ඩුබායි හි විදේශ රැකියා නියෝජිත ආයතනයකදී අමානුෂික ලෙස පහර කෑමට ලක්ව වූ බව කියන ශ‍්‍රී ලාංකික ගෘහ සේවිකාවකට  මෙරට   රැකියා නියෝජිත ආයතනයක්  විසින් රුපියල් ලක්ෂ එකහමාරක් වන්දි වශයෙන් ලබා දීමට එකගතාවය පල කොට තිබියදී  විදේශ සේවා නියුක්ති කාර්‍යංශයේ නිලධාරීන්  විසින් එය  වලක්වා    තමන් බොරුකාරියක් ලෙස සලකා කටයුතු  කළ බව  හපුතලේ  පී. ධම්මිකා  මහත්මිය  චෝදනා කරයි.

අබුඩාබි තානාපති කාර්‍යාලය මැදිහත්ව  තමන්ට මෙරටට පැමිණීමට පහසුකම් සැලැස්වු බවත් තමන්ට වූ අසාධාරණය  පිළිබඳ වාර්ථාවක්ද තානාපති කාර්‍යයාලය විසින්  විදේශ සේවා නියුක්ති කාර්‍යශයේ සභාපතිවරයාට යවා එහි පිටපත  අදාල නිලදාරින් වෙත  එවා තිබියදි කිසිත් නොදන්නා මෙන් මෙසේ  හැසිරීම නිසා  තමන් දැඩි මානසික පීඩනයකට පත් වූ බවත් ඇය ලංකාදීපයට කීවාය.

තමන් කිසිවකුගෙන් වන්දි නොඉල්ලූ බවත් විවිධ පීඩාවන් විද දිවයිනට පැමිණ ඉතා දුකින් කාලය ගතකරමින් සිටියදී මෙරට රැකියා නියෝජිත ආයතනයකින් කතාකොට රපියල් ලක්ෂ එකහමාරක වන්දියක්  දීමට කැමති බව ප‍්‍රකාශ කොට තමන්ට සිහිනයක් මවා පා   එය ලබාගෙන  විදේශ රැකියා නියෝජිත ආයතනයට විරුද්ධව ඇති පැමිණිල්ල  ඉවත් කරගන්නා ලෙස ඉල්ලූ බව ඇය කීවාය.

 රට රැකියාවට ගියේ විශ්ව විද්‍යාලයට තේරී සිටින දරුවා ඇතුළු දරු තිදෙනාට හොද අධ්‍යාපනයක්  ලබා දීමට  වුවද එහිදී විඳි කරදර හොදටම ප‍්‍රමාණවත් බැවින්  තවත් තැන තැන රස්තියාදු විය නොහැකි නිසා   ගමට වී පාඩුවේ ඉන්න දෙන ලෙසත් ඇය මෙරට රැකියා නියෝජිත ආයතනයට මුලින්ම පවසා ඇත. 

පසුව ඔවුන්  බත්තරමුලලේ පිහිටි විදේශ සේවා නියුක්ති කාර්‍යශයට යාමට වාහන කුලියද ගෙවන බවට පොරොන්දු වී සමථයකට පත් කර ගැනිමට එන ලෙස නිතර නිතර  පෙරැත්ත කිරීම නිසා  ඇය විදේශ සේවා නියුක්ති කාර්‍යංශයට ගොස් ඇත.

 
 ඩුබායි හි එම  විදේශ රැකියා නියෝජිත  ආයතනයට එරෙහි චෝදනා බරපතල බැවින්  ඒ  පිළිබද පුළුල් පරික්ෂණයක් සිදු කර  එය  තාවකාලිකව අත්හිටවුන ලෙස අබුඩාබි තානාපති කාර්‍යලය විසින් විදේශ සේවා නියුක්ති කාර්‍යංශයට කරන ලද දැනුම් දීමට අනුව මේ වන විට අදාල විදේශ රැකියා ආයතනය තාවකාලිකව අත්හිටුවා  ඇත.

අදාල  ආයතනය මින් පෙරද ගෘහසේවිකාවන් පස් දෙනෙකු සිර කර තබා ගෙන සිටියදී තානාපති කාර්‍යායාලය මැදිහත්ව මුදා  මෙවැනි දේ යලිත් නොකරන ලෙස අවවාද කර ඇති විදේශ රැකියා නියෝජිත ආයතනයක් බව කියති.

