ගිය තිස් වසරේදී  උතුරු නැගෙනහිරින් තමිල්නාඩුවට ගිය ශ්‍රී ලාංකික දෙමළ සරණාගතයින්ට දාව ළමයින් 24,000 ක් උපත ලබා ඇතත් ඉන් ඉන්දියාවේ පුරවැසි භාවය හිමිව ඇත්තේ දරුවන් 8000 කට පමණක් බව ටයිම්ස් ඔෆ් ඉන්දියා පුවත්පත කියයි.

පවතින නීති රීති යටතේ ඉන්දීය සරණාගත කඳවුරුවල උපදින ලාංකික දරුවන් වසරක් ඉක්මයන්නට පෙර චෙන්නායි හි ශ්‍රී ලංකා නියෝජ්‍ය මහ කොමසාරිස් කාර්යාලයයේ ලියාපදිංචි විය යුතු බව දෙමළ සරණාගතයින් පුනරුත්ථාපන සංවිධානයේ කැඳවුම්කරු චන්ද්‍රා හසන් මහතා ටයිම්ස් ඔෆ් ඉන්දියා පුවත්පතට පවසා ඇත.

දකුණු ඉන්දියාවේ අවතැන් කඳවුරුවල උපන් 16,000 කට ආසන්න තවත් ලාංකික දෙමළ දරුවන් තවමත් සරණාගත තත්ත්වයේ පසුවන බවද ඔහු කියයි.

දකුණු ඉන්දියාවේ සිටින ලාංකික සරණාගතයින් යළි ශ්‍රී ලංකාවට ගෙන්වා ගැනීමේ වැඩපිළිවෙළ යටතේ පළමුවෙන්ම මෙම දරුවන්ගේ උපත ලියාපදිංචි කළ යුතු බවත් ඉන්පසු ඔවුන් නැවත ලංකාවට ගෙන්වා ගත යුතු බවත් ‘ටයිම්ස් ඔෆ් ඉන්දියා‘ වාර්තාවේ සඳහන්ය.