සිව් වසරේ සම සෞඛ්‍ය උපාධිය වසර තුනක් දක්වා අඩු කිරීමට එරෙහිව අන්තර් විශ්ව විද්‍යාල ශිෂ්‍ය බල මණ්ඩලය පවත්වන විරෝධතාවක් නිසා කුරුඳුවත්ත සහ කොල්ලුපිටිය ප්‍රදේශයේ වාහන තදබදයක් ඇතැයි පොලිසිය කියයි.

උද්ඝෝෂකයන් කුරුඳුවත්ත පොලිසිය දෙස සිට කොල්ලුපිටියට යමින් සිටින බවත්, ඔවුන් එක් මන්තීරුවක යද්දී අනෙක් මන් තීරුවේ වාහන ගමන් කරන බවත් පොලිසිය පවසයි.

අන්තර් විශ්ව විද්‍යාල ශිෂ්‍ය බල මණ්ඩලයේ ක්‍රියාකාරීන් 17 දෙනකුට කොළඹ මහේස්ත්‍රාත් ගිහාන් පිලපිටිය මහතා අඟහරුවාදා (7) නියෝග කෙළ් කොල්ලුපිටිය, කුරුඳුවත්ත හා කොම්පඤ්ඤවීදිය පොලිස්වසම්වල පෙළපාළි හෝ උද්ඝෝෂණ නොපවත්වන ලෙසයි.

ඩීන්ස් පාර,  ලිප්ටන් වටරවුම, ද සොයිසා වටරවුම, ධර්මපාල මාවත, කොල්ලූපිටිය හන්දිය,  ආනන්ද කුමාරස්වාමි මාවත, මල් පාර, ග්‍රීන් පාත්, මාකස් ප්‍රනාන්දු මාවත, ඇල්බට් ක්‍රෙසන්ට්, සී ඩබ්ලිව් ඩබ්ලිව් කන්නංගර මාවත, වෝඩ් පෙදෙස, බෞද්ධාලෝක මාවත, කිංසි පාර, ජේම්ස් පීරිස් මාවත, උත්තරානන්ද මාවත, ආර් ඩී මෙල් මාවත, ගාලූ පාර, ඩුප්ලිකේෂන් පාර යන මාර්ගවලට මහේස්ත්‍රාත් විසින් උද්ඝෝෂණ තහනම් කැරුණු බව පොලිසිය පවසයි.