(මනෝප්‍රිය ගුණසේකර)

ලියාපංචි නොකළ අලි ඇතුන් සන්තකයේ තබා ගැනීම සම්බන්ධයෙන් කොළඹ මහේස්ත්‍රාත් අධිකරණයේ පවරා ඇති නඩුව විභාග කිරීම වළකාලමින් අතුරු නියෝගයක් නිකුත් කළ ශ්‍රේෂ්ඨාධිකරණය මහේස්ත්‍රාත් උසාවියේ ඇති නඩුව ශ්‍රේෂ්ඨාධිකරණය භාරයට ගැනීමටද තීරණය කළේය.

සිද්ධිය සම්බන්ධයෙන් ශ්‍රේෂ්ඨාධිකරණයේ ගොනු කර ඇති මූලික අයිතිවාසිකම් පෙත්සම මෝෂමක් මාර්ගයෙන් කැඳවා කළ ඉල්ලීමක් පිළිගත් ශ්‍රේෂ්ඨාධිකරණය එලෙස නියෝග කළේය.

ශ්‍රේෂ්ඨාධිකරණ විනිසුරුවරුන් වන ප්‍රීති පද්මන් සූරසේන සහ අර්ජුන ඔබේසේකර යන මහත්තුරුන්ගෙන් සැදුම්ලත් විනිසුන් මඩුල්ලක් හමුවේ පෙත්සම සලකා බැලිණි.

ස්වභාවික  සත්ව අධ්‍යන කේන්ද්‍රය ඇතුළු පිරිසක් ගෙනු කර තිබු පෙත්සමේ වගඋත්තරකරුවන් වශයෙන් අමාත්‍ය මණ්ඩලය ඇතුළු පිරිසන් නම් කර ඇත.

ලියාපදිංචි නොකළ අලි ඇතුන් මුල් අයිතිකරුවන්ට බාරදීමට අවසර දෙමින් නිකුත් කර ඇති ගැසට් නිවේදනය අත්හිටවන්න නියෝගයක් නිකුත් කරන්නැයි ඉල්ලා මුල් පෙත්සම ගොනු කොට තිබු අතර එම පෙත්සම සලකා බැලීමෙන් පසු ශ්‍රේෂ්ඨාධිකරණය අදාළ ගැසට් නිවේදනය ක්‍රියාත්මක කිරීම වළකාලමින් අතුරු නියෝගයක් නිකුත් කර ඇත.

මීට පෙර අවස්ථාවේදී මෙම සිද්ධිය සම්බන්ධ මෙම මූලික අයිතිවාසිකම් පෙත්සම සම්බන්ධයෙන් ශ්‍රේෂ්ඨාධිකරණය දුන් නියෝගයට පටහැනිව කොළඹ මහේස්ත්‍රාත්වරයා කටයුතු කර ඇතැයි පෙන්වා දෙමින් මෙම මෝෂම ගොනු කොට තිබු අතර එම මෝෂමට අනුව පෙත්සම කැඳවණු ලැබිණී.

පෙත්සම්කරුවන් වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා කරුණු දක්වමින් ලියාපදිංචි නොකළ හීලෑ ඇතුන් සන්තකයේ තබාගැනීම වලකාලමින් ශ්‍රේෂ්ඨාධිකරණය නියෝගයක් නිකුත් කර ඇතැයිද ශ්‍රේෂ්ඨාධිකරණයේ එම නියෝගයට පටහැනිව කොළඹ අධිකරණය කටයුතු කර ඇතැයිද කීය.

එහෙයින් කොළඹ අධිකරණයේ විභාග වන නඩුවට අදාළ විභාගය නවතාලන්නැයි ඉල්ලා සිටි ජනාධිපති නීතිඥ සංජීව ජයවර්ධන මහතා මෙම සිද්ධිය සම්බන්ධයෙන් මහේස්ත්‍රාත් අධිකරණයේ ඇති නඩු ගොනුව ශ්‍රේෂ්ඨාධිකරණයට කැඳවන්නැයිද ඉල්ලා සිටියේය.

වගඋත්තරකරුවන් වෙනුවෙන් පෙනී සිටි අතිරේක සොලිසිටර් ජනරාල්  ජනාධිපති නීතිඥ විවේක සිරිවර්ධන මහත්මිය කරුණු දක්වමින් පෙත්සම්කාර පාර්ශවයේ ඉල්ලීමට තමා විරුද්ධ නොවන්නේ යැයි කීවාය.

දෙපාර්ශවයේ කරුණු සැලකිල්ලට ගනිමින් අදාළ නඩුව විභාගයට ගැනීම වළකාලමින් අතුරු නියෝගය නිකුත් කළ ශ්‍රේෂ්ඨාධිකරණය නඩු ගොනුව  අධිකරණය බාරයට ගැනීමටද නියෝගය කෙරිණි.

පෙත්සම්කාර පාර්ශවය වෙනුවෙන් ජනාධිපති නීතිඥ සංජීව ජයවර්ධන මහතා පෙනී සිටි අතර වගඋත්තරකරුවන් වෙනුවෙන් අතිරේක සොලිසිටර් ජනරාල් ජනාධිපති නීතිඥ විවේකා සිරිවර්ධන මහත්මිය පෙනී සිටියාය.