පසුගිය 13 වැනිදා ජනප්‍රිය "Empire" ටෙලි කතා මාලාවේ සංගීත අධ්‍යක්ෂ "ජිම් බීන්ස්" සහ "අපාචේ ඉන්දියන්" කොළඹ නගරය රැඟුමින් ගැයුමින් වසඟයට පත් කළහ.

සිය මිශ්‍ර "Fusion" සංගීත ශෛලිය තුළින් ජනප්‍රියත්වයට පත් ඉංග්‍රීසි "Ragga" තරුවක් වන "අපාචේ ඉන්දියන්", Cinnamon Hotels Resorts හි සංකල්පයක් අනුව EGB සහ Litro Gas හි අනුග්‍රහයෙන් සංවිධානය කරනු ලබන 2016 Dulux Ambiance Miss Intercontinental රූ රැජින තරගාවලියේදී ග්‍රැමී සම්මාන නිර්දේශිත සංගීත අධ්‍යක්ෂ ජිම් බීන්ස් සමගින් තරු පිරි විනිශ්චය මණ්ඩලයකටද එක් වූ අතර, ඒ රත්මලාන ස්ටයින් ස්ටුඩියෝ හිදී මෙවර මෙම රූ රැජින තරගාවලියේ 45 වැනි සංවත්සරය සමරමිනි.

රූ රැජින තරගාවලියෙන් අනතුරුව පැවති පසු සාදයකදීද "අපාචේ ඉන්දියන්" ගී ගැයූ මෙම තරගාවලියට රටවල් හැත්තෑවකට අධික ප්‍රමාණයකින් රූමතියන් ඉදිරිපත් වූ අතර, ඉන් අනතුරුව ඔහු ශ්‍රී ලංකාවේදී සිය නවතම ගීත ඇල්බමයේ ගීත දෙකක් රූගත කිරීමටද නියමිතය. මෙම රූප රචනාවලට දකුණුදිග වෙරළ තීරයේ පවතින Cinnamon Resort හි HikkaTranz by Cinnamon ද පසුබිම් වන අතර, මෙම ගීත සඳහා ජනප්‍රිය ගායිකා "ඩෙස්ටිනි" ගායනයෙන් දායක වන අතර, ඒවායේ නිෂ්පාදනය ජිම් බීන්ස්ගෙනි.

ජිම් බීන්ස් සහ අපාචේ ඉන්දියන් විසින් මෙහෙයවනු ලැබූ සංගීත වැඩමුළුව සහ ප්‍රශ්නෝත්තර සැසියක්ද පසුගිය 15 වැනිදා පැවති මෙහිදී දැවැන්ත සංගීතවේදීන් සමග අදහස් හුවමාරුකර ගැනීමේ අවස්ථාවක්ද ශ්‍රී ලාංකික සංගීතලෝලීන් වෙත උදා විය. එහෙත් එම අවස්ථාව හිමි වූයේ ආරාධිතයන්ට පමණක් සහභාගි විය හැකි වැඩසටහනක් ලෙසින් වීම කැපී පෙනේ. එනම් ඒ සඳහා ක්ෂේත්‍රයේ සුපිරි තරු එක් වූ අතර Cinnamon Hotels Resorts මගින් සංවිධානය කරන ලද එම වැඩසටහන ඔස්සේ ශ්‍රී ලාංකික සංගීත ක්ෂේත්‍රයට ජාත්‍යන්තර සංගීතය පිළිබඳ දැනුවත් කිරීම අපේක්ෂිත අරමුණ වී ඇත. ඒ අනුව එම අවස්ථාව සංවිධානය කරනු ලැබුවේ Western Music Association Sri Lanka, Yes Fm සහ Home Grown සහයෝගීතාවයෙන් යුතුවය.

බ්‍රිතාන්‍ය ගායක "අපාචේ ඉන්දියන්" සිය නැගෙනහිර ඉන්දියානු උරුමයෙන් එන "භන්ග්‍රා" ශෛලිය සමග Ragga සංගීත ආර මුසු කරමින් ගීත ගායනා කරන්නෙකු වන අතර, එක්සත් රාජධානියේ රඟහල්වල සිය සංගීතය ප්‍රචලිත කිරීමෙන් අනතුරුව ඔහු, අනූව දශකයේ මුල් භාගයේදී තනි ගීත නිකුත් කිරීම ඇරඹුවේය. මෙම තනි ගීතවලින් බොහොමයක් 1993 දී නිකුත් කෙරුණු ඔහුගේ පළමු ප්‍රධාන ලේබලයේ ඇතුළත් වන අතර එයට ඔහු වෙත නව අන්වර්ථ නාමයක් පටබැඳුණු "ඩොන් රාජා" ගීතයද ඇතුළත්ය.

මෝස්තර නිරූපණය,සංචාරක ඡායාරූප ශිල්පය, සූපශාස්ත්‍ර ආදී ‍විවිධ ක්ෂේත්‍ර අලලා සුවිශේෂී වැඩසටහන් සංවිධානය කරන Cinnamon හි මෙවර තෝරාගැනීම බවට පත් වී ඇත්තේ සංගීත ක්ෂේත්‍රය වන අතර, ග්‍රැමී සම්මානය සඳහා නිර්දේශිත ජිම් බීන්ස් සහ සිය "Boom-Shak-A-Lak" ගීතයෙන් ශ්‍රී ලංකාව තුළ ජනප්‍රිය වූ "අපාචේ ඉන්දියන්" ශ්‍රී ලංකාවට කැඳවීම සිදුවන්නේ එවන් පසුබිමක් තුළයි.

එබැවින් මෙහි වැදගත්ම අරමුණ වී ඇත්තේ ජාත්‍යන්තර ගායකයන්ගේ රූප රචනා හරහා ශ්‍රී ලංකාවේ චමත්කාරය ලොවට ප්‍රදර්ශය කිරීම බව Cinnamon Hotels Resort හි සන්නාම අලෙවි ප්‍රධානී දිලිප් මුද්දෙණිය මාධ්‍යවේදීන්ට පැවසුවේය.

සටහන - මාලන් විදානපතිරණ

​