මාතර රාහුල විද්‍යාලයයේ විදුහල්පති ලෙස කොළඹ ආනන්ද විද්‍යාලයයේ නියෝජ්‍ය විදුහල්පති ෆ්‍රැන්සිස් වෙලගේ මහතා පත් කිරීමට විරෝධය දක්වමින් අධ්‍යාපන අමැතිවරයා දැනුම්වත් කළ බව ලංකා ගුරු සංගමයේ ලේකම් ජෝසප් ස්ටාලින් මහතා පැවසීය.

ඔහු ගාල්ල විද්‍යාලෝක විද්‍යාලයයේ විදුහල්පති සමයේ සිද්ධි කිහිපයක් සම්බන්ධයෙන් පැවැත්වෙන විනය පරීක්ෂණ තවමත් අවසන්ව නැති බවත්, ආනන්ද විද්‍යාලයයේ සිසුවකුට පහර දුන් බව කියන සිද්ධියකට මාලිගාකන්ද උසාවියේ නඩුවක් පවතින බවත් ස්ටාලින් මහතා කීවේය.

විද්‍යාලයයේ අදි ශිෂ්‍ය සංගමයේ උප සභාපති ගැමුණු ද සිල්වා මහතා කීවේ අධ්‍යාපන පරිපාලන පළමු පන්තියේ නිලධාරියකු ඉවත් කර අධ්‍යාපන පරිපාලන තුන් වැනි පන්තියේ නිලධාරියකු විදුහල්පති ලෙස පත් කිරීම ගැන විරෝධය පළ කරන බවයි. අලුතින් පත් කළ පුද්ගලයා චෝදනා එල්ල වී සිටි කෙනකු බව ද ඔහු කියයි.

මේ ගැන කළ විමසීමක දී අධ්‍යාපන ඇමති අකිල විරාජ් කාරියවසම් මහතා පැවසුවේ රාහුල විදුහල්පති ලෙස වෙලගේ මහතා පත්කිරීම ගැන තමා නොදන්නා බවයි. පත්කිරීම්වලට තමා අතපෙවීම් නොකරන බවත්, අලුතින් පත් කළ විදුහල්පතිට දක්වන විරෝධතා සම්බන්ධයෙන් සොයා බලන බවත් අධ්‍යාපන ඇමති කීවේය.