SENOK  සමූහය මෙම වසරේ සිය 47 වැනි සංවත්සරය සමරන්නේ ශ්‍රී ලංකාවේ සංවර්ධනයට වැදගත් දායකත්වයක් ලබාදුන් විවිධ කර්මාන්ත ක්ෂේත්‍ර ඔස්සේ දශක පහකට ආසන්න කාලයක් පුරා ගොඩනැගූ ව්‍යවසායකත්වය සහ වර්ධනය අභිමානයෙන් සිහිපත් කරමිනි.

1979 වසරේදී සංචාරක සේවා සමාගමක් ලෙස ආරම්භ වූ SENOK  සමූහයඅද වන විට සමාගම් 40කට අධික සංඛ්‍යාවකින් සමන්විත ශ්‍රී ලංකාවේ ප්‍රමුඛතම විවිධාංගීකරණය වූ පෞද්ගලික ව්‍යාපාරික සමූහයක් බවට පත්ව ඇත. ඉදිකිරීම් හා බර යන්ත්‍රෝපකරණ, මෝටර් රථ හා වාණිජ වාහන, පුනර්ජනනීය බලශක්තිය, නිෂ්පාදන කර්මාන්ත සහ ගුවන් සේවා ඇතුළු ක්ෂේත්‍ර රැසක විහිදුණු එහි ව්‍යාපාරික මෙහෙයුම් අද ජාත්‍යන්තර වෙළෙඳපොළ දක්වා ද ව්‍යාප්ත වී තිබේ.

SENOK  සමූහයේ ආරම්භය සනිටුහන් වූයේ 1979 වසරේදී ගරු නොයෙල් සෙල්වනායගම් මහතා විසින් Senok  ට්‍රැවල්ස් ලිමිටඩ් ආයතනය පිහිටුවීමත් සමගය. සංචාරක ක්ෂේත්‍රයෙන් ඇරඹි මෙම ව්‍යාපාරය ඉතා ඉක්මනින් ඉදිකිරීම් යන්ත්‍රෝපකරණ ක්ෂේත්‍රය වෙත ද ව්‍යාප්ත වූ අතර ඉදිරි දශක කිහිපය තුළ සමූහයේ වර්ධනයට මග පෑදූ විවිධාංගීකරණ ක්‍රියාවලිය එමඟින් ආරම්භ විය. සමූහය වර්ධනය වන විට කළමනාකාර අධ්‍යක්ෂ ජෙරාඩ් ප්‍රනාන්දු මහතා එහි සංවර්ධනයේ ප්‍රධාන බලවේගයක් බවට පත්වෙමින් සමූහයේ ප්‍රධාන ව්‍යාපාර, මෙහෙයුම් සහ දැවැන්ත ව්‍යාපෘති රැසක් ගොඩනැගීම හා මෙහෙයවීම සඳහා සුවිශේෂී කාර්යභාරයක් ඉටු කළේය.

ඉදිකිරීම් හා බර යන්ත්‍රෝපකරණ ක්ෂේත්‍රය SENOK  සමූහයේ වර්ධනයේ ප්‍රධාන පදනමක් බවට පත්විය. සමූහය විසින් සපයනු ලබන සහ අලෙවියෙන් පසු සේවා සපයනු ලබන යන්ත්‍රෝපකරණ ශ්‍රී ලංකාව පුරා මාර්ග සංවර්ධන, වාරිමාර්ග යෝජනා ක්‍රම, ජල විදුලි ව්‍යාපෘති, පෙර සැකසූ ඉදිකිරීම්, වරාය, ගුවන්තොටුපොළ සහ අනෙකුත් ප්‍රධාන යටිතල පහසුකම් ව්‍යාපෘති සඳහා යොදාගෙන තිබේ. අද වන විට SENOK, Kobelco, JCB, HAMM  සහ Airman  ඇතුළු ජාත්‍යන්තර වශයෙන් පිළිගත් සන්නාම රැසක් නියෝජනය කරන අතර පුළුල් අලෙවි, සේවා, අමතර කොටස් සහ තාක්ෂණික පහසුකම් ජාලයකින් ද සමන්විත වේ.

