ඇඹිලිපිටියේ සාදයක දී පොලිසිය හා සාදයේ සිටි පිරිස අතර ගැටුමකින් පසු සුමිත් ප්‍රසන්න ජයවර්ධන නම් එක්දරු පියා මිය යෑමේ සිද්ධියේ පරීක්ෂණ සඳහා පොලිසියේ ඉහළින් බලපෑම් ඇතැයි පොලිස් ආරංචි කියයි.

ඇඹිලිපිටිය හිටපු සහකාර පොලිස් අධිකාරීට සහ මූලස්ථාන පොලිස් පරීක්ෂකට එරෙහිව ඉදිරිපත් වී ඇති ප්‍රබල සාක්කියක් යටපත් කිරීමට ද උත්සාහයක් ඇතැයි එම ආරංචි සඳහන් කරයි.

පොලිස් නිලධාරීන්ගේ වරදක් නැතැයි කියවෙන බාහිර සාක්කි පමණක් අධිකරණයට ඉදිරිපත් කිරීමට පොලිසිය සැරසෙතියි ද දැනගන්නට තිබේ.

මෙම සිද්ධියේ පරික්ෂණ කරන පොලිස් නිලධාරීන්ට පොලිසියේම ඇතැම් අංශවලින් සහයෝගයක් නැතැයි ද, එලෙස වී ඇත්තේ උසස් නිලධාරියකුගේ මැදිහත්වීම නිසාදැයි සැකයක් ඇතැයි ද කියති.

ඇඹිලිපිටි සිද්ධියේ විමර්ශන කටයුතු මේ වන විට සාර්ථකව පැවැත්වෙන අතර එය ප්‍රමාද කිරීමට විමර්ශනය ඔවුන්ගෙන් ඉවත් කර රහස් පොලිසියට හෝ වෙනත් පිරිසකට පැවරීම ගැන සාකච්ඡාවක් ඇතැයි පොලිස් අභ්‍යන්තර ආරංචිමර්ග පවසයි.

එක්තරා පොලිස් නිලධාරියකු බේරා ගැනීම එහි අරමුණ විය හැකියැයි තතු දත්තෝ කියති.

මේ අතර පොලිස් මූලස්ථානය කියනුයේ උසස් පොලිස් නිලධාරියකු සහකාර පොලිස් අධිකාරීවරයා බේරා ගැනීමට කටයුතු කරන බවට කරන චෝදනා අසත්‍ය බවයි. මාධ්‍යවල පළවන වාර්තා ගැන විමර්ශනයක් කර සත්‍ය තහවුරු කර ගන්නැයි පොලිස්පති එන් කේ ඉලංගකෝන් මහතා ජාතික පොලිස් කොමිසමට පැමිණිලි කර ඇත.