අතුරුදන් වූ තැනැත්තන් පිළිබඳ කාර්යාල කෙටුම්පතට ඒකාබද්ධ විපක්‍ෂය ඉදිරිපත් කළ සංශෝධන සියල්ලම පාහේ පිළිගත් බව නිපුණතා සංවර්ධන හා වෘත්තීය පුහුණු අමාත්‍ය මහින්ද සමරසිංහ මහතා පැවසීය.

ජනාධිපතිවරයා ඉදිරිපත් කළ සංශෝධන අනුව එම පනත් කෙටුම්පතෙහි 7 වැනි පිටුවේ 11 වැනි වගන්තියේ 21 වැනි පේළියේ සිට 29 වැනි පේළිය දක්වාම ඉවත් කළ බව කී අමාත්‍යවරයා උසාවි වරෙන්තුවක් නොමැතිව හමුදා කඳවුරකට හෝ කිසියම් ස්ථානයකට ඇතුළුවීමට අතුරුදන්වූවන්ගේ කාර්යාලයට දී තිබූ අවස්ථාව, දේශීය හෝ ජාත්‍යන්තර මුදල් අවශ්‍ය පරිදි ලබාගැනීමට ඔවුන්ට දී තිබූ ඉඩකඩ අහිමි කැර ඇති බව ද අමාත්‍යවරයා කීවේය.

තවත් සංශෝධන තිබේනම් ඒවා ඉදිරිපත් කිරීමට කාලය ලබාදී තිබියදීත් ඒකාබද්ධ විපක්‍ෂය පාර්ලිමේන්තුවේ කෑ කෝ ගසමින් සෙංකෝලය පැහැර ගැනීමටත්, සභාවේ කටයුතු කඩාකප්පල් කිරීමටත් උත්සාහ කළ බව කී අමාත්‍යවරයා ඔවුන්ගේ හැසිරීම අනුමත කළ නොහැකි බව ද සඳහන් කළේය.

පනත් කෙටුම්පත සම්මතවීම පාර්ලිමේන්තු සම්ප‍්‍රදාය අනුව සිදුවූ බව ද කී සමරසිංහ මහතා එම ක‍්‍රමවේදයේ කිසි`දු වරදක් සිදුවූයේ නැතැයි ද පෙන්වා දුන්නේය.