කොම්පඤ්ඤවීදියේ පිහිටි  පෞද්ගලික රෝහලක්  තුළ දී අද පස්වරුවේ  පිහි ඇනුමකට ලක්ව  බරපතල තුවාල ලැබූ විශේෂඥ වෛද්‍ය රෝෂාන් මහේන්ද්‍ර මෙන්ඩිස් (41) මහතා දැඩිසත්කාර ඒකකයට ඇතුළු කර ඇතැයි  ඇතැයි පොලිසිය කියයි.

එම වෛද්‍යවරයාගෙන් ප්‍රතිකාර ගැනීමට ආ රෝගියකු වෛද්‍යවරයාට අනින්නට ඇතැයි පොලිසිය සැක කරයි.

වෛද්‍යවරයාගේ බෙල්ලට, මුහුණට සහ හිසට  පිහි පහරවල් 10ක් පමණ එල්ල කර ඇතැයි රෝහල් ආරංචි කියයි.

සිද්ධියෙන් තුවාල ලබා ඇත්තේ  මනෝ වෛද්‍ය විශේෂඥයකු වන මහතා බව පොලිසිය සදහන් කරයි.

වෛද්‍යවරයා අද පස්වරු 4.00 පමණ රෝහලේ සුපුදුරු සායන කටයුතුවල නිරත වෙමින් සිටියදී  රෝගියෙක් වශයෙන් පැමිණ ඇති මෙම සැකකරු කාමරය වෙත පැමිණ  එකවරම  සඟවාගෙන සිටි පිහියක් ඉවතට ගෙන වෛද්‍යවරයා වෙත එක දිගට පිහි පහර එල්ල කර ඇතැයි කියති.

වෛද්‍යවරයාගේ කෑගැසීමෙන් එම ස්ථානයට පැමිණි  පිරිස දැක සැකකරු පැන ගොස් ඇති අතර  රෝහලේ ආරක්ෂකයින් සහ එහි පැමිණ සිටි පිරිස් මහත් පරිශ්‍රමයක් යොදා සැකකරු මෙල්ල කර අත්අඩංගුවට ගෙන පොලිසියට බාර දී තිබුණි.

මෙම සැකකරු මීට පෙර ඉකුත් ඔක්තෝබර් මස නව වැනිදා ද රෝහලේදී වෛද්‍යවරයාට පහර දී තිබු අතර සැකරුගේ රෝගී තත්වය සැලකිල්ලට ගත් වෛද්‍යවරයා  සැකකරුට එරෙහිව පරීක්ෂණ සිදු නොකරන ලෙසට පොලිසියෙන් ඉල්ලා තිබුණු බව පොලිසිය පවසයි..

මෙම වෛද්‍යවරයා රෝගීන් පරීක්ෂා කිරීමේ දී  රෝගී සහ පෞද්ගලික ජීවන තොරතුරු වෙනත් අය දැනගැනීම  වැලැක්වීම සදහා රෝගීන් පරීක්ෂා කිරීමේ දී හෙදියක් හෝ  කාර්යමණ්ඩලයේ කිසිවකුගේ සහය ලබා නොගන්නා බවද රෝහල් ආරංචි මාර්ග කියයි.