ධම්මිකා මහත්මිය ඇයට වූ අසාධාරණය පිළිබද  කියා සිටියේ
   ‘‘ මම  රැකියා නියෝජිත ආයතනයේ මහත්තයා කිවූ ලෙස බත්තරමුල්ල විදේශ සේවා නියුක්ති කාර්‍යංශයට ගියා.  එතන සමථ අංශයේ  නෝනා කෙනෙක් හිටියා.  රැකියා නියෝජිත ආයතනයේ මහතා වන්දි මුදල පිළිබඳව ඒ නෝනා සමග කතා කළා.  එවිට ඒ නෝනා මගෙන් ප‍්‍රශ්න කලා ඔයා කොහොමද ලංකාවට ආවේ කව්ද එව්වේ කියා. 

මම කිව්වා අබුඩාබි තානාපති කාර්‍යාලයේ  තානාපති මහින්ද බාලසූරිය මහත්තයත් පලමු ලේකම් සමරවීර මහත්තයත්, තෙවන ලේකම්  රුවන් මහත්තයත් මගේ ප‍්‍රශ්නය දන්නවා එයාලා තමයි මට පිහිට වෙලා මගේ ජීවිතය බේරලා  ලංකාවට එව්වේ කියලා. එහෙම එව්වේ නැත්නම් මගේ මළකඳ තමයි ලංකාවට එන්නේ කියාත් මම කිව්වා.

  එතකොට මගෙන් ඇහුවා තානාපති තුමා අපිට දැනුම් දීමෙන් තොරව කොහොමද ඔයාව ලංකාවට එව්වේ කියලා. මම කිව්වා ඒක මම දන්නේ නැහැ  අබුඩාබි තානාපති කාර්යාලයෙන් තමයි දැනගන්න  ඕනේ කියා.

පසුව ඇය කීවා අපිට වන්දි මුදල සම්බන්ධයෙන් තීරණය කරන්න බැහැ කියලා තවත් මහත්මයෙකු වෙත මා යොමු කලා.

ඔහු ඇහුවා ඔයා කියන්නේ ඇත්තද , බොරුද,  ඔයා කියන දේවල් අපි කොහොමද පිලිගන්නේ කියා. අපිට  ඔයාගේ විස්තර ඩුබායි කොන්සල් ජනරාල් කාර්‍යාලයෙන් එවා තියෙනවා. ඔයාට කොහොමද වන්දි මුදලක් දෙන්නේ කියා.

එවිට මා කිව්වා මට එහෙදි ගොඩක් කරදර කළා. මගේ බඩු මළු , මංගල මුද්ද  පවා හොරකම් කළා, මට හොදටම ගැහුවා, පයින් පවා මට ගැහැව්වා ඒ කරපු කරදර වලට ඔවුන් වන්දියක් දෙන්න තීරණය කරලා ඒක දෙන්නයි මේ මහත්තයා ඇවිත් ඉන්නේ කියා.

එවිට රැකියා නියෝජිත ආයතනයේ  මහත්තයාගෙන් ඇහුවා ඔයාට කව්ද මෙයාට වන්දි දෙන්න සල්ලි එව්වේ කියලා. එවිට ඔහු කිව්වා ඩුබායි විදේශ රැකියා ආයතනයේ කාන්තාවක් තමයි මගේ ගිනුමට මුදල් දාලා තියෙන්නේ කියා. 

එතකොට  කිව්වා මෙයාට එහෙම වන්දි දෙන්න බැහැ සභාපතිතුමාට දාලා මේ ප‍්‍රශ්නය විසදමු කියලා.  මට හුගක් දුක හිතුනා ඇයි මේ රැකියා නියෝජිත ආයතනයෙන්  වන්දි මුදලක් දෙන්න කැමති වෙලා එතනට ගියහම ඇයි ඒක දෙන්න ඉඩ නොදෙන්නේ කියලා.