ඉන් අනතුරුව මෝටර් රථ හා වාණිජ වාහන ක්ෂේත්‍රය තුළ ද SENOK  සැලකිය යුතු ස්ථානයක් හිමිකර ගත්තේය. එහි වර්තමාන සන්නාම එකතුවට CHANGAN, DEEPAL, NEVO, GWM, FOTON  සහ EICHER ඇතුළත් වන අතර මගී මෝටර් රථ, SUV  රථ, පිකප් රථ, වාණිජ වාහන සහ නව බලශක්ති තාක්ෂණයෙන් ක්‍රියාත්මක වන වාහන රැසක් එමඟින් ආවරණය වේ. මීට අමතරව කුලියාපිටියේ පිහිටි Western Automobile Assembly (WAA) ආයතනය හරහා දේශීය වාහන එකලස් කිරීමේ කර්මාන්තයටද SENOK  ආයෝජනය කර තිබේ. එමගින් දේශීය අගය එකතු කිරීම, රැකියා උත්පාදනය, තාක්ෂණික දැනුම හුවමාරුව සහ කුසලතා සංවර්ධනය සඳහා දායකත්වයක් ලබාදෙයි.

ශ්‍රී ලංකාවේ සුළං බලශක්ති සංවර්ධනයේ පුරෝගාමියකු ලෙසද SENOK  සුවිශේෂී ස්ථානයක් හිමිකර ගනී. පුනර්ජනනීය බලශක්තිය ජාතික ප්‍රමුඛතාවක් බවට පත්වීමට බොහෝ කලකට පෙර මෙරට වාණිජ සුළං බලශක්ති උත්පාදනය හඳුන්වාදීමට සමූහය දායක විය. ඉන් අනතුරුව එහි බලශක්ති ක්ෂේත්‍රය ජල විදුලි හා සූර්ය බලශක්ති ව්‍යාපෘති දක්වා ව්‍යාප්ත වූ අතර ව්‍යාපෘති සංවර්ධනය, ඉංජිනේරු කටයුතු, ඉදිකිරීම්, ක්‍රියාත්මක කිරීම, මෙහෙයුම් සහ නඩත්තු කටයුතු දක්වා විහිදුණු පුළුල් හැකියාව සමූහය සතුය.

ගුවන් සේවා ක්ෂේත්‍රය SENOK  සමූහයේ ඉතිහාසයේ තවත් සුවිශේෂී පරිච්ඡේදයකි. 2012 වසරේදී Senok Air  ආයතනය පිහිටුවීමත් සමග සමූහය ගුවන් සේවා ක්ෂේත්‍රයට පිවිසියේය. Airbus AS350 B3  බහුකාර්ය හෙලිකොප්ටර් යානා මෙහෙයවමින් මගී ප්‍රවාහනය, ගුවන් රූගත කිරීම්, සිතියම්කරණ හා මිනුම් කටයුතු සහ හදිසි වෛද්‍ය ඉවත් කිරීම් ඇතුළු විශේෂිත ගුවන් සේවා රැසක් Senok Air  විසින් සපයනු ලබයි. තමන් සතු ඉංජිනේරු හා නඩත්තු පහසුකම් මෙන්ම පළපුරුදු ගුවන් නියමු කණ්ඩායමක සහාය ඇතිව ශ්‍රී ලංකාව පුරා වාණිජ අවශ්‍යතා සහ හදිසි ප්‍රතිචාර සේවා සඳහා දායක වන විශේෂිත හෙලිකොප්ටර් මෙහෙයුම් සේවාවක් ලෙස එය වර්ධනය වී තිබේ.

ශ්‍රී ලංකාවෙන් ඔබ්බට ද SENOK  සිය ජාත්‍යන්තර පැවැත්ම පුළුල් කරගෙන තිබේ. මාලදිවයින මෙන්ම නැගෙනහිර සහ බටහිර අප්‍රිකානු කලාප ඇතුළු විදේශීය වෙළෙඳපොළේද සමූහය සිය මෙහෙයුම් ව්‍යාප්ත කරමින්, ඉදිකිරීම්, යන්ත්‍රෝපකරණ, වාණිජ වාහන සහ අනෙකුත් ව්‍යාපාරික ක්ෂේත්‍රවල අත්දැකීම් හා හැකියාව ජාත්‍යන්තරයට රැගෙන යමින් සිටී.