නිරූපණ ක්ෂේත්‍රයෙන් පුංචි තිරයට පැමිණි ඇය රිතූ ආකර්ෂා. "හිරු තනිවෙලා" ටෙලිනාට්‍ය තුළින් පුංචි තිරයට පැමිණි ඇය මේ දිනවල ජනප්‍රියත්වයට පත්වූයේ "උතුම් පැතුම්" ටෙලි නාට්‍යය ඔස්සේය. ඇයගේ කලා කටයුතු පිළිබඳව කතාබහ කිරීමට "අද" හා එකතු වූ මොහොතකි මේ.

කලා කටයුතු නිසා කාර්යය බහුලයි නේද?

නැහැ. මම දැනට සතියක් විතර ගෙදර හිටියා. තව සතියකින් විතර අලුත් වැඩකටයුතු පටන් ගන්නවා. මම කලින් කරපු ටෙලිනාට්‍ය දෙකකම වැඩ අවසන් වුණා. ඉතිං තව අලුත් වැඩ බාර ගත්තා. ඉදිරියේදී කාර්යබහුල වෙන්න බලාගෙන ඉන්නවා.

අවසන් වූ වැඩ ගැන කතා කළොත්?

"කාසි වත්ත" සහ "උතුම් පැතුම්" ටෙලිනාට්‍ය දෙක තමයි ඉවර වුණේ. ඒ නාට්‍ය දෙකම ලංකාවේ ජනප්‍රිය වුණා. නිල්වලා ආයතනයෙන් තමයි නිෂ්පාදනය කළේ. මම හිතනනවා ගොඩක් ප්‍රේක්ෂක ප්‍රතිචාර හම්බ වුණේ %උතුම් පැතුම්^ හරහායි. අවුරුදු දෙකකට වැඩි කාලයක් එහි රූගත කිරීම් කළා. ඉතිං හරිම සුන්දරව ඒ කාලෙ ගෙවුණා. "කාසි වත්ත" කියන්නේ කෙටි කාලයකින් ජනප්‍රිය වුණු ටෙලි නාට්‍යයක්. ඒකේ "චුක්කි" මම ආදරයෙන් ආසාවෙන් කරපු චරිතයක්. මේ නාට්‍ය දෙකම ඉවර වුණා. ප්‍රේක්ෂකයන් ආදරය කරපු චරිත දෙකක් නිමා වුණ එක ගැන පුංචි දුකකුත් තියෙනවා.

රංගන ශිල්පිනියක් වෙන්න හීන දැකපු කෙනෙක්ද?

රංගන ශිල්පිනියක් වෙන්න කවදාකවත් හීනයක් දැකල නැහැ මම. මම පොඩි කාලෙ ඉඳන්ම ආස කළේ නිරූපිකාවක් සහ ගුවන් සේවිකාවක් වෙන්න. නිරූපණ ක්ෂේත්‍රයට ආවට පස්සෙ තමයි අහම්බෙන් වගේ රංගන ක්ෂේත්‍රයට එකතු වුණේ. ඒ එකතු වුණු දවසේ ඉඳන් හරි ආසාවෙන් වැඩකටයුතුවලට දායක වුණා. මේ ජීවිතේ හරි සුන්දරයි. මේ දේට ගොඩක් අය ආදරය කරනවා සහ ඒ අයගෙන් ලැබෙන ප්‍රතිචාර නිසා තමයි ඉස්සරහට යන්න ආසාවක් ආවේ. අපි මහන්සිවෙලා වැඩක් කරලා මගතොටේදි ඒ දේවල් සඳහා ලැබෙන ප්‍රතිචාර එක්ක ආසයි ඒ දේවල් වලට දායක වෙන්න. මට මේ තැන ලැබෙන්නේ මට ආදරය කරන ප්‍රේක්ෂකයන් නිසයි. මම සතුටු වෙනවා රංගන ශිල්පිනියක් වෙන්න ලැබුණු එක ගැන. මම හිතනවා ලෝකෙ තියෙන වාසනාවන්තම රැකියාව තමයි මම කරන්නේ කියලා.

ඒ කියන්නේ ඉදිරියටත් වෘත්තිය රංගනය කියලද?

ඔව්, ඉදිරියටත් මේ ක්ෂේත්‍රය තුළ රැඳී ඉන්න තමයි බලාපොරොත්තුව.

ගොඩක් දෙනෙකුගේ බලාපොරොත්තුව සම්මානයක් ලබාගැනීම. මෙවැනි බලාපොරොත්තුවක් ඔබට නැද්ද?

රයිගම් සහ සුමති සම්මාන උලෙළවල් දෙකෙහිම ජනප්‍රිය නිළිය සඳහා නිර්දේශ වුණා. ඒ දෙක හම්බුණේ නැහැ. මේ අවුරුද්දෙත් නිර්දේශ වෙලා තියෙනවා. දන්නෙ නැහැ ඉතිං මොනවා වෙයිද කියලා. මගේ බලාපොරොත්තුව කවදාහරි හොඳ සිනමා නිර්මාණයක් සඳහා දායක වෙන්නයි.

ගොඩක් ප්‍රසිද්ධ අයට තම පෞද්ගලික ජීවිතයෙන් යම්කිසි දේවල් කැප කරන්න සිදුවෙනවා නේද?

