දකුණු පළාත් සභාවේ ආණ්ඩු පක්ෂ මන්ත්‍රීවරු පිරිසක් පුන් පොහෝදා (22) දංගෙදර උත්සව ශාලාවකට රැස්වී මත්පැන් සාදයක් පැවැත්වූහ.

පළාත් සභා මන්ත්‍රී සංසදය නමින් ගොඩනගාගත්  රැස්වීමකදී මත්පැන් බිව් බව ආණ්ඩු පක්ෂයේම පන්ත්‍රීවරු පිරිසක් කියති.

පළාත් සභා මන්ත්‍රී අජිත් ප්‍රසන්න මහතා මෙසේ කීවේය.

ඔව් අපි පෝය දවසේ මත්පැන් බීවා. එදාට සියලූම බාර් වහලා. නමුත් කලින් දවසේ ඇරලා තියෙනවා. අපි කලින් දවසේ ගත්තා (බෝතල්)   සාදයේදී මත්පැන් බිව්වා. පෝය දවස කියලා මත්පැන් නොබී ඉන්න කියා කවුරුවත් කියා නැහැ. බුදු දහම යනු දර්ශනයක්. එහි තියෙනවා ප්‍රමාදයට හා මදයට හේතුවන දේ පානය කරන්න එපා කියා. නමුත් අපි කාර්ය බහුලයි. අපිටත් විවේකයක් විනෝදයක් අවශ්‍ය වෙනවා. මතට තිත කියා රජයෙන් ගෙනයන වැඩ පිළිවෙලේ මුඛ්‍ය පරමාර්ථය වන්නේ හෙරොයින්, කසිප්පු වගේ දේවල් සමාජයෙන් ඉවත් කිරීම. සාදයකදී මත්පැන් පානය කරන්න එපා කියා කවුරුවත් කියන්නේ නැහැ. අපි බීලා පිස්සු නැටුවේ නැහැ. පෝය දවසේ බොන්න හොද නෑ කියන්නේ සමාජ මතයක් විතරයි. ඒක අපිට අදාල නැහැ.

මෙවර රැස්වීමේ සඳහා වියදම් පළාත් සභා මන්ත්‍රී කේ.පී.අමරපාල මහතා ගෙනි. ඔහු මෙසේ කීවේය.

අපි මේක කරන්නේ බොහොම අමාරුවෙන්. සල්ලිත් නැතිව ලාවට කරන දෙයක්. මන්ත්‍රීවරුන්ගේ රැස්විමෙන් පස්සේ කෑම කනවා. ඒ වෙලාවට ඉතින් පොඩ්ඩක් මත්පැන් දෙන්න වෙනවානේ. ඒ නිසා කලින් අරගෙන ටිකක් සූදානම්ව තියාගත්තා. පෝය දවසේ කරපු නරක වැඩක් කියලා හිතන්න එපා.

අමාත්‍යවරුන් සහභාගී නොවන මන්ත්‍රී සංසදයේ රැස්වීමක් පමණක් වුව ද ප්‍රධාන අමාත්‍ය ශාන් විජයලාල් ද සිල්වා මහතා ඇතුළු අමාත්‍යවරු ද ප්‍රාදේශීය සභා සභාපතිවරු සහ පළාත් සභාවේ නිලධාරීන් විශාල සංඛ්‍යාවක් ද රැස්වීමෙන් පසු පැවැත්වෙන සාදයට පැමිණ සිටියහ.