වරෙක ඔහු ලෝකයේ හොඳම පන්දු යවන්නා විය. ඒ ජාත්‍යන්තර ක‍්‍රිකට් කවුන්සිලයේ ශ්‍රේණිගත කිරීම්වලට අනුවය. දේහධාරී පෙනුමකින් යුතු නොවුවද නුවන් කුලසේකර යනු එලෙස ශ්‍රී ලාංකීය ක‍්‍රිකට්  ක‍්‍රීඩාවට දායාද වූ අපුරු දක්ෂයෙකි. ඥානාන්විතව මඳ වේගපන්දු යවන ක‍්‍රීඩකයකු  ලෙස ප‍්‍රකට නුවන් වෙතින් පසුගිය කාලයේදී ශ්‍රී ලාංකීය ක‍්‍රිකට් ක‍්‍රීඩාවට ලැබුණු දායකත්වය ඉහළය. පන්දු යැවීමට අමතරව පිතිකරණයෙන් ද දස්කම් පාන නුවන් ක‍්‍රිකට් ක‍්‍රීඩාවෙන් තොරව බාහිර සමාජයේ ප‍්‍රකටව සිටින්නේ වඩාත් නිහතමානී පුද්ගලයකු ලෙසිනි.

ක‍්‍රිකට් ක‍්‍රීඩාවේ ඉහළට යන තරමට හිස උදුම්මා නොගත් මේ නිහතමානී ක‍්‍රීඩකයාගේ ජීවිතය පුරාවට බැඳී ඇති තවත් බොහෝ දේ ගැන හෙළිකිරීමට අපි නුවන්ගේ මව වන නන්දා ගමගේ මාතාවට සහ නුවන්ගේ ආදරණීය බිරිඳ දිනුෂා සංජීවනීට ඇරියුම් කළෙමු.

 පවුලේ විස්තර ගැන මුලින්ම සඳහනක් කළොත්?
පවුලේ මමයි, මහත්තයයි පුතාලා දෙන්නයි දුවයි. ලොකු පුතා කෝසල, දෙවැනි පුතා තමයි නුවන්. දුව නිරෝෂා මේධාංගනී බාලයා.

 නුවන් කුඩා කාලයේදී කොහොම චරිතයක් වුණාද?
හරිම අහිංසක දරුවෙක්.

 ඒ අහිංසකකමට හේතු වෙච්ච දේවල් මොනවද?
එයා කවුරුවත් විහිළු කරන ඒවා ගණන්ගත්තෙ නැහැ. කා එක්කවත් රණ්ඩුවට ගියෙත් නැහැ.

 නුවන් කියලා නම දාන්න විශේෂ හේතුවක් තිබුණද?
කේන්දර බලපුවාම ලැබුණු අක්ෂර අනුව ඒ නම දැම්මේ මැදට. එයාගෙ සම්පූර්ණ නම දිනේෂ් නුවන් කුලසේකර.

 මෙයා ජනප‍්‍රිය චරිතයක් වන බව හඳහනේ ලියැවිලා තිබුණද?
ඒ කෙසේ වෙතත් ටිකක් අපලයි කියලා නම් ලියැවිලා තිබුණා.

 අපල දුරුවෙන්න මොනවද කළේ?
අපි ඉතින් බෝධිපූජා එහෙම පැවැත්වූවා.

 ඒ අපල කාලයේදී මුහුණදීපු සිදුවීමක් එහෙම මතකද?
දවසක් අපේ පවුලේ කට්ටිය සහ අසල්වැසි හිතවතුන් එක්ක කතරගම ගියා. මෙයා පොඩි නිසා බේසමක් එහෙම අපි ගෙනිච්චා. එයාව ඒකෙ බස්සවලා අපි මැණික් ගෙඟ් නාමින් සිටියදී මෙයා ගහගෙන ගියා. මට කරකියා ගන්න දෙයක් තිබුණේ නැහැ. මම හයියෙන් කෑගැහුවා. අපේ නඩයේ හිටපු අසල්වැසි නන්දෙ මල්ලි වහාම දියට පැනලා දිවිපරදුවට තියලා මෙයාව බේරාගත්තා.

