කොරියානු ධීවර තාක්ෂණයෙන් සමන්විත තාක්ෂණ විද්‍යාල දෙකක් උතුරේ සහ දකුණේ පිහිටුවීමට කොරියා රජය කැමැත්ත පළ කර ඇත.

කොරියානු ජාතික ධීවර සමුපකාර සම්මේලනයේ ආරාධනයෙන් එරට සිදුකළ සංචාරයේදී ධීවර ක්ෂේත්‍රයේ මෙම ආයෝජන හා ව්‍යපෘති රැසකට එරට ව්‍යාපාරික ප්‍රජාව හා රජයේ එකඟත්වය ලබා ගැනීමට ධීවර හා ජලජ සම්පත් සංවර්ධන රාජ්‍ය අමාත්‍ය දිලිප් වෙදආරච්චි මහතා ප්‍රමුඛ නියෝජිත කණ්ඩායම සමත්වීමත් සමඟ මෙම කැමැත්ත පළ වී ඇත.

ඊට අමතරව ධීවරයින් වෙනුවෙන් නව නිවාස, ධීවර වරායන්, ධිවර ක්ෂේත්‍රයට අදාළ විශාල ව්‍යාපෘති ගණනාවකට කොරියාවේ සහය ලබා ගැනීමට ධීවර හා ජලජ සම්පත් සංවර්ධන රාජ්‍ය අමාත්‍ය දිලිප් වෙදආරච්චි අමාත්‍යවරයාට හැකිව තිබේ.

මෙම සංචාරයේ දී අමාත්‍යවරයා ධීවර, සමුද්‍රීය පුනර්ජනනීය බලශක්තිය නිෂ්පාදන පිළිබඳ කොරියාවේ ප්‍රමුඛ ආයතන ගණනාවක ප්‍රධානීන් හා නියෝජිතයින් සමඟ සාකච්ඡා කළ අතර එහිදී වැඩි අවධානයක් යොමු වුයේ ශ්‍රී ලංකා ධීවර ක්ෂේත්‍රය තුළ සිඳු කළ හැකි ආයෝජන පිළිබඳවය.

අමාත්‍යවරයා සමඟ සාකච්ඡාවක නිරත වූ කොරියානු ජාතික ධීවර සමුපකාර සම්මේලනයේ සභාපතිවරයා එම සමුකාර සම්මේලනය විසින් මෙහෙය වන අවුරුදු දෙකක කාල සීමාවක් සම්පුර්ණ ගෙවීම් සහිතව පශ්චාත් උපාධි සහිතව ශිෂ්‍යත්ව දෙකක් ප්‍රධානය කිරීමට එකඟත්වය පළ ව ඇත.