ඔව්, මට කැප කරන්න වෙලා තියෙන්නේ මගේ කාලය තමයි. ඒ වුණත් මම සතුටට පත්වෙනවා. මොකද ඒ කාලය වැය කරලා කරන දේවල්වල ප්‍රතිඵලයක් අද දකින නිසා. අද පාරට බැස්සාම අපි රඟපාන නම් වලින් තමයි බොහෝ අය අපිට කතා කරන්නේ. කාලය වැය කළාට මම හිතනවා පාඩුවක් වෙලා නැහැ කියලා. කරන වැඩේ සාර්ථක වෙලා තියෙනවානම් කාලය කැප කරපු එක අපරාදෙ කියල හිතෙන්නෙ නැහැ.

ඔබ චරිත තෝරා බේරාගෙනද දායක වෙන්නේ?

අනිවාර්යෙන්ම තෝරා බේරා ගන්නවා. ගොඩක් අය මගෙන් අහනවා ඇයි නපුරු චරිතම කරන්නේ කියල. මම නපුරු චරිතම කරන්නෙ නැහැ. විවිධාකාර චරිත කරලා තියෙනවා. උතුම් පැතුම් එකේ විතරයි නපුරු චරිතයක් කළේ. මගේ පළමු නාට්‍ය වන "හිරු තනිවෙලා" කියන නාට්‍යය තුළ චරිත තුනක් විතර නාට්‍ය පුරාවටම තිබුණා. "අමන්දි", "චුක්කි", "වරුණි" මේ චරිත විවිධාකාරයි. අනික මම කරපු හැම චරිතයක්ම මිනිස්සුන්ගේ අතට ගිහිල්ලා තියෙනවා. ඒ නිසා ගෙඩක් වෙලාවට අධ්‍යක්ෂකවරයා, තිරරචනය පිළිබඳව සැලකිලිමත් වෙලා තමයි නාට්‍යයක් බාර ගන්නේ.

ගොඩක් නවකයන් පොළවෙ පය ගහලා ඉන්නෙ නැහැ කියනවා නේද?

මගෙත් එක්ක වැඩ කරලා තියෙන අය දන්නවා ඇති ඒ ගැන. ඒ නිසා මම ඒ දේ කියන්න ඕන නැහැ. නමුත් මම දන්න ගොඩක් නවක නළු නිළියෝ, අපේ වයසේ ඉන්න ගොඩක් අය පොළොවෙ පයගහලා තමයි ජීවත් වෙන්නේ.

රංගනය පිළිබඳව හදාරලද ක්ෂේත්‍රයට ආවේ?

රංගනය පැත්තෙන් කිසිම හැදෑරීමක් කරල නැහැ. මගේ රංගනය හැදුවේ අධ්‍යක්ෂකවරු සහ මගෙත් එක්ක වැඩ කරපු ප්‍රවීණ නළු නිළියන් විසින්. මම කරපු හැම චරිතයක්ම මෙගා ටෙලි නාට්‍ය වලටයි අයත් වුණේ. ඉතිං අධ්‍යක්ෂකවරයාට සහ ඒ අයට මාව හදන්න තියෙන කාලය ගොඩක් අඩුයි. ප්‍රදීප් ධර්මදාස මහත්මයා තමයි මගේ පළමුවැනි අධ්‍යක්ෂකවරයා. වේදිකාවටත් යන්න බලාපොරොත්තුවක් තියෙනවා. ඒකටත් හරි කාලය එනකන් ඉන්නවා.

නිරූපිකාවක් විදිහට ක්ෂේත්‍රයට ආව ඔබ, මේ වනවිට නිරූපණයට සමුදීලද තියෙන්නේ?

මට වැඩත් එක්ක නිරූපණය සඳහා එකතු වෙන්න අමාරුයි. ගොඩාක් වෙලාවට ගොඩක් දේවල් වලින් ඉවත්වෙලා රංගනය සඳහා කාලය දීල තියෙන්නේ.

කාලයක් ගොසිප් වෙබ් අඩවි වලට "රිතූ" ගේ අනතුරක් මාතෘකාවක් වුණා නේද?

රංගන ශිල්පිනියක් වුණාම කොහොමත් ගොසිප් පැතිරෙනවා. අනතුරක් වුණාම හැම පත්තරයකින්ම කෝල් කර කර විස්තර අහන නිසා ඒක ගොසිප් එකක් බවට පත්වෙනවා. නමුත් ඒක මට වෙච්ච කරදරයක්. රංගන ශිල්පිනියක් වුණාම හොඳ නරක මේ හැමදෙයක්ම බාර ගන්න ඕන. මිනිස්සුන්ගේ කට කතා ඒ දේවලුත් ඉතිං ඒ වගේමයි. ඒ නිසා ඒ දේවල් සඳහා නොසැලී මුහුණ දෙන්න ඕන.

උදව් කරපු පිරිස ගැන කිව්වොත්?

අතහිත දීපු අය නම් ගොඩක් ඉන්නවා. නම් වශයෙන් කියන්න බැහැ. මම වැඩකරපු අධ්‍යක්ෂකවරු, කැමරා ශිල්පීන් සහ නිෂ්පාදන ආයතනවල ඉන්න හැමකෙනෙක්ම, තේ අල්ලන කෙනාගේ ඉඳන් ලයිට් අල්ලන කෙනා දක්වා ස්තූතිවන්ත වෙනවා. ඒ අයගේ සහහෝගය නිසා තමයි අද මම මෙතන ඉන්නේ. මොකද මේක කණ්ඩායම් ව්‍යාපෘතියක් වගේ. චරිතයක් වුණත් තනියෙන් කරන්න බැහැ.

ඩිලාන් ක්‍රිෂාන්ත / ඡායාරූප - කවීත් මිලින්ද