 ඒ හැර තවත් සිදුවීම්වලට මුහුණදුන්නද?
ආයේ දවසක්දා මෙයාලා සෙල්ලම් කරමින් සිටියදී බෙලෙක්කයට රතිඤ්ඤයක් දාලා පත්තුකළාම ඒක ගිහින් කඬේකට වැටිලා එහි වීදුරු බිඳිලා තිබුණා. එතකොට මෙයා ටිකක් ලොකුයි. ඒත් බයට හැංගිලා හිටියා.

 නුවන් තාත්තාට ගොඩාක් බයද?
තාත්තා පොලිස් නිලධාරියෙක් ලෙස සේවය කළේ. මෙයා දඟ වැඩ කළ ළමයෙක් නොවෙයි. ඒ හන්දා තාත්තාගෙන් බැණුම් අහලා ගුටිකාලා නැහැ.

 අයියයි, නංගියි එක්ක එකතුද?
හරි එකතුයි.

 ඔබ හිතුවද මේ පුතා කවදාහරි ක‍්‍රිකට් ක‍්‍රීඩාවෙන් ලෝකප‍්‍රකට වේවි කියලා?
හීනෙකින්වත් හිතුවෙ නැහැ. මා හිතන්නෙ එයා මේ ආත්්මෙ කරන පින් සහ ගිය ආත්මෙ කළ පින් නිසා එහෙම වෙන්න ඇති.

 මොනවද කරන පිං අතේ වැඩ?
පංසල්වලට හරියට උදව් කරනවා. අනුරාධපුරයෙ එහෙම යන්න හරි ආසයි. ගිහින් දන්සලක් එහෙම දෙන්නත් කැමතියි. හැබැයි ඒවා ලෝකෙට ප‍්‍රකාශ කරගෙන කරන්නෙ නැහැ. දානයට ශීලයට හරිම ලැදියි. නෑදැයින්ටත් හැකි විදියට උදව් කරනවා.

 නුවන් ක‍්‍රිකට් පොත් එකතුකළා කියන්නේ ඒක ඇත්තද?
ඒ දවස්වල ක‍්‍රිකට් තරු පිංතූර එකතුකළා. ඒවා යොදාගෙන පොතක් හැදුවා. එයා එය කළේ හරිම ආසාවෙන්.  ඕනෑම ක‍්‍රිකට් ක‍්‍රීඩකයකුගේ වාගේම විස්තර දැනගෙන හිටියා. කුඩා කාලයේ ඉඳලාම මෙයා කැමති වුණෙත් ක‍්‍රිකට් ක‍්‍රීඩාවටයි.

දිනුෂා සංජීවනී (නුවන්ගේ බිරිඳ)

 නුවන්ගේ පළමු හමුව ඔබට මතකද?
එතකොට අපි පාසල් යන කාලයේදී කානිවල් එකක් තිබුණා. මේ කානිවල් එක බලන්න මෙයත් ඇවිත් හිටියා.

 ඒ කියන්නෙ මෙය පාසල් කාලයේ පේ‍්‍රමයක්ද?
එහෙම නැහැ. ඒත් අපේ පවුල් දෙකේ වැඩිහිටියන් දැනහඳුනාගෙන සිටියා. ඒ දැනහැදිනීම මත මෙයා එදා මා එක්ක කතාකළා.

 පේ‍්‍රමයක් හටගත්තෙ?
උසස් පෙළ අමතර පංති යන කාලයේදී එයා ක‍්‍රිකට් පුහුණුවට ගියා. ඒ හමුව තමයි පසුව ආදරයකට පෙරැළුනේ.

 ආදරවන්තයන් හැටියට ගෙවල්වලට හොරෙන් ෆිල්ම් එහෙම බලන්න ගියා කියලා ආරංචියි?
අපෝ නැහැ. අපේ පවුල් දෙකේ වැඩිහිටියන් දන්නාහඳුනන අය නිසා සීමාබිඳගෙන කිසිවක් කළේ නැහැ. අපි හැඟීම්වලට ලොල්වෙලා ආදරය කරන්න පටන්ගත්තෙ නැහැ. එයා ක‍්‍රිකට් ක‍්‍රීඩාව ගැන හිතුවා. මම අධ්‍යාපනය ගැන හිතුවා. විශ්වාස කරන්න මේ දක්වා අප දෙන්නා චිත‍්‍රපටයක්  නරඹන්න ගිහින් නැහැ.

 ඔහු විවාහ කර ගත්තාම ඔබට ඔහු ගැන හිතුනේ කොහොමද?
ලොකු ආඩම්බරකමක් දැනුණා.