අබුඩාබි තානාපති කාර්‍යයාලයෙන් මගේ ගැන විස්තරය එවා තිබියදීත් මොවුන් කිසි දෙයක් නොදන්නා ලෙස හැසිරෙන්නේ ඇයි දැයි කියා මට සිතාගන්න බැහැ.  මොවුන් මම පන බේරගෙන ආව විදිහ නෙමෙයි ඇහුවේ  ලංකාවට ආවේ කොහාමද කියන එකයි.  මම කාගෙන්වත් වන්දි ඉල්ලන්න ගියේ නැහැ. ඒජන්සියෙන් තමයි මට කරදර කරලා වන්දි දෙන්නම් කියලා බලාපොරොත්තු ඇති කරලා පාඩුවේ හිටපු මාව බත්තරමුල්ලට එක්කගෙන ගිහින් මේ වගේ අසරණ කරලා දැම්මේ. 

විදේශ රැකියා නියුක්ති කාර්‍යංශයෙන්  මා බොරුකාරියක ලෙසයි  කතා කළේ. මට බොරු කීමට අවශ්‍යතාවයක් නැහැ. මට ඒජන්සියෙන් කරපු කරදර දැකපු අය  ඕනා  තරම් සාක්ෂියටත් ඉන්නවා. අපිට අසාධාරනයක් වුනහම කියන්න ඉන්න එකම තැනත් මෙතනයි ඇයි මේ විදියට කරන්නේ.

අනිත් එක මම ලංකාවට ආවේ නිති විරෝධී විදිහට නෙමෙයි. අබුඩාබි තානාපති කාර්‍යාලය මැදිත්වෙලා මාව එව්වේ. එනකොට තානාපති මහින්ද බාලසුරිය මහතා දෙමවිපියන් මෙන මට කතා කොට කිවේ ලංකාවේ මේ සම්බන්දයෙන් කරදරයක් වු අවස්ථාවක මෙන්න මගේ කාඩ් එකක් මම හිටපු පොලිස් පති මේක පෙන්නන්න කියලත් කිව්වා.

හිගන්නෙකුට වුනත් ආධාරයක්, වන්දියක් කව්රුහරි දෙන්න හදනවා නම් ඒක දෙන්න ඉඩ අරින්න  ඕන නේදැයි ඇයි  අසා සිටින ඇය  ගැටළුවක් විසදා ගැනිමට දෙපාර්ශයව කැමති නම් තවදුරටත්  මැදිහත්මක් අවශ්‍යයද කියලත් මම ප‍්‍රශ්න කර සිටී. 

එ වගේම මේ පිළිබඳව අපක්ෂපාතී පරීක්ෂනයක් පවත්වන ලෙසත් මම බලධාරීන්ගේ ඉල්ලා සිටිනවා.  

මේ පිළිබඳව විදේශ සේවා නියුක්ති කාර්‍යංශයේ උසස් නිලධාරියෙකුගෙන් විමසූ විට ඔහු පැවසූවේ 

    ‘‘අපි ඇයට වන්දි මුදලක් දීමට විරුද්ධ වුනේ නැහැ. නමුත් එය තීරණය කරන්නේ අප නෙමෙයි සභාපති තුමා. 

මුදලේ ප‍්‍රමාණය තීරණය කරන්නෙත් සභාපති තුමා. රුපියල් ලක්ෂයක්ද, දෙකක්ද රුපියල් පනස්දාහක් ද ඇයට ලබා දෙන්නේ කියා තීරණය කරන්නේ කරන්නේ ඔහු.

දැන් මේ වන්දි ගෙවන්න හදන්නේ වෙනත් රැකියා  නියෝජිත ආයතනයක්. ඇයි වෙනත්  රැකියා නියෝජිත ආයතනයක් ඇයට  වන්දි ගෙවන්නේ.

අනිත් එක මේ කාන්තාව ඇත්තද  කියන්නේ කියලා අපි කොහොමද දන්නේ. ගැහුවා නම් වෛද්‍ය වාර්ථා තිබිය යුතුයි. ඇය ලග කිසිම  දෙයක් නැහැ.  ඇය ලංකාවට ආපු විදිහ සොයා බැලිය යුතුයි.  ඒකත් අපිට ප්‍රශ්නයක්. ඇයි හිටියේ ඩුබායි වල ඇය ඇවිත් තියෙන්නේ  වෙනත් තැනක ඉදලා. 

