(ප්‍රදීප් කුමාර ධර්මරත්න)

උස්සාපිටියේ පාසලක සිසුවකුට කොවිඩ්- 19  වයිරසය ආසාදනය වීම නිසා ඔහු  ඉගෙනුම ලැබු පංතියේ පංතිභාර ගුරුතුමියටද වයිරසය ආසාදනය වී ඇතැයි අරණායක සෞඛ්‍ය වෛද්‍ය නිලධාරි වෛද්‍ය රසාංජන මෙන්ඩිස් මහතා අද(16) පැවසීය.  

මේ නිසා එම පාසලේ දෙක ඩී පංතිය තාවකාලිකව වසා දමා පංතියේ ඉගෙනුම ලැබු සිසුන් සියලු දෙනා ස්වයං නිරෝධායනයට යොමු කිරීමට කටයුතු කළ බවද සෞඛ්‍ය වෛද්‍ය නිලධාරිවරයා කිය.

අරණායක උස්සාපිටිය  දාස්වත්ත ප්‍රදේශයේ පදිංචි ශිෂයෙකු  මෙලෙස අසාදනය වී ඇත.

පංතිභාර ගුරුතුමිය සහ සිසුන් නිවෙස් තුළ ස්වයං නිරෝධායනයට යොමු කර සිටියදි ගුරුතමිය පී.සී.ආර් පරීක්ෂණයකට යෙමු කිරීමෙන් පසු ඇයට ද කොවිඩ්- 19 ආසාදනය වී ඇති බව ඊයේ රාත්‍රියේ ලැබුණු වාර්තාවලින් තහවුරු වී ඇති බවද වෛද්‍ය රසාංජන මෙන්ඩිස් මහතා පැවසීය.

සිසුවා දින කිහිපයකදි අසනීපව මාවනැල්ල රෝහලට ඇතුළත් කිරීමෙන් පසු ඔහුට වයිරසය ආසාදනය වී ඇති බව රොහලේ සිදුකළ පී.සී.ආර්  පරීක්ෂණයේදි තහවුරු වී තිබේ.

මෙම සිසුවාට පවුලේ සමීපතමයෙකු මගින් ආසාදායනය වී ඇති බවද,  සිසුවා දින කිහිපයක්ම පාසලට පැමිණ ඇති බවද එලෙස පැමිණි සෑම දිනයකම පංතිභාර ගුරුතුමිය මෙම සිසුවා ද ඇය ළඟට කැදවා අකුරු කියා දී ඇති බවද පැවසේ.

ආසාදිත ගුරුතුමිය ප්‍රතිකාර සදහා කොවිඩ් ප්‍රතිකාර මධ්‍යථානයක් වෙත අද(16) යොමු කිරීමට කටයතු යොදා ඇත.