 අද සැමියා ගැන ඔබ හිතන්නෙ කොහොමද?
කාටවත් ඒ වගේ හොඳ සැමියෙක් නැහැ කියලා මා හිතනවා.

 ඒකට හේතුව?
හොඳ  ඉවසීමක් තියෙන්නෙ. අවශ්‍ය වෙලාවට අවශ්‍ය දේ නොපිරිහෙලා ඉටු කරනවා. ආත්මාර්ථකාමී නැහැ.

 කේන්ති යනවද?
නුවන්ට කේන්ති යන්නෙ නැහැ. හැබැයි මට නම් කේන්ති යනවා.

 රසිකාවියන් ඔහු එක්ක කතා කරද්දී ඔබට ඊර්ෂ්‍යාවක් එනවද?
ඒ ගැන මා හිතන්නෙ නැහැ. හැමෝටම එහෙම වෙන්න බැහැනෙ. මිනිසුන්ගෙ ආදරය ලැබීමත් පිනක්.

 සංචාරයකට යන විට ඔහු මොනවද ඔබට කියලා යන්නෙ?
පරිස්සමින් ඉන්න කියලා කියනවා. එයා මාව තනිකරලා යන්න කැමැති නැහැ. කොහොම හරි මාවත් එක්කගෙන යන්න බලනවා. ඒත් පුතාලා දෙන්නා පොඩි නිසා බැරිවෙන අවස්ථා තිබුණා.

 සංචාරයක් ගිහින් එනකොට ඔබට තෑගි ගෙනැත් දෙනවද?
අපොයි ඔව්. එකක් දෙකක් නොවෙයි ගොඩාක් දේ ගෙනැත්  දෙනවා.

 ඒ විදියට විශේෂයෙන් ගෙනැත් දුන්න දෙයක් තියෙනවද?
අපි දෙන්නගෙ ඡායාරූපයක් ලස්සනට මුද්‍රණය කරලා තියෙන සමරුවක් හදලා ගෙනැත් දුන්නා.

 එයාගෙ නිහතමානීකමට හේතුව හැටියට ඔබ දකින්නේ?
ඉවසීමයි. කවුරු මොන දේ කිව්වත් ඉවසනවා. ඒ වගේම කලබල නොවී කල්පනාකාරීව තමයි හැම දෙයක්ම කරන්නේ.

 එයාට කෑම ටික ඔබම හදලා දෙන්න  ඕනෑද?
 එහෙම විශේෂයක් නැහැ. උයලා දෙන  ඕනෑම දෙයක් කනවා. ගමේ කෑමවලට, මැල්ලූම්වලට හරි ආසයි.

 නිදහසේ ගෙදර සිටින වෙලාවට මොන වගේ දේවල්ද කරන්න කැමති?
එක්කෝ නිදාගන්නවා. නැතිනම් පුතාලා දෙන්නා එක්ක සෙල්ලම් කරනවා.

 එයාලට කවි සිංදු එහෙමත් කියලා දෙනවා කියලා ආරංචියි?
මම කියන ඒවා අහගෙන ඉඳලා එයා කියනවා. හැබැයි එකම එක සිංදුවක් තමයි කියන්නේ. ඒක හරි ලස්සනට කියනවා.

 මොකක්ද ඒ ගීතය?
”මා බාල කාලේ”

 නුවන් වැඩිපුර කැමති කාගේ ගීත අහන්නද?
කසුන් කල්හාරගෙ ගීතවලට හරි ආසයි. රේඩියෝ එකේ යන  විහිළු කතා වගේම පැරණි ගීත අහන්නත් කැමතියි.

 කණ්ඩායමට ඇතුළත් නොවුනාම ඔහුගේ හැසිරිම මොන වගේද?
ඒක ඔලූවට ගන්නෙ නැහැ. ලැබුණොත් ගහනවා. නැත්නම් එනදේට මුහුණදෙනවා. උපේක්ෂාවෙන් සියල්ල විඳදරා ගන්න කෙනෙක්.

   බිරිඳක ලෙස ඔබ ඔහු වෙතින් දකින ඉහළම ගුණාංගය.
ඉවසීම සහ කරුණාවන්තකම. ඔහු ඇත්තටම හොඳ පුද්ගලයෙක්.