නිරූපණ ක්ෂේත්‍රයෙන් යායුතු ඉහළම ස්ථානයේ ජයග්‍රහණය හිමිකර ගත් ඇය ඉමායා ලියනගේය. මිස් ශ්‍රී ලංකා තරගයක් තුළදී ඉතිහාසයේ පළමුවැනි වරට ජනප්‍රිය කිරුළ මෙන්ම, මිස් ශ්‍රී ලංකා කිරුළද හිමිකරගත් එකම යුවතියද වන්නේද ඇයයි. ඇය වර්තමානය වන විට රංගන ශිල්පිනියක් ලෙස කටයුතු කරන අතර, ඉදිරියේදී ඇයගෙන් නිරූපණ ක්ෂේත්‍රයේ නවකයනට කදිම අවස්ථාවක් ලබාදීමට තීරණය කර ඇත. ඒ පිළිබඳව සහ ඇගේ රංගන කටයුතු පිළිබඳව අද සමග යෙදුණු කතාබහකි මේ.

මේ දිනවල වැඩකටයුතු කොහොමද?

මේ දිනවල නම් ටෙලිනාට්‍යවල වැඩකටයුතු කරගෙන යනවා. ඊට අමතරව මේ මාසයේ මැද වගේ මගේ පළමුවැනි චිත්‍රපටයේ රූගත කිරීම් පටන් ගන්නවා. දෙවැනි චිත්‍රපටය ජුනි මාසයේ කරන්න ඉන්නේ. මැයි මාසයේ මගේ මොඩ්ලින් ඇකඩමි එක පටන් ගන්න හිතන් ඉන්නවා.

මෙතෙක් දායක වූ ටෙලිනාට්‍ය?

මගේ පළමුවැනි ටෙලිනාට්‍ය තමයි දෙරණ රූපවාහිනියේ විකාශනය වන %අංකල් සෑම්^ ටෙලිනාට්‍යයි. ඊට පස්සේ මම දායක වුණා රූපවාහිනියේ ටෙලි නාට්‍යයක් "ළබැඳියේ" කියලා. එහි මේ දිනවල රූගත කිරීම් නැහැ. නමුත් %අංකල් සෑම්^ එකේ නම් දිගටම රූගත කිරීම් කරගෙන යනවා.

ටෙලි නාට්‍ය සඳහා අවතීර්ණය ගැන කතා කළොත්?

මම මිස් ශ්‍රී ලංකා වුණාට පස්සෙ හැම පත්තරයකම වගේ මුල් කවරයේ ඡායාරූපයක් පළවුණා. ඉතිං නිල්වලා එකෙන් තමයි මට මුලින්ම ආරාධනාවක් කළේ. ඒ තරුණි පත්තරේ මුල් කවරය දැකලා. නමුත් එහෙම ආරාධනාවක් ලැබිලත් සෑහෙන කාලයක් ගියා නාට්‍යයක් සඳහා දායක වෙන්න. ඉන්පස්සෙ තමයි "අංකල් සෑම්" නාට්‍ය සඳහා සම්බන්ධ වෙන්නේ.

මිස් ශ්‍රී ලංකා කිරුළ සහ එම තරගය පිළිබඳව මතක් කළොත්?

මිස් ශ්‍රී ලංකා කිරුළ ගැන කතා කරනවා නම්, 2013 මිස් ශ්‍රී ලංකා තරගයේදී ජයග්‍රහණය කරන්න ලැබුණේ නැහැ. නමුත් අන්තිම දොළොස් දෙනා අතරට තරග කරනු ලැබුවා. 2013 ජයග්‍රහණයක් හම්බුණේ නැතිවුණත් මම අදහස අතහැරියේ නැහැ. ඊට පස්සෙ 2014 දී මම නැවතත් දෙරණ මිස් ශ්‍රී ලංකා තරගයට අයදුම් කළා. ඉතිං අපි මාස තුනක කාලයක් තරගයක් සඳහා කොහොමද සූදානම් වෙන්නේ කියලා පුරුදු පුහුණුවීම් කළා.

අපි කනබොන විදිහ, ඇවිදින විදිහ, අනිත් අයත් සමග කතා කරන විදිහ යන කාරණා හැමදෙයක්ම පුරුදු පුහුණු වෙන්න සිද්ධ වුණා. බියුට් ක්වීන් කෙනෙක් කියලා කියනකොට ජයග්‍රහණය කරන කෙනා ජාත්‍යන්තරයට යන්න ඕන. අනෙක් රටවල් එක්ක තරග කරන්න ඕන. මේ හැමදෙයක් පිළිබඳවම මාස තුනක කාලයක් පුහුණුවක් හම්බ වුණා. අන්තිම වටයට යන විට පහළොස් දෙනෙක් හිටියා. ඒ පහළොස් දෙනා අතරින් මට ජයග්‍රහණය කරන්න හම්බවුණා. ඒ එක්කම ජනප්‍රිය තරගකාරියට ලැබිය යුතු සම්මානයත් මට හිමිවුණා.

