(බිමල් ශ්‍යාමන් ජයසිංහ)

මොරටුව අගුලාන වෙරළ තීරයේ සිට කිලෝමීටර් 3 පමණ දුරකදි අනතුරට පත් වූ ශ්‍රී ලංකා නාවික හමුදාවට අයත් p- 4447 ඩෝරා යාත්‍රාවේ සිට අතුරුදන් වූ නාවිකයාගේ මළ සිරුර දින 20 කට පසු අද හමු වූ බව වරාය පොලිසිය සඳහන්කරයි.

මෙලෙස මියගොස් තිබුණේ අනතුරට පත් යාත්‍රාවේ දෙවන අණ දෙන නිලධාරියා ලෙස කටයුතු කරමින් සිටි බොරලැස්ගමුව වේරහැර ප්‍රදේශයේ පදිංචිව සිටි ලුතිනන් උදයප්‍රිය 26 මහතායි.

නාවිකයන් දොළොස් දෙනකුගෙන් යුත් පිරිසක් මුර සංචාරයක් නිමවා නැවත කොළඹ බලා පැමිණෙමින් සිටියදී මෙම අනතුර ඉකුත් 15 වෙනිදින සිදු වී තිබිණි.

අනතුරට පත් යාත්‍රාවේ සිටි නාවිකයන් 12 දෙනාගෙන් 11 දෙනකු ආරක්ෂිත කබා සහිතව දියමත පාවෙමින් සිටියදී අනතුර සැළවීමත් සමඟ වහා ක්‍රියාත්මක වූ අඟුලාන පොලිසිය, නාවික හමුදාව මෙන්ම ගුවන් හමුදාවත් වහාම සිය මුදාගැනීමේ මෙහෙයුම් ආරම්භ කර ඔවුන් මුදාගෙන රෝහල් ගත කර තිබිණි.

එම ප්‍රහරක යාත්‍රාවේ සිටි අතුරුදහන් වූ නාවිකයා සොයා එදින සිට සිට ගුවන් හමුදාවේ එම්.අයි. 17 හෙලිකොප්ටර් යානයක් සහ බෙල් 412 යානයක්ද යොදා ගනිමින් මෙහෙයුමක් ආරම්භ කළ ද සොයා ගැනීමට නොහැකි විය.

අනතුරුව අනතුරට පත් යාත්‍රාව කොළඹ වරාය වෙත රැගෙන ඒමට නාවික හමුදාව විසින් කටයුතු කළ අතර වැල්ලවත්ත ප්‍රදේශයේදී එහි වැකුම් අක්‍රිය වී අඩි 75 කට ආසන්න ප්‍රමාණයක් මුහුදු බත් වු බව පොලිසිය කියයි.

නාවික හමුදා කිමිදුම්කරුවන් විසින්  නැව අභ්‍යන්තරයේ සිදුකළ සෝදිසි මෙහෙයුමේදී   අතුරුදන් නාවිකයාගේ මළ සිරුර සොයා ගැනීමට  හැකි වී තිබිණි