අපි ඇගේ ලිපි ගොනුව සභාපති තුමාට යොමු කර තියෙනවා‘‘. 
 
මේ පිළිබඳව ඇයට වන්දි මුදල ලබා දීමට කටයුතු කරන විදේශ රැකියා නියෝජිත ආයතනය පවසන්නේ
 

‘‘අපේ ආයතන වලින්  ඩුබායි වල රැකියා සඳහා යවන්නේ ඔය කියන රැකියා නියෝජිත ආයතනය හරහා.  මම යවපු  රැකියා වගයක් හිර වුනා. පස්සේ බැලූවා මොකද කියලා. එතකොට තමයි දැනගත්තේ  එම ආයතතනය ‘බ්ලැක් ලිස්ට්‘ කරලා කියලා. පස්සේ මම හේතුව බැළුවා. එතකොට තමයි දැනගත්තේ මේ කියන කාන්තාවගේ ප‍්‍රශ්නයක් නිසා මෙය සිදුවූ බව.

ඉතින් මම කල්පනා කළ ඇයට යම් කිසි අසාදාරණයක් සිදු වු තිබෙනවා නම් ඇයට වන්දි මුදලක් දී පැමිණිල්ල ඉවත් කරගත්තම නැවත අපිට රැකියා සඳහා යැවීමේ පහසුකම ලැබෙනවා.

ඒ නිසා මම ඇයට කතා කොට ඇයට  විදේශ සේවා නියුක්ති කාර්‍යංශයට  වාහනයකින් පැමිණීමට මුදල් පවා දුන්නා.  

 ඇත්තටම  ඇය ගිහින් තිබුනේ මගේ  රැකියා  නියෝජිත ආයතනයෙන් නෙමෙයි වෙනත් එකකින්. විදේශ සේවා නියුක්ති කාර්‍යංශයට මම කිව්වේ ඩුබායි වල රැකියා නියෝජිත ආයතනය බැල්ක් ලිස්ට් කරපු නිසා මට විශාලා පාඩුවක් වෙලා තියෙනවා. මෙතන තියෙන්නේ එක් අයෙකුගේ ප‍්‍රශ්නයක් ඒක වන්දියක් දීලා හරි විසදා ගත්තා නම් ප‍්‍රශ්නය ඉවරයිනේ කියා.

මේ ප‍්‍රශ්නය නිසා මට අද වෙනකොට රුපියල් ලක්ෂ විස්සක් විතර පාඩු වෙලා තියෙනවා. ඩුබායි වලට යවන  රැකියා එකින් එක හිරවෙනවා. එක් ආයතනයක් කරපු වැරැද්දක් නිසා ආයතන ගනනාවක රැකියා අවහිර වෙනවා.
අර කාන්තාවට අසාදාරණයක් සිද්ද වෙලා තියෙනවා නම් අපි මග අරින්නේ නැහැ. ඇයට උදව් කිරීම අපේ යුතුකමක්.  මොකද මේ ප‍්‍රශ්නය ගැන මම අබුඩාබි තානාපති කාර්‍යාලයේ සමරවීර මහත්තයාටත්  කතා කළා. තානාපති  මහින්ද බාලසූරිය මහත්මයා වුනත් මේ ප්‍රශ්නය දිහා අවදියෙන් ඉන්නේ.

විදේශ සේවා නියුක්ති කාර්‍යංශයෙන් මෙයාට දෙන්න ගිය මුදල් අවහිර කළේ නැහැ. ඔවුන් කිව්වේ මෙයාට දෙන වන්දි මුදල තීරණය කරන්න අපිට බැහැ. එය තීරණය කරන්නේ සභාපති තුමා ඒ නිසා අපි මේක සභාපති තුමාට දානවා කියලයි.

ඔය කියන ඩුබායි වල රැකියා නියෝජිත ආයතනයේ කාන්තාව මා පෞද්ගලිකව හදුනන්නේ නැහැ. ඇය මට මුදල් එව්වේ නැහැ.  නමුත් මේ ප්‍රශ්නය විසදා ගන්න මා ඇය වෙනුවෙන් මුදල් ලබා දෙන්න සුදානම් යනුවෙන් ද ඔහු පැවසුවේය.