"ඩැෆඩිල් මලක්", "සිත්තම් කරමින්", යන සුභාවිත ගීතවලින් රසික ජනාදරයට පත් ඔහු දයාන් විතාරණ වෙයි. ගායන රැල්ලත් සමග ඉදිරියට නොයන ගායකයෙකු වුවද ඔහුගේ නව නිර්මාණ කිහිපයක් පසුගියදා එළිදක්වා තිබුණා. ඒ පිළිබඳ ඔහු අප සමග පැවැසුවේ මේ ආකාරයටයි.

"මෑතකදී විශේෂ ගීත කිහිපයක් කළා. ඒවා මගේ ෆේස්බුක් එකේ ෆෑන් පේජ් එකෙන් බලාගන්න පුළුවන්. අවසානෙට කළේ රොක්ෂිලා වෙත්තමුණි රචනා කරනු ලැබූ "උදාරි හිරු රැස්" කියන ගීතයයි. මේ ගීතය සංගීත අධ්‍යක්ෂණය කළේ දර්ශන වික්‍රමතුංග. ඒ ගීතයට ෆේස්බුක් හරහා ඉහළ ප්‍රතිචාර තියෙනවා. ඉදිරියේදී මව් ගුණ ගීයක් කරන්න ඉන්නේ. මම මේවන කොට අලුත් පද රචකයන්ගේ ගීත ගොඩක් කරලා තියෙනවා.*

"නව රැල්ලේ ගීතවලටමම පෞද්ගලිකව අකමැතියි. හැබැයි ඒවගේ තනු හරිම ලස්සනයි. එහි වචන භාවිතය සුභාවිත ගීතයේ තිබෙන වචන නෙමෙයි. විශේෂයෙන්ම එහි බොහොමයක ඔයා කියන වචනය පාවිච්චි වෙනවා වැඩියි. කතාකරන කොට ඔයා කිව්වට කවදාකවත් ව්‍යවහාර භාෂාවේ, සාහිත්‍යයේ ඔබ කියලයි කතා කරන්නේ. සිංහල භාෂාව හරි පොහොසත් භාෂාවක්. ලියන්නේ එක විදිහකට කියන්නේ එක විදිහකට, ගීත ගයන්නේ එක විදිහකටයි. ලියන භාෂාවෙන් තමයි ගීත ගැයෙන්න ඕනේ. එතකොට මිනිසුන්ට හිතන්න යමක් තියෙනවා. මිනිස්සු සාහිත්‍යයෙන් පෝෂණය වෙනවා. මේ අද එහෙම නැහැ. කෙලින්ම ලියුමක් ලියනවා වගේ, කතාවක් ලියනවා වගේ ගීත කියනවා. ඒක හොඳ ප්‍රවණතාවක් නෙමෙයි."

"මෙවැනි දේවල් සඳහා මූලික හේතුව තමයි මාධ්‍යවලින් එවැනි ගීතවලට ඉතා ඉහළ ජනප්‍රියත්වයක් ලබාදීම.මිනිස්සුත් ඉතා සරලයිනෙ. මොකද අපි තරුණ කාලේ ප්‍රබුද්ධ විදිහට ලියපු ගීත අපි ඇසුරු කළා. ගීත සාහිත්‍යයේ ගොඩක් තැන් ස්පර්ශ කරලා ඇත්තටම හොඳ රසිකයෝ වෙලා හිටියේ. ඒක නිසයි අදටත් අපෙන් වැරදි ගීතයක් බිහිනොවෙන්නේ. ඉතිං අද ගොඩක් වෙලාවටවෙන්නේ කතාකරන භාෂාවෙන් ලියැවුණු ගීත අහන්න ලැබීමයි. මිනිසුන්ට තියෙන අවිවේකී බව සියලු දේ එක්ක ඒ වගේ ගීත දුන්නාම ග්‍රහණය කර ගන්න ලේසියි. හැබැයි එයින් සිදුවන්නේ සාහිත්‍යයට හානියක් පමණයි. අපි හැමදාම හිතන්න ඕනෑ සංස්කෘතිය, සභ්‍යත්වය මේ සියලු දේවල් එක්ක යන ගමන් ගැන. ඒ නිසා අපේ අනන්‍යතාව ගිලිහෙන්න දෙන්න නරකයි."

"නමුත් අද ඇතැම් අය හෙබ්බත් වෙලා තියෙන්නේ. අහන අය කියන්නේ රේඩියෝවක් දාලා සිංදුවක් අහන්න බැහැ කියලයි. කැසට් එකක්, සීඩි එකක් හෝ අන්තර්ජාලයෙන් සිංදුවක් අහනවා ඇරෙන්න සිංදුවක් අහන්න බැහැ කියලා. අපි මේ ගීත කරලා නාළිකාවලට දුන්නට ඒ අය කියනවා මේවා නෙමේ අද යන්නේ කියලා. හැබැයි මම කියන්නේ මම තාම රසිකයෙක්. මගේ හැකියාවන් මොට වුණත් මගේ රසිකත්වය මොට කරන්න බැහැ කාටවත්. මම හැමදාම මගේ රසිකත්වයට ගැලපෙන ගීත ගායනා කරනවා. ගායනා කරලා මගේ රසිකයන්ව පෝෂණය කරනවා. කවුරු හරි ඒකෙන් වින්දනයක් ලබනවානම්, ඒක තමයි මම ලබන ලොකුම සතුට."