හත් හැවිරිදි පිරිමි දරුවකුට පසුගිය දිනක  අඩන්තේට්ටමක් කළැයි කියන සිද්ධියකින් පසු  අලුත්ගම නගරයේ තෑගි භාණ්ඩ වෙළඳ සලක් අද (09) අලුයම මුළුමනින්ම ගින්නෙන් වැනසී ඇතැයි අලුත්ගම පොලිසිය කියයි. 

පොලිස් විශේෂ කාර්ය බළකායද ඇතුළුව විශේෂ පොලිස් කණ්ඩායම් කීපයක් අලුත්ගම නගරය පුරා ආයුධ සන්නද්ධව මුර යෙදී සිටී. දෙපිරිසක් අතර  ඇතිවන්නට ගිය ගැටුමකට මැදි වු  පොලිස් විශේෂ කාර්ය බළකායේ රියකටද ගල් මුල් ප්‍රහාර වලින් අලාභ හානි සිදු විය.

 අද අලුයම හතරට පමණ වෙළඳසල ගින්නට අසු විය. ගිනි නිවන හමුදාව කැඳවා ගින්න අවට වෙළඳ සල්වලට පැතිර යාම වළක්වා උදෑසන වන විට ගින්න නිවා දැමූ නමුත් ඒ වන විට එම දෙමහල් ගොඩනැගිල්ලේ භාණ්ඩ සියල්ලම ගින්නෙන් දැවී ගොස් තිබිණි.

 රජයේ රස පරීක්ෂකගේ  සහාය ඇතිව විශේෂ පරීක්ෂණයක් ආරම්භ කර ඇතැයි පොලිසිය කියයි.

මේ අතර අලුත්ගම නගරයේ බොහෝ  වෙළඳසල් රැසක්ම අද (09) වසා තිබිණි.