ආණ්ඩුක්‍රම ව්‍යවස්ථාවට පටහැනිව වැඩිපුර අමාත්‍යවරුන් පත් කිරීමෙන් ජනාධිපති මෛත‍්‍රීපාල සිරිසේන මහතා තම මූලික අයිතිවාසිකම් කඩකර ඇතැයි ප‍්‍රකාශ කරන ලෙස ඉල්ලා නීතීඥයකු ගොනු කළ මූලික අයිතිවාසිකම් පෙත්සම සම්බන්ධයෙන් කරුණු තහවුරු කිරීමට මාර්තු15 වැනිදා කැඳවන ලෙස ශ්‍රේෂ්ඨාධිකරණය අද(17) නියෝග කළේය.

මේ සම්බන්ධ හැන්සාඞ් වාර්තා 8ක් ඉදිරිපත් කිරීමටද අධිකරණයෙන් අවසර ලැබිණි. ඊවා වනසුන්දර, උපාලි අබේරත්න සහ අනිල් ගුණරත්න යන විනිසුරු මඩුල්ලක් හමුවේ පෙත්සම කැඳැවිණි.

හඳපාන්ගොඩ නීතීඥ අරුණ ලක්සිරි මහතා ගොනු කළ මෙම පෙත්සමේ වගඋත්තරකරුවන් ලෙස ජනාධිපති මෛත‍්‍රීපාල සිරිසේන මහතා සහ නීතිපති නම් කරනු ලැබ සිටිති.

ජනාධිපති ජාතික ආණ්ඩුවේ ප‍්‍රධානියා හැටියට පත්වී ඇති නමුත් විධිමත් ලෙස ජාතික ආණ්ඩුව ස්ථාපිත වී නොමැති බව පෙත්සම්කරු කියා සිටී. ආණ්ඩුක‍්‍රම ව්‍යවස්ථාවේ 46.1(අ) වගන්තිය අනුව ජාතික ආණුඩවක අමාත්‍ය මණ්ඩලයක සිටිය යුතු අමාත්‍යවරුන් සංඛ්‍යාව තිහ නොඉක්මවිය යුතු බව දැක්වේ.

නමුත් ඊට පටහැනිව අමාත්‍යවරුන් පත් කර ඇතැයිද එයින් තම මූලික අයිතිවාසිකම් කඩවී ඇතැයි පෙත්සම්කරු කියා සිටී. මෙම පෙත්සම විභාගයට ගෙන අවසන් වන තුරු ව්‍යවස්ථාවට පටහැනිව අමාත්‍යවරුන් පත්කිරීම වළක්වාලන අතුරු නියෝගයක් නිකුත් කරන ලෙසද ,ජනාධිපති තම මූලික අයිතිවාසිකම් කඩ කර ඇති බව ප‍්‍රකාශ කරන ලෙසද සිය පෙත්සමින් ඉල්ලා සිටී.

පෙත්සම්කරුම සිය පෙත්සම වෙනුවෙන්ම පෙනී සිටි අතර නීතිපති වෙනුවෙන් රජයේ නීතීඥ ආචාර්ය අවන්ති පෙරේරා මහත්මිය සමඟ නියෝජය සොලිස්ටර් ජනරාල් ඉන්දිකා දේමුණි ද සිල්වා මහත්මිය පෙනී සිටියාය.