(අංජුල මහික වීරරත්න)

යම්කිසි අවස්ථාවක ආර්ථිකයට බලපෑමක් ඇති වුවහොත් ජනතාව ආරක්ෂා කර ගැනීම සඳහා පලපුරුදු කණ්ඩායමක් පාර්ලිමේන්තුවේ සිටිය යුතු බව එක්සත් ජාතික පක්ෂ නියෝජ්‍ය නායක නව ප්‍රජාතන්ත්‍රවාදී පෙරමුණේ ගම්පහ දිස්ත්‍රික් අපේක්ෂක රුවන් විජයවර්ධන මහතා මාධ්‍ය හමුවකදී අද (28) පැවසීය.

ආණ්ඩුවක් දුවන ආකාරය පිළිබඳ පලපුරුද්දක් තිබෙන ප්‍රබල කණ්ඩායම ගෑස් සිලින්ඩරය යටතේ නව ප්‍රජාතන්ත්‍රවාදී පෙරමුණෙන් තරඟ කරන බව කී විජයවර්ධන මහතා මෙවැනි මොහොතක අත්දැකීම් නැති පිරිසක් පමණක් පාර්ලිමේන්තුවට තේරී පත්වුවහොත් රටට අස්ථාවර බවක් ඇති විය හැකි බව සඳහන් කළේය.

කොළඹ මල් පාරේ පිහිටි නව ප්‍රජාතන්ත්‍රවාදී පෙරමුණු දේශපාලන කාර්යාලයේ පැවැති මාධ්‍ය හමුවේදී වැඩිදුරටත් අදහස් දැක්වූ රුවන් විජයවර්ධන මහතා මෙසේද කීය.

ගෑස් සිලින්ඩර පක්ෂයෙන් මෙවර මහ මැතිවරණයට ඉදිරිපත් කර තිබෙන්නේ ආණ්ඩු කර අත්දැකීම් තිබෙන කණ්ඩායමක්. මේ අවස්ථාවේ පළපුරුද්දක් නැති අත්දැකීම් නැති කණ්ඩායමක් ආණ්ඩුවක් හදනවා නම් එයින් ඉදිරියේදී රටට යම් අස්ථාවර බවක් ඇතිවෙන්න පුළුවන්.මහ මැතිවරණයේදී ජනතාව ටිකක් හොඳින් කල්පනා කොට ආර්ථිකය පිළිබඳ දැනීමක් පළපුරුද්දක් තිබෙන කණ්ඩායමක් මහ මැතිවරණයේදී තෝරා පත් කර ගනු ඇතැයි කල්පනා කරනවා.

පසුගිය මහ මැතිවරණයේදී අපේ කණ්ඩායම උත්සාහ කළේ ජනපති රනිල් වික්‍රමසිංහ මහතා ජයග්‍රහණය කරවීමටයි.අපේ ඉලක්කය තිබුනේ මේ රටේ ආර්ථිකය හැදීමයි.වසර දෙකහමාරකට තුනකට පෙර බංකොලොත් වී තිබූ රට එතුමාගේ උත්සාහය නිසා යම් යහපත් තැනකට ගෙනාවා.

ජනපතිවරණයේදී රටේ ජනතාවගේ අවශ්‍යතාවය වූයේ වෙන දෙයක්.සාම්ප්‍රදායික දේශපාලනය අනවශ්‍ය බවත් යම්කිසි වෙනසක් කළ යුතු බවත් ජනපතිවරණයේදී ජනතාව විශ්වාස කළා. සුළුතර ඡන්ද ප්‍රමාණයක් ලබාගෙන වත්මන් ජනපති බලයට පත්වී තිබෙනවා.රනිල්ට සහ සජිත්ට ලැබුණු ඡන්ද ප්‍රමාණය එකතු කර ගත් විට අනුර ජනපතිට ලැබුණු ඡන්ද ප්‍රමාණයට වඩා වැඩියි.