විශේෂයෙන් දෙයක් කියන්න ඕන, මිස් ශ්‍රී ලංකා තරග දහයක් පවත්වලා තිබෙනවා. මම තමයි නවවෙනි තරගයේදී ජයග්‍රහණය කළේ. එතකොට එම තරගයේ ප්‍රධාන කිරුළ වන ජනප්‍රිය කිරුළයි, මිස් ශ්‍රී ලංකා කිරුළයි දෙකම එකට ලබාගත්තු ඉතිහාසයේ එකම කෙනා වුණෙත් මමයි. ඒ කාරණාව පිළිබඳවත් ගොඩක් සතුටුයි.

ඊට අමතරව ගිය අවුරුද්දේ Miss Global Beauty Queen කියන තරගය සඳහා ලංකාව නියෝජනය කළා. ඒ වගේම 2014 දෙරණ මිස් ශ්‍රී ලංකා ජාත්‍යන්තර තරගයේදී රටවල් 102කින් මට කිරුළු තුනක් ජයග්‍රහණය කරන්න හැකියාව හිමිවුණා. ඒකත් විශේෂයි. මොකද මේ වෙනකල් සීමිත පිරිසක් තමයි මෙවැනි පදක්කමක්, කිරුළක් ලංකාවට රැගෙන විත් තියෙන්නේ. අවුරුද්දේ Miss Global Beauty Queen තරගය ජයග්‍රහණය කිරීමට හැකියාව ලැබුණේ නැහැ.

නවකයන් වෙනුවෙන් ආරම්භ කරන මොඩ්ලින් ඇකඩමියේ නව ආරම්භය පිළිබඳව කතා කළොත්?

මගේ මොඩලින් ඇකඩමි එක ගිය අවුරුද්දේ තමයි ආරම්භ කළේ. ගිය අවුරුද්දේ Miss Global Beauty Queen තරගය සඳහා ලංකාව නියෝජනය කරන්න සූදානම් වෙද්දි ගොඩක් කාර්යය බහුල වුණා. ඒ හේතුව නිසා ටික කාලයකට ඇකඩමි එක නවත්වන්න වුණා. ඉතිං නැවත එය විවෘත කරන්න බලාපොරොත්තු වෙනවා. මම පටන්ගත්තු වෙලාවෙත් ළමයි 20- 25ක් විතර එක්වුණා.

මෙහි කාර්යයභාරය?

සාමාන්‍යයෙන් බොහෝ ඇකඩමි වල කැට් වෝක් එක උගන්වන එක අනිවාර්යයෙන්ම වෙනවා. නිරූපිකාවක් සඳහා ඒක අනිවාර්යයි. ඊළඟට ඡායාරූප සඳහා පෙනී සිටින්නේ කොහොමද, pose කරන්නේ කොහොමද යන කාරණා පිළිබඳව දැනුවත් කරනවා. ඒ වගේම ඒ අයගේ Fitness පැත්ත හදාගන්නේ කොහොමද කියන කාරණා පිළිබඳවත් හොඳ දැනුමක් ලබාදෙනවා. නිරූපිකාවක් නොවුණත් ශරීර සෞඛ්‍යය පිළිබඳව බොහෝ දේවල් කියල දෙනවා. ඊට අමතරව ටික කාලයක් යනකොට ඒ අයව වෙළෙඳ දැන්වීම් හෝ නාට්‍ය සඳහා සම්බන්ධ කරන්න බලාපොරොත්තු වෙනවා.

ඉදිරි වැඩකටයුතු ගැන සඳහන් කළොත්?

මගේ පැත්තෙන් ගත්තොත් මිස් ශ්‍රී ලංකා කිරුළ හැම ගෑනු ළමයෙකුටම ලබාගත නොහැකි දෙයක්. මහන්සිවෙලා බොහෝ කැපවීම් කරලා තමයි ඒ ජයග්‍රහණය සඳහා යාමට හැකියාව ලැබුණේ. ඒ පැත්තෙන් මට ලබාගන්න පුළුවන් ඉහළම තැන ලබාගන්න පුළුවන්. අනෙක් පැත්තෙන් තියෙන බලාපොරොත්තුව තමයි රංගනය පැත්තෙන් බොහෝ ඉදිරියට යන්න. මම තාම රංගනයට නවකයෙක්. රංගනය පැත්තේ දේවල් හදාරලා ලංකාවේ හොඳම නිළිය වැනි සම්මානයක් ගන්න තමයි මගේ බලාපොරොත්තුව. ඊට අමතරව සමාජ සේවා කටයුතුවල නිරත වෙනවා. ඒ දේවලුත් ඉදිරියට වැඩියෙන් කරගෙන යන්න බලාපොරොත්තු වෙනවා.

ඩිලාන් ක්‍රිෂාන්ත / ඡායාරූප - ඉසුරු පෙරේරා