ගංවතුරින් හා නායයෑම්වලින් පීඩාවට පත් වූ ජනතාවගේ මානසික සෞඛ්‍ය තත්ත්වය ඉහළ නැංවීම සඳහා පසු ආපදා වැඩසටහන් ක්‍රියාත්මක කිරීමට සියලු කටයුතු සකසා ඇතැයි නියෝජ්‍ය සෞඛ්‍ය අධ්‍යක්ෂක ජෙනරාල් වෛද්‍ය අමල් හර්ෂ ද සිල්වා මහතා අද (24) පැවැසීය.

ආපදා තත්ත්වලට පත්ව සිටින පිරිස්වලට කායිකව මෙන්ම මානසිකව පීඩාවට පත්ව සිටින බවත් ඔවුන්ගේ මානසික තත්ත්වය ඉහළ නැංවීම සඳහා දැනට ආපදා මධ්‍යස්ථානවල සායනික කටයුතු සිදු කෙරෙන බවත් ඉදිරියේදී පසු ආපදා වැඩසටහන් යටතේ තවදුරටත් වැඩසටහන් ක්‍රියාත්මක කරන බව ද වෛද්‍යවරයා පැවැසීය.

‘ගංවතුරෙන් පසු ළිං ක්ලෝරීණිකරණය පිළිබඳ උපදෙස් ලබා දී ඇතැයි ද ඒ සම්බන්ධ තොරතුරු දැක්වෙන පත්‍රිකා ජනතාවට අතට පත් කිරීමට කඩිනම් පියවර ගන්නේ යැයි ද ජාතික රෝහලේ ආපදා සම්බන්ධීකාරක වෛද්‍ය හේමන්ත හේරත් කීවේය.

 “ පිරිසුදු කිරීම් සඳහා අවශ්‍ය බ්ලීචින් කුඩු (ඔක්‍ඛ), ක්ලෝරීන් ප්‍රදේශයේ සෞඛ්‍ය වෛද්‍ය නිලධාරී කාර්යාලයෙන් හෝ මහජන සෞඛ්‍ය පරීක්ෂකවරයාගෙන් ලබාගත හැකි බවද පිරිසුදු පානීය ජලය ලැබෙන්නේ නැතිනම්, ජලයට ක්ලෝරීන් යොදා විනාඩි 30කට පසු භාවිතයට ගන්නා ලෙසද ක්ලෝරීන් පෙති භාවිතයේදී, ජලය ලීටර පහකට එක් ක්ලෝරීන් පෙත්තක් යොදන ලෙසද ඔහු කීවේය.

‘වර්ෂාවත් සමඟ ඩෙංගු රෝගය පැතිරීමේ අවදානමක් තියෙනවා. ඒ නිසා ජලය රැඳෙන තැන් පිරිසුදු කරන්න. ඒ වගේම වැසිකිළිය හොඳින් පිරිසුදු කරගන්න. විසබීජ නාශක යොදාගන්න. අවසානයේදී එක්රැස් කළ කුණු කසල නිසි පිරිදි බැහැර කරන්න. ” යැයිද වෛද්‍යවරයා වැඩිදුරටත් කීය.