ගාල්ල සවුත්ලන්ඩ්ස් විද්‍යාලයයේ පළමු ශ්‍රේණියට තෝරා පත් කර ගත් බව විදුහල්පතිනි ශාන්ති සෙනවිරත්නගේ ලිඛිත දැනුම්දීම මත  පාසලට පැමිණි සිසුවියන් 50 දෙනකු අතුරෙන් හතර දෙනකු පමණක් බාර ගෙන ඉතිරි පිරිස ඇය විසින්ම නැවත හරවා යවනු ලැබ ඇතැයි දෙමාපියෝ පිරිසක් චෝදනා කරති.

දරුවා පාසලට තෝරාගෙන ඇතැයි දැනුම් දුන් නිසා පෙර සිටි පාසලෙන් ඉවත් කරගෙන ළමයා රැගෙන ආ බව දෙමාපියෝ පවසති.

2016 මාර්තු 23 වැනි දාතමින් යුතු ලිපියක් යවමින් විදුහල්පතිනිය දෙමාපියන්ට දැනුම් දී ඇත්තේ ඔවුන්ගේ දරුවන් පාසලේ පළමු ශ්‍රේණියට තෝරා ගැනීමට තීරණය කර ඇති බවයි.  පාසල් නිල ඇඳුමෙන් දියණිය පාසලට එවන ලෙස ඇය දන්වා ඇත.

ඒ අනුව ගිය පසු විදුහල්පතිනිය එවන ලද ලිපිය නැවත ගෙන ළමයින් ගැනීමට නොහැකි බව දන්වා ආපසු හරවා යවා ඇත.

විදුහල්පතිනි ශාන්ති සෙනවිරත්න කීවේ තමාට මාරුවක් ලැබී ඇති නිසා ළමයින් ඇතුළු කිරීමට අමාත්‍යංශයෙන් අවසර ලබා ගත යුතු බවයි. මෙම ලිපිය යැව්වේ ස්ථාන මාරු කිරීමට පෙර බව ද ඇය කියන්නීය.

ඇය එසේ කීවද ඇය ස්ථාන මාරු කරනු ලැබූවේ මාර්තු 17 වැනි දා වන අතර ඇය ලියුම යවා ඇත්තේ මාර්තු 23 වැනිදාය.

මෙම විදුහලේ වැඩ බාර ගැනීමට පැමිණි නව විදුහල්පතිනි සන්ද්‍යානි පතිරවසම් මහත්මියට වැඩ බාර දීම ශාන්තිනී සෙනවිරත්න ප්‍රතික්ෂේප කළාය.