මීට වසර මිලියන 155කට පමණ පෙර අතුරුදන් වූ ආර්ගොලෑන්ඩ් නම් මහාද්වීපයේ කොටස් අග්නිදිග ආසියාවෙන් සොයා ගැනීමට විද්‍යාඥයන් කණ්ඩායමක් සමත් වී ඇත.

ආර්ගොලෑන්ඩ් මහද්වීපය මිට වසර මිලියන 155කට පමණ පෙර ඇමෙරිකා එක්සත් ජනපදයටත් වඩා විශාල භූමි ප්‍රමාණයක කොටසක් වී ඇති බවත් කාලයත් සමඟ ආර්ගොලෑන්ඩ් එම භූමියෙන් කැඩී වෙන්වී ඇති බවත් එම විද්‍යාඥයෝ ප්‍රකාශ කළහ.

එලෙස වෙන්වුණු ආර්ගොලෑන්ඩ් මහද්වීපයද කාලයත් සමඟ කොටස් කීපයකට කැඩී වෙන්වී අග්නිදිග ආසියාවේ පැතිර ඇතැයි මෙම පර්යේෂණය සම්බන්ධයෙන් පළකළ ලිපියේ සඳහන් වේ.මෙම කොටස් මුලින් ඕස්ට්‍රේලියාවේ කොටසක් වී ඇති බවත් කාලයත් සමඟ එම කොටස් ඉන්දුනීසියාවේ නැගෙනහිර දෙසට ගමන් කර ඇති බවත් එම විද්‍යාඥයෝ පවසති.

මෙම පර්යේෂණයට අදාළ ලිපිය පළකළ කණ්ඩායමේ ප්‍රධානියා වූ නෙදර්ලන්තයේ යූට්‍රැක්ට් විශ්ව විද්‍යාලයේ භූ විද්‍යාඥ එල්ඩට් ඇඩ්වොකාට් ප්‍රකාශ කර සිටියේ මෙම භූමි කොටස් පිළිබඳ තිබූ දත්ත ප්‍රමාණය ඉතාමත් අවම වීම හේතුවෙන් අභියෝග රැසකට මුහුණ දුන් බවත් ඒ හේතුවෙන් ආර්ගොලෑන්ඩ් නම් මහාද්වීපය පිළිබඳ පර්යේෂණය වසර 7ක කාලයක් පුරා දිව ගිය බවත්ය.