ශ්‍රී ලංකාවේ ජීවත් වන වතුකරයේ තරුණයන් කණ්ඩායමක් විස්සයි විස්ස ලෝක කුසලාන තරගාවලියේ තරග වදින ශ්‍රී ලංකා කණ්ඩායම වෙනුවෙන් සුභපැතුම් එක්කරමින් "ඔබ දිනුවත් පැරදුණත් සැමදා අපි ඔබ ළඟයි"තේමාවෙන් සිංහල දමිළ භාෂාවලින් යුත් ගීතයක් නිර්මාණය කර ඇත.

දික්ඔය, දරවල වත්තේ පහළ කොටසේ ජෝෂප් ප්‍රදීප් (අවු. 23) සිංහල සහ දමිළ භාෂාවෙන් ගීතය නිර්මාණය කර තනුව සහ සංගීතයද ඔහු විසින් නිර්මාණය කර ඇත. එම ගීතයට ඔහු සමග ක්‍රිකට් ක්‍රීඩාවේ නිරත වන එම ප්‍රදේශයේම වසන්ත මෝගන් කන්දිවාල්, බෙනඩික් හර්ෂ මධුසංඛ, ජෝෂප් ප්‍රසාන්, මාර්ක් ලියෝ, ගනේෂන් තියගරාජ්, අලගසාම් ජයසිහරන් යන අයද සම්බන්ධ කර ගනිමින් මෙම ගීතය සංයුක්ත තැටියක් ලෙස එළිදක්වා ඇත.

ඒ සඳහා බොහෝ පිරිසකගෙන් එකතු කර ගත් මුදලින් රුපියල් ලක්ෂයක පමණ වියදමක් දරමින් තේ වතු ආශ්‍රිතව ජීවත් වන වතුකරයේ කුඩා ළමයින් හා වතු කම්කරුවන් ගීතයේ දර්ශන සඳහා දායක කරගෙන ඇති අතර, එම ගීතය වතුකරයේම රූගත කර ඇත.

දැඩි කැපවීමක් කර ශ්‍රී ලංකා කණ්ඩායම වෙනුවෙන් නිර්මාණය කළ මෙම ගීතය ශ්‍රී ලංකා කණ්ඩායමට පිළිගැන්වීමට අවස්ථාවක් නොලද බව පවසන එහි නිර්මාණකරුවන් පවසන්නේ, අන්තර්ජාලයට මුදාහැර ඇති එම ගීතය අසා ශ්‍රී ලංකා කණ්ඩායම එය පිළිගන්නේ නම් එය තමන්ට සතුටට කරුණක් බවයි.

ඡායාරූප / සටහන - හැටන් රංජිත් රාජපක්ෂ