හම්බන්තොට පසේ රසය අඩු වී ඇති බව දැනට කර ඇති පස් පරීක්ෂා කිරීම් වලින් අනාවරණය වී ඇතැයි හම්බන්තොට දිස්ත්‍රික් කෘෂිකර්ම අධ්‍යක්ෂක හේමන්ත අමරසිංහ මහතා හම්බන්තොට දිස්ත්‍රික් කාෂිකර්ම කමිටු රැස්වීමේදී පැවසීය.

අසීමිත ලෙස පසට රසායනික පොහොර යෙදීම නිසා පසේ කාබනික ගුණය පහළ වැටෙමින්  පවතී. සාමන්‍යයෙන් මෙතෙක් දැනට සිදු කර තිබෙන පස් සාම්පල් පරීක්ෂා කිරීම්වලින් අනාවරණය වී ඇත්තේ පසේ කාබනික තත්ත්වය 4% දක්වා අඩු වී තිබෙන බවයි.

වගා බිම් වලට කාබනික පොහොර නොයෙදීම වැඩිපුර රසායනික පොහොර යෙදීමට ගොවියා පුරුදුවී තිබීම මෙයට හේතුව බව හේමන්ත අමරසිංහ මහතා කීය.

හම්බන්තොට දිස්ත්‍රික්කයේ සෑම ප්‍රදේශයක්ම ආවරණය වන සේ  මෙම පස් පරීක්ෂා කිරීම් දැනට සිදු කර තිබෙන අතර සරු පස මෙසේ මැරුණු පසක් බවට පත්කිරීමෙන් අනාගතයේ දී බරපතල තත්ත්වයකට මුහුණ දීමට සිදු වීමට ඉඩ තිබෙන හෙයින් රසායනික පොහොර අසීමිත ලෙස යෙදීම අවම කරමින්  කාබනික පොහොර සඳහා යොමු කරවීමට ගොවියන් පෙළඹවීම් සිදුකරන බවද අමරසිංහ මහතා කීය.