(අජිත්ලාල් ශාන්තඋදය)

සබරගමු මහ සමන් දේවාලයේ වාර්ෂික ඇසළ පෙරහර මංගල්‍යය මෙවර මහජන සහභාගිත්වයකින් තොරව චාරිත්‍රවලට මුල්තැන දෙමින් සියලු අංග ඇතුළත්ව මේ මස 08දා සිට ආරම්භ කරන බව බස්නායක නිළමේ මිගාර ජයසුන්දර මහතා පැවසුවේය.

පෙරහර ආරම්භ කිරීම සංකේතවත්ව පවත්වන සර්වරාත්‍රික පිරිත් දේශනනාව අද  (6) පැවැත්වු බවත් හෙට  (07) මහා සංඝරත්නය විෂයෙහි සාංඝික දානය පවත්වන බවත් බස්නායක නිළමේවරයා පැවසුවේය.

සැප්තැම්බර් 08දා කප් සිටුවනු ලබයි. සැප්තැම්බර් 08 දා සිට 10වෙනිදා දක්වා කුඹල් පෙරහර ද, සැප්තැම්ර් 11දා සිට 15දා තෙක් වීදි පෙරහරද, සැප්තැම්බර් 16දා සිට 20දා දක්වා මහ පෙරහර ද පැවැත්වෙන බව මිගාර ජයසුන්දර බස්නායක නිලමේවරයා සඳහන් කළේය.

සැප්තැම්බර් 21දින දියකැපීමේ පෙරහර පවත්වා පෙරහර යළි ගෙවදීමෙන් අනතුරුව 2021 සබරගමු මහ සමන් දේවාලයේ ඇසළ පෙරහර මංගල්‍යය නිමාවට පත්වන බවද බස්නායක නිළමෙවරයා පෙන්වා දුන්නේය.

සබරගමු මහ සමන් දේවාලයේ ඇසළ මහා පෙරහර මංගල්‍ය 2020 වසරේ සිට ජාතික පෙරහරක් ලෙස නම්කර ඇති නිසා පෙරහර රාජ්‍ය අනුග්‍රහයෙන් පැවැත්වෙන බව ද බස්නායක නිළමෙවරා පැවසුවේය. මෙවර පෙරහර පැවැත්වෙන්නේ 796 වන වරට බව ද බස්නායක නිළමේවරයා සඳහන් කළේය. සබරගමු පළාත් ආණ්ඩුකාර ටිකිරි කොබ්බෑකඩුව ප්‍රධානත්වයෙන් සහ රත්නපුර දිස්ත්‍රික් ලේකම් මාලනී ලොකුපෝතාගම මහත්මියගේ සහභාගිත්වයෙන්  06දා ඒ පිළිබඳ සාකච්ඡාවක් ආණ්ඩුකාර කාර්යාල ශ්‍රවනාගාරයේ දී පැවැත්විනි.

එහිදී පවතින කෝවිඩ් වසංගත තත්ත්වයන් සැලකිල්ලට ගනිමින් මහ සමන් දේවාලයේ පෙරහර මහජන සහභාගිත්වයකින් තොරව පැවැත්වීමට තීරණය විය. එසේම ඊට සහභාගිවන සියලුම ශිල්පීන් සහ ශිල්පිනියන් සියලුදෙනා ඔවුන්ට සහ ඔවුන්ගේ ළඟම ඥාතීන් මාස දෙකක කාලයක් තුල කෝවිඩ් ආසාදනය නොවු බවට සහ නිරෝධායනය නොවන බවට ඔවුන් පදිංචි කොට්ඨාසයේ මහජන සෞඛ්‍ය පරීක්‍ෂකවරයාගෙන් සහතිකයක් ඉදිරිපත් කළ යුතු බවට ද තීරණය විය.

පෙරහර මංගල්‍යයට නර්ථන කණ්ඩායම් 17ක් පමණ සහභාගිවනු ලබයි. අලි ඇතුන් 15ක් ද එක් කරගැනීමට නියමිතය. රාජකාරීකරුවන් සමග මහ පෙරහරට දහසකට ආසන්න පිරිසක් එක්වීම සමාන්‍ය සිරිතය.

එසේම පෙරහරට සහභාගිවන සියලුම ශිල්පීන් සහ ශිල්පිනියන් පෙරහර පැවැත්වීමට පෙර රැපිඩ් ඇන්ටිජන් පරීක්‍ෂාවකට ලක්කිරීමට ද මෙහිදී තීරණය විය. එසේම නර්ථන ශිල්පීන් පෙරහරට එක්වීමට පෙර මනා සෞඛ්‍යයකින් යුතු ද යන්න විමසා බැලීමට සෞඛ්‍ය පරීක්‍ෂණයක් පැවැත්වීමටත්, දේවාල පරිශ්‍රයට තාවකාලිකව වෛද්‍යවරයෙක් අනුයුක්ත කිරීමට ද මෙම රැස්වීමේ දී තීරණය විය.

පෙරහර ගමන් කරන මග දෙපස පිහිටි නිවෙස්වලට පෙරහර කාලය තුල පිටස්තරින් කිසිදු අමුත්තෙකු නොදැඳවන ලෙස සෞඛ්‍ය වෛද්‍ය නිලධාරීවරුන් මාර්ගයෙන් දැනුම්දීමටත් එම නියමය කඩකරන පදිංචිකරුවන්ට නිරෝධායන නීති යටතේ නීතිමය පියවර ගැනීමටත් මෙහිදී තීරණය විය.

දියකැපීමේ පෙරහර දේවාල පරිශ්‍රයෙන් පිටත රත්නපුර පානදුර පාරේ කොටාඹේ දක්වා ගමන්කරන අතර දියකැපීමේ පෙරහර කලුගඟ දිගේ ඉහළට ගමන්කරයි. රතඹලා ඇල්ලෙන් දියා කපා ආපසු එන පෙර නැවත ගඟ දිගේ ඇවිත් කොටාඹෙන් යළි රත්නපුර පානදුර පාරට පැමිණ දේවාල පරිශ්‍රයට ඇතුලුවී දේවාලයට ගෙවදීමෙන් අනතුරුව පෙරහර මංගල්‍යය නිමාවට පත්වෙයි.