තමන්ගේත් තම දියණිගේත් ජීවිතවලට හානියක් කරතැයි බියක් ඇතිවි තිබෙන බව ඇඹිලිපිටිය නව නගරයේ සාදයක ගැටුමින් මියගිය සුමිත් ප‍්‍රසන්න ජයවර්ධනගේ බිරිඳ ශෂිකා නිශාමනි මුණසිංහ මහත්මිය අද (2) මාධ්‍යයට ප‍්‍රකාශයක් කරමින් පැවසුවාය.

ඇඹිලිපිටිය ප‍්‍රදේශයේ ප‍්‍රසිද්ධ ව්‍යාපාරික කාන්තාවක් සහ හිමිනමකගෙන් තමන්ට බලපෑම් එල්ල වෙතැයි ඇය පවසන්නීය.

‘මේ සිද්ධියට මාධ්‍යවේදීන් ඇතුළු අය එකතුවෙලා ඇඹිලිපිටියට ලොකු කලූ පැල්ලමක් ඇතිකර තිබෙන බවත් ඒ දේවල් නවත්වන්න මට පුළුවන් කියලාත් කිව්වා. වෙච්ච දේවල්වලට සාධාරණයක් ඉටු කරන්න පුළුවන් කිව්වා. එයාට නායක හාමුදුරුනමක් ඉන්නවා කිව්වා හාමුදුරුවෝ ඉස්සරහට වෙන හැම දෙයක්ම බලා ගනියි කියලා කිව්වා. මෙතනින් එහාට ගෙනියන්න එපා කියලා කිව්වා. එයාලා උදව් කරන්න වගේ ඇවිත් පෞද්ගලික තරහවල් පිරිමහ ගන්න හදන්නේ කියලා කිව්වා. ඔයාගේ අසරණ කමින් ඒ අය ප‍්‍රයෝජන ගන්නයි හදන්නේ කියලා කිව්වා. එයා ලොකු තනතුරු ගණනාවක් දරනවා කිව්වා. මාධ්‍යවේදිනියකුත් කිව්වා. එයා හඳුනන නායක හාමුදුරු නමක් ඉන්නවා කිව්වා. ඒ හාමුදරුවන්ගේ පදනමක් තියනවා කිව්වා. ඒ පදනමින් මට සල්ලි දෙන්නම් කිව්වා. රහසක් විදියට තියාගන්න කියලා කිව්වා. හාමුදුරුවෝ මා ගැන බලාගනියි කිව්වා. නඩු කියලා වැඩක් නෑ කියලා කිව්වා. දැන් මට ලොකු බයක් දැනෙනවා. මගේ දරුවා පාසල් යවන්නත් බයයි. මටයි දරුවටයි මොනවා හරි කරයි කියලා බයක් දැනෙනවා.’’ යැයි ශෂිකා නිෂාමනී මහත්මිය පැවසුවා ය.

සුමිත් ප‍්‍රසන්න ජයවර්ධනගේ මරණය සම්බන්ධයෙන් හා මරණකරුගේ අයිතිවාසිකම් වෙනුවෙන් අධිකරණයේ පෙනි සිටි නිතීඥ විජිත ජී පුංචිහේවා මහතාගෙන් විමසු විට ඔහු පැවසුවේ ශෂිකා නිෂාමනී මහත්මිය ඒ ගැන තමන්ට දැනුම් දී ඇතිබවයි. මරණ පරීක්‍ෂණය 03දා පැවැත්වෙන නිසා රජයේ අධිනිතීඥවරයාට දිව්රුම් පෙත්සමක් මගින් කරුණු දක්වා සුදුසු පියවරක් ගැනීමට බලාපොරොත්තු වන බවද  ඔහු කීවේ ය.