(උපාලි ආනන්ද)

අධිකරණය ලබා දුන් නියෝගයකට අනුව පෙත්සම්කාර පාර්ශවයකට හෝටල් ගොඩනැගිල්ලක් සහිත ඉඩමක භුක්තිය බාර දීමට ගිය මැදවච්චිය මහේස්ත්‍රාත් අධිකරණයේ රෙජිස්ට්‍රාර්වරිගේ සහ අධිකරණ පිසිකල්වරයාගේ රාජකාරියට බාධා කරමින් තර්ජනය කරමින් මේක අත්සනක්ද? මේක ඉරි කෑල්ලක්නේ මේ නියෝගය දුන්නේ මොන බල්ලද? යන්න විමසමින් අධිකරණයට අපහාස කළ බව කියන නීතිඥවරයකු සහ නීතිඥවරියක වාහාම අත් අඩංගුවට ගෙන අධිකරණය හමුවට ඉදිරිපත් කරන ලෙසට නියෝග කරමින් මැදවච්චිය මහේස්ත්‍රාත් ප්‍රියන්ත හාල්යාල මහතා අනුරාධපුර කොට්ඨාස බාර ජ්‍යෙෂ්ඨ පොලිස් අධිකාරි ජයන්ත පුෂ්ප කුමාර මහතා මගින් වරෙන්තු නිකුත් කළේය.

මෙසේ අත් අඩංගුවට ගෙන අධිකරණය හමුවට ඉදිරිපත් කරන ලෙස නියෝග කළේ අනුරාධපුරයේ නීතිඥවරයකු වන රංජිත් රණසිංහ සහ නීතිඥවරියක වන නිසංසලා විජේසේකර යන දෙදෙනාය මැදවච්චිය මහේස්ත්‍රාත් ප්‍රියන්ත හාල්යාල මහතා මෙසේ නියෝග කලේ මැදවච්චිය පොලිසියේ ස්ථානාධිපති ප්‍රධාන පොලිස් පරික්ෂක ආර් එම් අයි ජී රත්නායක මහතා 707/2022 දරණ බී වාර්තාව මගින් අධිකරණයට කළ කරුණු දැක්වීමක් සැළකිල්ළට ගනිමිනි.

මෙම සැකකාර නීතිඥවරයාට සහ නීතිඥවරියට මැදවච්චිය මහේස්ත්‍රාත් අධිකරණය හමුවේ ඉකුත් 24 වන දින පෙනී සිටින ලෙසට නියෝග කරමින් මැදවච්චිය මහේස්ත්‍රාත් ප්‍රියන්ත හාල්යාල මහතා විසින් මීට පෙර සිතාසි නිකුත් කර තිබිණ.

එහෙත් එකී නියෝගයට අනුව සැකකාර නීතිඥවරයා සහ නීතිඥවරිය ඉකුත් 24 වන දින මැදවච්චිය මහේස්ත්‍රාත් අධිකරණය හමුවේ පෙනී නොසිටීම හේතුවෙන් ඔවුන් මෙළෙස අත් අඩංගුවට ගෙන අධිකරණය හමුවට ඉදිරිපත් කරන ලෙසට නියෝග කරමින් මැදවච්චිය මහේස්ත්‍රාත්වරයා විසින් අනුරාධපුර කොට්ඨාස බාර ජ්‍යෙෂ්ඨ පොලිස් අධිකාරිවරයා මගින් වරෙන්තු නිකුත් කරනු ලැබීය.

මේ සම්බන්ධයන් අධිකරණයට කරුණු දක්වමින් මැදවච්චිය පොලිසියේ ස්ථානාධිපති ප්‍රධාන පොලිස් පරික්ෂක ආර්. එම්. අයි. ජී. රත්නායක මහතා කියා සිටියේ 70324 දරණ නඩුවට අදාළව අධිකරණය ලබා දුන් නියෝගයක් අනුව රඔෑව ඉකිරිගොල්ලෑව නගරයේ ඒ 9 මාර්ගයේ පිහිටි හොටෙල් ඩී අනාර් යන ස්ථානයේ භුක්තිය එස්. එච්. අබුල් සිරාම් සහ එස්. එච්. අබුල් සිෆාන් යන පෙත්සම්කරුවන්ට බාර දීමට මැදවච්චිය මහේස්ත්‍රාත් අධිකරණයේ රෙජිස්ට්‍රාර්වරිය සහ පිසිකල් නිලධාරීන් පොලිස් නිලධාරීන්ගේ ආරක්ෂාවද කැටුව ගොස් ඇති බවයි එහිදී මෙම සැකකාර නීතිඥවරයා සහ නීතිඥවරිය අධිකරණ රෙජිස්ට්‍රාර්වරියගේ සහ පිසිකල් නිලධාරියාගේ රාජකාරියට බාධා කරමින් තර්ජනය කරමින් අධිකරණ නියෝගය ක්‍රියාත්මක කිරීමට ඉඩ ලබාදී නොමැති බවද ප්‍රධාන පොලිස් පරික්ෂකවරයා කීවේය.

මෙම සැකකාර නීතිඥවරයාට සහ නීතිඥවරියට ගරු මහේස්ත්‍රාත් තුමාගේ අත්සන සහ නිළ මුද්‍රාව සහිත අධිකරණ නියෝගය පෙන්වා සිටි අවස්ථාවේ මේක අත්සනක්ද? මේක ඉරි කෑල්ලක්නේ මොන බල්ලද? මේ නියෝගය ලබා දුන්නේ යනුවෙන් සැකකාර නීතිඥවරයා ප්‍රශ්න කරමින් අධිකරණ රෙජිස්ට්‍රාර්වරියගේ සහ පිසිකල් නිලධාරින්ගේ රාජකාරියට බරපතල ලෙස බාධා පමුණාවා ඇති බවද අධිකරණයට කියා සිටි ප්‍රධාන පොලිස් පරික්ෂක ආර්. එම්. අයි. ජී. රත්නායක මහතා මෙම ක්‍රියා කලාපය තුලින් සැකකරුවන් බරපතල ලෙස ගරු අධිකරණයට අපහාස කර ඇති බවද සඳහන් කළේය.