. මිනිසුන් කෙටි පණිවුඩ එව්වෙත් හදවතින්. දැන් ඒ දේත් බිස්නස් එකක් වෙලානෙ තියෙන්නේ. දැන් ඒ දේ මිනිසුන්ට වදින්නේ නැහැ. බලෙන් වද්දනවා. මගේ පෞද්ගලික මතය වන්නේ රියලිටි තරගවලින් ගායකයන් බිහිකරන එක ඇති කියන එකයි. මොකද සින්දු අහන්නත් කවුරුහරි ඉන්න එපැයි. ඉස්සර මගේ ගීතයක් ආපු කාලයේ මාධ්‍යවලින් ඉල්ල ඉල්ල ගීතය දැම්මේ. දැන් අපේ සිංදුවක් දාගන්නත් හරි අමාරුයි. ඒ වගේ තැනකට මේ දේ ගෙනත් තියෙන්නෙ රූපවාහිනී ආයතනම තමයි.

රැල්ලක් තුළ එකම ආරේ ගීත බිහිවන එක ගැන ඔබේ මතය?

මම සුපර් ස්ටාර් ආපු කාලයේ තිබ්බේ වෙනම ගීත රැල්ලක්. ඊටපස්සෙ කාලයක් යද්දි රිඟින් ටෝන් රැල්ල ආවානේ. මේ රිඟින් ටෝන් රැල්ලේ හොඳ සහ නරක දෙකක් තියෙනවා. මොකද මේකෙන් කලාකරුවාට වඩා ආදායමක් ලබන්නේ වෙනත් අය. නමුත් මේ දේ තුළින් කලාකරුවෙකුට වාහනයක් පැදලා ගෙයක් දොරක් හදාගෙන ඉන්න පුළුවන් කියන තත්ත්වයක් හැදුණා. එක පැත්තකින් වුණු හොඳක් ඒක. තව පැත්තකින් ඇති වන අවාසියක් තමයි රූපවාහිනිය තුළ හෝ ගුවන් විදුලිය මගින් තමන්ගේ ගීතයක් වාදනය කරගන්න අමාරු තත්ත්වයක් උදාවෙනවා. අපි ඒ ගීය රිඟින් ටෝන් සඳහා නොදුන්නත් මාධ්‍ය ආයතන හිතනවා අපි රිඟින් ටෝන් හරහාත් ඒ ගීතයෙන් මුදල් හම්බ කරනවා කියලා. ලංකාවේ පැරණිතම ප්‍රවීණ ගායක ගායිකාවන් හිටපු කාලයේ තිබුණු තරගය අඩුයි. නමුත් ඒ කාලේ බිහිවුණු චරිත දිහා බලද්දි අද කාලයේ චරිත බිහිවෙනවා කියලා කියන්න අමාරුයි. අද එක දවසකට ගීත කීයක් එළිදක්වනවාද කියලා බලන්න. එක මියුසික් චාර්ට් එකක එක ගීතයක් සතියක් තියාගන්න බැරි කාලයක් වෙලා තියෙනවා. මොකද ගීත එන්න එන්නම එළිදක්වන නිසායි. මේ දේවල්වලින් ගොඩගියපු අය ඉන්නවා. මගේ රිඟින් ටෝන්වලින් කෝටි ගණන් හම්බ කරපු අය ඉන්නවා. මට නම් මහ ලොකු දෙයක් වෙලා නැහැ.

ඔබ කියන්නේ රිඟින් ටෝන්වලින් වෙනත් අය හම්බ කරනවා කියලද?

ඒ කට්ටිය අපට කරන්නෙ බොරුනෙ. බොරුවට එක එක දේවල් හදලා පෙන්නනවා. ගායකයා සිංදු කියන්න ඕනනේ මේක ලස්සන වෙන්න. ඉතිං ගොඩක් ගායකයන්ට ලොකු ආසාධාරණයක් වෙනවා. දැනටත් මම ගිවිසුම් අත්සන් කරලා තියෙන්නෙ අවුරුදු දෙකකට. නමුත් මහ ලොකුවට වෙන දෙයක් නැහැ. අලුතෙන් එන කෙනෙකුට හරි අමාරුයි. අදටත් කවුරුත් කියන්නෙ නැහැ රිඟින් ටෝන්වලින් හම්බ කරන්න බෑ කියලා. නමුත් ඒකෙන් හම්බ කරන්නෙ ගායකයා නෙමෙයි වෙනත් අයයි. ගායක ගායිකාවන්ට හම්බ විය යුතු දේවලුයි හම්බ වෙන්නේ නැත්තේ. උදාහරණයක් විදිහට කිව්වොත් අපට 10 ක් හම්බවෙන්න තියෙනවා කියලා. නමුත් හම්බවෙන්නෙ ඒකෙනුත් භාගයයි. ඒ වගේ ආසාධාරණයක් වෙනවා.

ඔබ වටා රසික කොට්ඨාසයක් ගොඩනැගුණානේ. ඉතිං ඒ අයට මොනවාද කියන්න තියෙන්නේ?

මම ඉදිරියට ආවෙ ගොඩක් අමාරුවෙන්. දැනට අවුරුදු එකොළහක් වෙනවා මේ ක්ෂේත්‍රයට ඇවිල්ලා. ඒ කාලෙ හිටිය රසික පිරිසම අදත් මට ඉන්නවා. මොකද අපට සාමාන්‍ය මිනිස්සු නැත්නම් සින්දු කියන්න බැහැ. ඒ අයට හැමදාම ගොඩක් ස්තුති කරනවා. හැමදාම මගේ සින්දු අහලා හොඳ නරක කියන්න කියලා තමයි කියන්න තියෙන්නේ.

ඩිලාන් ක්‍රිෂාන්ත