ඇය නිරූපණ ක්ෂේත්‍රයට නවකයෙකු වුවද, මේ වනවිට ඇය තම රටට කීර්තියක් ගෙන දී හමාරය. ඒ, "2016 World Miss University" තරගයෙන් 06 වැනි ස්ථානයට පත්වීමත් සමගය. ඇය නමින් ප්‍රමෝදි කෞශල්‍යාය. මේ වනවිට ගීතමය රූප රචනා තුළින් ප්‍රේක්ෂක ආදරය දිනා ඇති ඇය නිවේදිකාවක ලෙසද කටයුතු කරන්නීය. ඒ පිළිබඳව සහ ඇගේ තොරතුරු පිළිබඳව පැවසීමට "තරුණයා" සමග ඇය මෙලෙස එක්විය.

මේ දිනවල කටයුතු කොහොමද?

මියුසික් වීඩියෝ එකක් කළා. ඉදිරියෙදි අලුත් මියුසික් වීඩියෝ දෙකක් සඳහා දායක වෙන්න නියමිතවෙලා තියෙනවා. ෆොටෝ ෂූට් කිහිපයකුත් කළා. ඒ කටයුතුවලට අමතරව මම නිවේදිකාවක් විදිහටත් කටයුතු කරනවා.

ඔබව කොහොමද රසිකයන් හඳුනා ගත්තේ?

"2016 World Miss University Pageant" එක සඳහා ශ්‍රී ලංකාව නියෝජනය කරමින් මම ඉදිරිපත් වුණා. ඒ තරගයෙන් 06 වැනි ස්ථානය මට හිමිවුණා. ඊට පස්සේ තමයි බොහෝ දෙනා මාව හඳුන ගත්තේ. ඒ තරගයෙන් පස්සෙ තමයි නිරූපණයට එන්න මට අවස්ථාව ලැබුණෙ. දැනට මගේ වයස 22යි. ඉතිං මේ අඩු වයස තුළදී මෙවැනි දෙයක් සඳහා දායක වීමට අවස්ථාව ලැබීම ගැන මම ගොඩක් සතුටු වෙනවා.

නිවේදිකාවක් වුණේ කොහොමද?

මේ දිනවල නිවේදිකාවක් වශයෙන් ස්ටයිල් ටීවී එකේ වැඩකටයුතු කරනවා.

නිවේදනය කියන දේ හොඳයිද?

නිවේදනයට මම ගොඩක් කැමති. ඒ පිළිබඳව හදාරන්නත් කැමතියි. නමුත් ඒ සඳහා වෙලාවක් නැති එක තමයි ප්‍රශ්නයකට තිබෙන්නෙ. ඒත් මම පුළුවන් විදිහට ප්‍රවීණයන්ගෙන් නිවේදනය ඉගෙන ගන්න බලනවා.

ෆේස්බුක් නැත්නම් නිරූපණ ශිල්පීන් බිහිවෙන් ප්‍රමාණය අඩුයි නේද?

තාක්ෂණය දියුණු වෙනවත් එක්කම ඒ අයටත් දියුණුවක් තියෙනවා. ඒ වුණත් ෆේස්බුක් නිරූපිකාවන් ගොඩක් වැඩියි. ෆොටෝ ෂූට් එකක් දෙකක් කරපු පළියට නිරූපිකාවක් වෙන්න බැහැ. තමන් ඒ ගැන අධ්‍යයනය කරලා දැනුමක් හදාගෙන මෙම ක්ෂේත්‍රයට එනවානම්, කමක් නැහැ.

ඔබ රැකියාවට අමරතව, නිරූපණය, නිවේදනය, අධ්‍යාපන කටයුතු කරනවා. මේ කටයුතු කොහොමද සමබරව කරගෙන යන්නේ?

සමබරව කරගෙන යන්න බැරි තත්ත්වයක් තමයි දැන් තියෙන්නෙ. සතිඅන්තේ තමයි මම නිරූපණ කටයුතු සඳහා වෙන් කරලා තියෙන්නෙ. නමුත් ඒ දේවල් කරගෙන යනවා.

ඔබ තෝරාබේරා ගෙන වැඩකටයුතු සඳහා දායක වෙන කෙනෙක්ද?

ඔව්, අනිවාර්යෙන්ම. මම බොහෝ වැඩ කටයුතු කරන්නෙ තෝරා බේරා ගෙනයි.

රංගනය පැත්තට ආරාධනා ලැබුණේ නැද්ද?

එක නාට්‍යයක් සඳහා ආරාධනා ලැබුණා. නමුත්, ඒ පැත්තට ලොකු කැමැත්තක් නැති නිසා ඒ ගැන අවධානය යොමු කළේ නැහැ.

අධ්‍යාපනයෙන් ලබන දෙයද වෘත්තිය කරගන්න බලාපොරොත්තු වෙන්නේ?

ඔව්, මම මේ වනවිට ව්‍යාපාර කළමනාකරණය පිළිබඳව උපාධියක් හදාරනවා. මම ඒ පැත්තට ගොඩක් කැමති. මගේම ව්‍යාපාරයක් කරන්න තමයි බලාපොරොත්තු වෙන්නෙ.

ඔබට මේ ගමනට උදව් කරපු අය?

ගොඩක් අය ඉන්නවා. ඒ අය ගැන වෙන වෙනම කියන්න බැහැ. මගේ අම්මා, මල්ලි, තාත්තා තමයි මට ගෙදරින් සහයෝගය දෙන්නෙ. ඒ වගේම මගේ යාළුවෝ සහ මට උදව් කරලු හැමදෙනාවම මම මේ මොහොතේ මතක් කර සිටිනවා.

ඩිලාන් ක්‍රිෂාන්ත / ඡායාරූප - කවිත් මිලින්ද