ගීත රූප රචනා කිහිපයක් තුළ දැක ඇති ඉසුරි ප්‍රර්ථනා සමගින් අද ‘සාරවිට’ තරු කතා බහ අරඹන්නට අපි බලාපොරොත්තු වුණේමු. වසර කිහිපයකට පෙර ගීත රූප රචනා සඳහා දායක වෙමින් නිරූපණ ක්ෂේත්‍රයට අවතීර්ණ වූ ඉසුරි මේ වනවිට නිරූපණ ක්ෂේත්‍රය තුළ නමක් දිනා ගැනීමටද සමත්ව සිටියි. මේ ඇය සිය ඉදිරි නිරූපණ කටයුතු පිළිබඳව අපට පැවසුදේ.

ක්ෂේත්‍රයට ආපු විදිහ මුලින්ම කියමු?

ප්‍රදිප් රසංගගේ ‘ඔබේ නමට පුදමි සදා’ කියන මියුසික් වීඩියෝව හරහා තමයි මම ක්ෂේත්‍රයට ආවේ. ඒ මීට අවුරුදු 4කට විතර කලින්. ඊට පස්සෙ පෞද්ගලික හේතුවක් මත මම මේ ක්ෂේත්‍රයෙන් ඉවත් වුණා. මීට මාස අටකට විතර කලින් තමයි නැවතත් නිරූපණ කටයුතුවලට යොමු වුණේ.

දැනට දායක වෙලා තියෙන කලා නිර්මාණ?

මුලින්ම කළේ ප්‍රදීප් රසංගගේ ‘ඔබේ නමට පුදමි සදා’ කියන මියුසික් වීඩියෝව. ඊට පස්සේ රොනිගේ ‘පෙම් පුරාණේ’ මියුසික් වීඩියෝවට දායක වුණා. දර්ශන ඉලංගසිහංගේ ‘දෙමලිච්චි’ ඇතුළු තවත් මියුසික් වීඩියෝ 3කට දායක වුණා. ඉතිරි මියුසික් වීඩියෝ තවමත් එළිදක්වලා නැහැ. ඉදිරියේදී ඒ හරහා මාව දැකගන්න පුළුවන් වේවි. එළිදක්වන්න නියමිත එක් මියුසික් විඩියෝවක මම දෑස් නොපෙනන තරුණියක් විදිහටත් පෙනී ඉන්නවා. එය මා කළ හොඳම රංගනයක් කියලා සඳහන් කරන්න පුළුවන්.

ඇයි නිරූපිකාවක් වෙන්න හිතුවේ?

නිරූපිකාවක් වෙන්න ඕනෑම කියලා මගේ අදහසක් තිබුණේ නැහැ. ඒත්, මේ වගේ වැඩවලට දායක වෙන කොට මම නිරූපණයට සුදුසු කෙනෙක් කියලා හිතුවා. එහෙම තමයි නිරූපණ ක්ෂේත්‍රයට ආවේ.

නිරූපිකාවක් වුණ එක ගැන සතුටුද?

ඔව්. මම තෘප්තිමත් වෙනවා නිරූපිකාවක් වුණ එක ගැන. නමුත්, මම තවමත් නිරූපණ ක්ෂේත්‍රයේ ඉන්නේ මුල් පියවරේ. තවත් බොහෝදුර මට යන්න තියෙනවා මේ ක්ෂේත්‍රය තුළ.

වර්තමානයේ නම් ක්ෂේත්‍රය ගැන විවිධ මත තියෙනවා?

හැම දේකම හොඳ පැත්තක් වගේම නරක පැත්තක් තියෙනවා. ඉතින් අපි කරන හොඳ නරක අනුව තමයි මේ ක්ෂේත්‍රයේ ගෑනු ළමයෙක්ට සුදුසුද නැද්ද කියලා තීරණය වෙන්නේ. මම නම් උත්සාහ කරන්නෙ හැම වැඩකදීම මට වගේම මගේ චරිතයට හානියක් නොවන විදිහට වැඩ කරන්න.

නිරූපිකාවක් විදිහට ඉදිරිය ගැන හිතනවා නම්?

මගේ ඉලක්කය තමයි මම විවාහ වෙනකම් මේ ක්ෂේත්‍රය තුළ රැඳිලා ඉන්න එක. ඒ වගේම හොඳ නිරූපිකාවක් විදිහට හොඳ නමක් හදාගෙන කාටත් කරදරයක් නොවි තමන්ගේ පාඩුවේ මේ ක්ෂේත්‍රය තුළ වැඩ කරගෙන යන්න.

ඔබ දකින විදිහට නිරූපිකාවක් වෙන්න අවශ්‍ය සුදුසුකම් මොනවද?

මම නම් හිතන්නේ ලස්සන වගේම හැකියාවත් තියෙන්න ඕනා.

උදවු කළ පිරිසකුත් ඇති?

මට මුලින්ම පෙනී සිටි මියුසික් වීඩියෝව ගායනා කළ ප්‍රදීප් රසාංග අයියා, ඒකට සම්බන්ධ වෙන්න අවස්ථාව ලබාදුන්න නිමන්ත වර්ණකුලසූරිය අයියා. ගෙදර පවුලේ අය වගේම මට වචනයකින් හරි උදවු කළ සෑම දෙනාව මේ වෙලාවේදී මතක් කරනවා.