(රන්ජන් කටුගම්පොල)

අධිකරණයට අපහාස කිරීමේ චෝදනා මත රක්ෂිත බන්ධනාගාරගත කර සිටින තමන්ට ජීවිත තර්ජන එල්ල වී ඇති බැවින් තමන්ව ඇප මත මුදා හරින ලෙස නීතිඥභවය අත්හිටුවා සිටින සුසිල් ජයතුංග මහතා  අද ශ්‍රේෂ්ඨාධිකරණයන් ඉල්ලා සිටියේය.

නීතිඥවරයා මෙම ඉල්ලීම සිදු කරනු ලැබුවේ ඔහුට එරෙහිව ගොනුකොට තිබූ පැමිණිල්ල  ශ්‍රේෂ්ඨාධිකරණ විනිසුරුවරුන් ගාමිණී අමරසේකර, දිලීප නවාස් සහ ශිරාන් ගුණරත්න යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල හමුවේ කඳුළු අවස්ථාවේ දිය.

එම අවස්ථාවේදී බන්ධනාගාර නිලධාරීන් විසින් අධිකරණයට ඉදිරිපත් කර තිබූ මේ වනවිට නීතිඥභාවය අත්හිටුවා සිටින සුසිල් ජයතුංග මහතා විවෘත අධිකරණයේ කරුණු දක්වමින් තම ජීවිතයට තර්ජන එල්ල වී තිබෙන බව කියා සිටියේය.

"ස්වාමීනී මම බන්ධනාගාරයේ සිටින්නේ බයෙන්. බ්ලේඩ් තලයකින් මගේ බෙල්ල කපා හෝ මගේ ජීවිතයට හානි කරන්න පුළුවන්" යනුවෙන් සඳහන් කළ ඒ මහතා තමන්ව ඇපමත මුදා හරින ලෙසත් අධිකරණයෙන් ඉල්ලා සිටියේය.

එම අවස්ථාවේදී ශ්‍රේෂ්ඨාධිකරණ විනිසුරු ගාමිණී අමරසේකර මහතා " අපෙත් බෙල්ල කපයිද දන්නේ නෑ" යනුවෙන් සඳහන් කළේය.

ඊට පිළිතුරු දුන් ජයතුංග මහතා "ස්වාමීනී.. මම නම් එහෙම කරන්නේ නෑ" යනුවෙන් කියා සිටියේ ය.

මේ සම්බන්ධව වෙනත් පැමිණිල්ලක් සැප්තැම්බර් 13 වැනි දින කැඳවන බැවින් එදිනට මෙම පැමිණිල්ල කැඳවන ලෙස අධිකරණයෙන් නියෝග කෙරිණි.